कुलुसि 1 - Muria Far Western

अभिवादन

¹ परमेस्वरना इच्चाते येसु मसिना खास चेला पोलुस अनि मावोर तमो तिमुथियुस, कुलुसि सहेरतिगा मन्वालोरक पवित्र अनि मसिनिगा विस्वास किन्तोरक ओरक सबोय लोकुरक साटि इद पत्र कोटान्तोरोम,

² मावोर बाबो परमेस्वरनिकेडाल मिकुन दया अनि शान्ति पुटसोर मनि।

धन्यवादता प्रार्थना

³ माक मिया साटि प्रार्थना कियानपा मावोर प्रबु येसु मसिनोर बाबो परमेस्वरना दरोज धन्यवाद किन्तरोम,

⁴ बाक्याकि येसु मसिनिगा मिया विस्वास अनि सबोय पवित्र लोकुरकनिगा मिया मयाता बारेते माक केन्जतोरोम।

⁵ ओद स्वरगतिगा परमेस्वर मिया साटि इरता मन्ता ओद आशाताल वान्ता। ओद सोबाता पोल्लोता खरोय सन्देशता द्वारा निमाट मुनेटाले केन्जतोरिट।

⁶ निमाट अदे सोबाता पोल्लो केन्जतिट अनि परमेस्वरना दयाता बारेता खरोयतुन सबोय रितिते समजेमातोरिट ओद दियाताल मिया जिवन बदाम बदलेमातु अनि परमेस्वरना स्वभावतुन मिया जिवाते सोबाता कायांग लेहका प्रगट किन्ता अदामे सबोय जागातिगा वने ओद सोबाता पोल्लो लोकुरा जिवनतुन बदलेहकिस सोबाता कायांग ततसोर मन्ता।

⁷ अनि ओद सुसमाचार निमाट मावोर प्रिय सहकर्मि इपफ्रासनिकेडाल करहितोरिट ओर मावा साटि मसिहानोर विस्वासयोग्य सेवक मन्तोर।

⁸ पवित्र आत्मा मिकुन हिता मयाता बारेते ओर माकुन वने वेहतुर।

माक मिया साटि प्रार्थना किन्तोरोम

⁹ इन्जोर माक इद केन्जतोरोम ओद दियाताल मिया साटि दरोज प्रार्थना किन्तोरोम।

¹⁰ निमाट प्रबुना योग्य चाल-चलन किस पवित्र आत्मा हिन्तोर ओद सबोय ग्यान अनि समजेमायानातासंग परमेस्वरना इच्चातुन पुरा रितिते पुन्ज मियागा सबोय प्रकारतांग भल्लो बुतोता कायांग प्रगट किस सबोय प्रकारते ओन प्रसन्न किस निमाट परमेस्वरिन बराबर पुन्ज बरसोरिंग हन्ट।

¹¹ अनि ओना गिरदाता संग सबोय प्रकारते दिर अनि सहनशिलता तोह परकिट इन्जोर परमेस्वरना महिमाता लावता अनुसार सबोय प्रकारतांग सामर्थते लाववाले आसोर हन्ट।

¹² अनि परमेस्वरना वेळिचिता राज्यतिगा, पवित्र लोकुरासंग सहभागि आयाना वारस पुटाना योग्य बनेहकिस,

¹³ माकुन अन्दकारता राज्यता अदिकारताल पिसिहच आपुनोर प्रिय मरिना राज्यतिगा ओतोर ओर बाबोना धन्यवाद कियाला पहाजे इन्जोर मिया साटि माक वने विनन्ति किसोर मन्तोरोम।

¹⁴ ओनिगा पापताल लेहचियाना मन्ता मन्जे माकुन पिसाना मन्ता।

येसु मसि सबोय चिजतुन बनेहकितोर

¹⁵ येसु मसि अदृश्य परमेस्वरना स्वभावतोर अनि सबोय गुणतोर प्रतिरुप मन्तोर अनि सबोय उत्पन्न आता अदेनिगा ओन सबोय अदिकार मन्ता।

¹⁶ बाक्याकि बारायि स्वरगतिगा अनि दरतितिगा मन्ता, बारायि दिसान्ता अनि बोद दिसो ओद सबोय ओनाय लावते उत्पन्न आता। अनि सबोय प्रकारता सिंहासन आयि या राज्य आयि, बोरायि शासक आयिर या अदिकारिक आयिर इदाम दिसाना अनि दिसो अव सबोयतुन ओर बनेहकितोर। अनि ओना साटिय उत्पन्न किता मन्ता।

