कुलुसि 2 - Muria Far Western

¹ मिया साटि अनि बोर लवुदिकिया सहेरतिगा मन्तोर अनि बोरक इदेकवनाह नावा चेहरा हुळोर ओर सबोय लोकुरक साटि,

² अनि परमेस्वरना रहस्य योजना मसि मन्तोर, ओद रहस्य योजनाता पुरा ग्यान समजेमायान साटि निमाट आपसता मयाते उन्दि आस मन्दुन हिमत पुटि इन्जोर नना इचोन हजोर मेहनत कियाला आतोना इदाम निमाट पुन्ट इन्जोर नावा इच्चा मन्ता।

³ बुद्धि अनि ग्यानता सबोय धन ओनागा मकता मन्तांग।

⁴ बोरायि मानेय केवल केन्जा साटि सोबाय सोबाय मन्तांग ओव दोखा केवाल पोल्लोंग वळकस मिकुन भटके केमाकिर इन्जोर नना इदाम इन्दिला आतोना।

⁵ नना मियाताल लक मन्तोना ते वने दरोज मिया बारेते विचार किस मिया हेरे मन्तोना अनि मिया व्यवस्थित जिवनतुन अनि मसिनिगा मिया पकाय मजबुत विस्वास हुळस गिरदा आन्तोना।

मसि विस्वासते मिकुन पुनाल जिवन पुटान्ता

⁶ इन्जोर निमाट येसु मसिन प्रबु इन्जोर स्विकार कितोरिट, अदामे ओना सहभागते ताकसोर मन्ट।

⁷ अनि ओनागाय मिया विस्वास तोळिय लोपाडा हिरक लेहका खोल हन्ज मजबुत आस येसु मसिना संगते बरसोरिंग मन्ट। अनि बदाम मिकुन करिहतोर अदामे येसु मसिना विस्वासतिगा मजबुत आस परमेस्वरिन पकाय धन्यवाद किसोर मन्ट।

⁸ मिकुन परमेस्वरना बारेते मानेयना ग्यान अनि केवल खोटाल करिना करहिसुन बोरायि मिकुन दोखा हेमाकिर इन्जोर हुशार मन्ट। ओद मानेयता परम्परा अनि इद दुनियाता लोकुर बनेहकिता नियमता अनुसार मन्ता मति इद मसिना बारेता खरोय करिहानाता विरुद मन्ता।

⁹ बाक्याकि परमेस्वरना सबोय परिपुरणता मेन्दुलता रुपते मसिनिगा मता।

¹⁰ सबोय शासक अनि अदिकारिलोकुरकुन नियन्त्रन केवाल ओरे मन्तोर ओनासंगते निमाट पुरा बनेमातोरिट।

¹¹ निमाट मसिन स्विकार कितिट ओद बेरा आत्मिक रुपते मिया कतना वने आत मति ओद मानेयता कयदे आयो। मसि मिकुन हिता ओद कतनाता द्वारा मिया पापता स्वभावतुन ओर कदियस वाटसितुर।

¹² अनि हातोरक मानेयतुन बदाम मिसिन्तोरक अदामे बपतिस्माता द्वारा मिकुन येसु मसिनासंग मिसितुरक। अनि परमेस्वर बदाम येसु मसिन हातोरिगाडाल असा जिवेहकितुर अदामे परमेस्वरना विस्वासता द्वारा ओना लावदे निमाट वने ओनासंग असा जिवेमातोरिट।

¹³ निमाट परमेस्वरनिगा विस्वास कियाना पहले पाप किसोर मन्दिट बाक्याकि आपुना पापि स्वभावतुन कदियवाय मतोरिट इन्जोर आत्मिक रुपते निमाट हास मतोरिट। मति मावा सबोय पापतुन मापि हिस परमेस्वर मिकुन मसिनासंग जिवेहकितुर।