¹⁷ अनि ओरे सबोय चिजक बनेमायनाता मुनेटोर मन्तोर अनि ओनाय लावते सबोय चिजकुन नियन्त्रन अनि पालन पोषन किन्तोर।

¹⁸ अनि तला आपुना मेन्दुलतुन बदाम नियन्त्रन किन्ता अदामे आपुना मेन्दुल मन्ता मसिलोकुरा सभातुन ओर नियन्त्रन किन्तोर। सबोय पोल्लोतिगा मुनेटा स्थान ओन पुटि इन्जोर ओर मसिलोकुरा सभातुन बनेकेवाल अनि ओर मसिलोकुरा सभातुन जिवन हेवाल मन्तोर, अनि हातोरिगाडाल असो जिवे मायवालनिगा मुनेटोर मन्तोर

¹⁹ बाक्याकि आपुना सबोय परिपूर्णता ओनागा मनि,

²⁰ अनि ओर कुरुस पोरो पोंगिहता नतुरता द्वारा शान्ति बनेहकितुर अनि बोद दरतिता मन्ता या बोद स्वरगता मन्ता ओव सबोयतुन ओना द्वारा परमेस्वर आपुनतुन असा मिलेह कियाना साटि परमेस्वर गिरदा आतुर।

निमाट विस्वासते स्थिर मन्ट

²¹ निमाट येसु मसिना विस्वासते वायाना पहले आपुना खराब विचार अनि खराब बुतोंगता कारण परमेस्वरना हेरेटाल लक मतोरिट अनि ओनोर विरोदि मन्दिट।

²² मिकुन आपुना टोडि मुने पवित्र अनि निष्कलन्क अनि निरदोष बनेहकिस हाजर केविर इन्जोर ओर इदेक मसि शारिरिक मेन्दुलतिगा हायानाता द्वारा मिकुन वने मिले कितुर ते निमाट केन्जता ओद सोबाता पोल्लोतिगा हिता आशाताल निमाट बदलेमायमाट अनि स्थिरता अनि मजबुतासंग निमाट ओद सोबाता पोल्लोतिगा विस्वास किसोर मन्ट।

²³ इद आबारता अडिय सबोय सृष्टितुन इद सोबाता पोल्लोता प्रचार किस नना पोलुस ओद सोबाता पोल्लो प्रचार कियान साटि सेवक बने मातोना।

मसिलोकुरा सभातोर सेवक-पोलुस

²⁴ इदेक मिया साटि पकाय तकलिप मन्ता इन्जोर नना गिरदा आतोना अनि इद पकाय तकलिपतुन सहेनकियाना जिमेदारि येसु मसिनिकेडाल ओना मेन्दुल मन्ता ओना मसिलोकुरा सभा साटि नावा मेन्दुलतिगा पुरा किन्तोना।

²⁵ परमेस्वर मिया भला साटि नाकुन हिता बुतोता योजनाता अनुसार परमेस्वरना सुसमाचारतुन पुर्ण रितिते प्रचार कियान साटि नना मसिलोकुरा सभाता सेवक बनेमातोना।

²⁶ युगयुगताल पिळि-पिळिता लोकुरकुन ओद रहस्यतुन पुरा समजेमायाना गुपित इरस मतोर मति इदेक पवित्र लोकुरकुन ओद प्रगट आता।

²⁷ इद पकाय आश्चरय अनि महत्व पुर्ण रहस्यतुन बोर यहुदि लोकुर आयोर ओर लोकुरकुन वेहका इन्जोर परमेस्वर इच्चा कितुर। अनि ओद रहस्य मन्जे महिमाता आशा मन्ता ओर येसु मसि ओनागा विस्वास केवाल मियासंगे मन्तोर।

²⁸ इन्जोर माक ओना प्रचार किन्तोरोम। अनि सबोय लोकुरकुन मसिनिगा परिपूर्ण किस परमेस्वरना मुने उपस्थित कियान साटि माक सबोय लोकुरकुन चेतावनि किस सबोय ग्यानते सबोय लोकुरकुन करहान्तोरोम।

²⁹ इदाम सबोय लोकुरकुन मसिते परिपूर्ण बनेहकियान साटि नावागा लावते बुतो कियाला आता मसिना पकाय लावता अनुसार नना मन लावेकिस मेहनत वने किन्तोना।