¹⁴ अनि मावा दन्डता कारण आस मावा विरुद कोटता मता ओद सबोय नियमतुन ओर मावा नडुमताल गुचिहच अदेन कुरुस पोरो कोहक्स मावा पापतुन मापि हिस ओनासंग माकुन जिवे किसिहतुर।

¹⁵ अनि मावा पोरोयता सयताना लाव अनि ओना अदिकारतुन हारमानेमास येसु मसिना कुरुस पोरो हायानाता द्वारा ओरागा विजयता जय जयकार किस परमेस्वर सबोय लोकुरा मुने ओरकुन खुल्लमखुल्ला तमाशा बनेहकितुर।

येसु मसिना खरोय करिहानाते मन्ट

¹⁶ इन्जोर मिया तिन्दाना-उन्डाना बारेते अनि निमाट अलग अलग हनुम अनि पुनाल नलेन्जता हनुम अनि सबात लेहका विशेषाल हनुम मानेमायाना बारेते बोरे मिकुन दोष हेमाकिर।

¹⁷ बाक्याकि इव सबोय वायवांग पोल्लोता केवल जंगो आन्दुंग अनि इद जंगो मन्जे मसिहाल आन्दुर।

¹⁸ दर्शनता द्वारा पुटता इन्जोर लोकुरकुन आग्याता पोल्लो वेहच बोरायि मानेय नाटक किस पकाय नम्रता लेहका आपुनतुन तोहच अनि स्वरगदूतकना पुजा किस दुसरो लोकुरक वने इदाम कियाला पहाजे इदाम वेहचुन बोरे मिकुन दोखा हेमाकिर। मति इद सबोय मुर्खताता पोल्लो मन्ता बाक्याकि ओरा पापते निन्दिता गमन्डि मन्दे ओरक इदाम पोल्लोंग वळकान्तोर।

¹⁹ बदाम तला मेन्दुलतुन नियत्रण किन्ता अदामे मसिलोकुरा सभाता तला आस सबोय विस्वासि लोकुरकुन मसि नियन्त्रन किन्तोर। मति इदाम खोटाल पोल्लो पळकवाल लोकुरक मसिना बारेता खरोयतुन बराबर विस्वास किस करहोर। सबोय मेन्दुल तलाता नियत्रणते जोळक अनि नस्कना द्वारा पालन-पोषन आस अनि सबोय मेन्दुल उन्दिय आस बरसोरिंग दान्ता। अदामे येसु मसिना संबन्दते आपुना मेन्दुल मन्ता मसिलोकुरा सभाता विस्वासि लोकुरक परमेस्वरना योजनाता अनुसार परमेस्वरना बारेते समजेमास बरसोर दान्तोरक।

मसिनासंग हायाना अनि जिवेमायाना

²⁰ निमाट मसिनासंग हातोरिट अनि लोकुरक पालन कियाना साटि मानेय बनेहकिता सन्सारता नियमताल स्वतन्त्र कितुर ते इद दुनियाता रितिते व्यवहार केवाल लोकुरा लेहका सन्सारता नियमता अनुसार:

²¹ “इदेन कय पयमाट, इदेन नाकमाट, अनि अदेन कय इटमाट” इदाम नियमतुन बाक्या पालन किन्तोरिट?

²² इव सबोय नियम बुतोतिगा तचोर-तचोर नाश आयना पोल्लोता बारेते मन्ता। बाक्याकि इद मानेयना आग्या अनि करहानाता अनुसार मन्ता।

²³ ओव नियम आपुना इच्चाता अनुसार पकाय भक्तिता रिति अनि पकाय नम्रता लेहका नाटक कियाना, अनि आपुना मेन्दुलतुन नोमुर हियाना इदाम पोल्लोतुन पकाय प्रोत्साहन किन्ता। इव ग्यानता पोल्लो लेहका दिसान्ता मति मानेयताल बनेमाता इव नियमते लोकुरा खराब स्वभावतुन रोकेकियान साटि बाराय फायदा आयो।