बुतोंग 8 - Muria Far Western

शावुल मसिलोकुरा सभातुन पकायि तकलिप हिन्तोर

¹ शावुल स्तिफानुसिन हव्कानातिगा सहमत मतोर। प्रबुना हुचुलोर भक्त विस्वासि लोकुरक स्तिफानुसतुन बिजगुडितिगा मिसितुरक अनि ओना साटि पकाय किलतुरक।

² ओदे दिया येरुसलेमता मसिलोकुरा सभातुन यहुदिलोकुरक पकाय तकलिप सुरु कितुरक।

³ शावुल लोहक लोहक होळियस मानेयक अनि आसकुन पिळींगस पिळींगस जेहलतिगा बन्द किस मसिलोकुरा सभातुन नाशकियाना सुरु कितुर। अनि येसुना खास चेलाल लोकुरकुन तासिस सबोय लोकुरक यहुदि अनि सामरि देशतिगा हिके-होके आतुरक।

सामरि प्रदेशतिगा फिलिप्पुस येसुना सोबाता पोल्लो वेहान्तोर

⁴ बोरक हिके-होके आस मतोरक, ओरक सुसमाचार केन्जिहसोर वलियतुरक।

⁵ अनि फिलिप्पुस सामरि सहेरतिगा हन्जुन लोकुरकनिगा मसिना बारेते वेहिला लागतुर।

⁶ फिलिप्पुस किता चिन्हातुन हुळसुन अनि केन्जुन ओन वेहता ओद पोल्लोंग लोकुरक उन्दि मन लावेकिस केन्जतुरक।

⁷ पकाय लोकुरकनिगाडाल दुष्टात्मा पकाय जोरदे केयसोर पसियस हतु अनि पकाय लकवा बिमारि लोकुरक अनि लंगळाह लोकुरकुन वने सुदरे कितुरक।

⁸ इदाम सामरि सहेरतिगा पकाय गिरदा आतु।

होदाल शिमोना बारेते

⁹ मति ओद सहेरतिगा शिमोन पोरोयतोर वरोर मानेय मतोर, ओर जादु-टोना किस आपुनतुन वरोर पकाय हजोर मानेय आन्दान इन्जोर वेहच सामरिता लोकुरकुन चकित किन्दुर।

¹⁰ हुडलोरताल हजोहवनाह सबोयजन ओना मान किस, “येर मानेयता पोरो हजोर लाव पोरोयता पेनता लाव मन्ता” इदाम ओना बारेते लोकुरक इन्तोरक।

¹¹ ओर पकाय दियाताल ओरकुन आपुना जादुता बुतोते चकित किस मतोर इन्जोर ओरक ओन पकाय मानेमान्दुरक।

¹² मति फिलिपुस परमेस्वरना राज्यता बारेते अनि येसुना पोरोयता बारेता सोबाता पोल्लो वेहन्दुर असके मानेयक अनि आसक इदाम ओर सबोय लोकुरक विस्वास किस बपतिस्मा येतिला लागतुरक।

¹³ असके शिमोन वने येसुनिगा विस्वास कितुर अनि बपतिस्मा येतस फिलिप्पुसनासंग मन्दिला लागतुर। ओर फिलिपुसना द्वारा आता चिन्ह अनि हजो-हजोह लावता बुतो हुळस चकित आन्दुर।

सामरि सहेरतिगा पतरस अनि युहन्ना

¹⁴ येसुना खास चेलाल लोकुरक येरुसलेम सहेरतिगा मतोरक। सामरि सहेरतोर लोकुरक परमेस्वरना पोल्लोतुन स्विकार कितुरक इन्जोर येसुना खास चेलाल लोकुरक केन्जतुरक असके ओरक पतरस अनि युहन्नान ओरा हेरे लोहतुरक।

¹⁵ पवित्र आत्मा पुटहिर इन्जोर ओरक हन्जुन ओरा साटि प्रार्थना कितुरक।

¹⁶ बाक्याकि इदेकवनाह पवित्र आत्मा ओर लोकुरकनिगाडाल बोनाय पोरो रयो आस मता, ओरक केवल प्रबु येसुना पोरोयते बपतिस्मा येतस मतोरक।

¹⁷ ओरक ओरागा कय इरतुरक असके ओरकुन पवित्र आत्मा पुटतु।

¹⁸ येसुना खास चेला लोकुरा कय इरानाते पवित्र आत्मा पुटान्ता इन्जोर शिमोन हुळतुर असके ओरा हेरे डबुंग तचुन इतुर,

¹⁹ “बोनागाय कय इरका ओन पवित्र आत्मा पुटि, इन्जोर इद अदिकार नाकुन वने हिम्ट” इन्जोर ओर इतुर।

²⁰ पतरस ओन इतुर, “निमा परमेस्वरना दान डबुते असाना विचार किति इन्जोर निया डबुंग नियासंग नाश आयिंग।

²¹ निया मन परमेस्वरना मुने खरोय हिले इन्जोर इद पोल्लोतिगा निया हिसा अनि भाग हिले।

²² इन्जोर आपुना इद खराबताल पस्तेमास परमेस्वरतुन प्रार्थना कियाकि ते निया मन्दा विचार मापि आयार।

²³ अनि निमा पकायि हेवा अनि परमेस्वरना मुने येताना योग्य हिले इदाम खराब बुतोता अदिकारते मन्तोन” इदाम नना हुळान्तोना इन्जोर इतुर।

²⁴ असके शिमोन इदाम उत्तर हितुर, “बोव पोल्लोंग निमाट इतिट, अव पोल्लोंगनिगाडाल बोवे पोल्लोंग नावागा वायमाकिंग इन्जोर निमाट नावा साटि प्रबुनिके प्रार्थना किम्ट।”

²⁵ पतरस अनि युहन्ना मसिनिगा विस्वास कितोरक ओर सामरि सहेरता विस्वासि लोकुरकुन प्रबुना गवाहि अनि प्रबुना पोल्लो वेहचुन येरुसलेम मलस हतुरक। अनि येरुसलेम मलस हन्दानपा सामरि सहेरता पकाय नाटेनिगा सोबाता पोल्लो केन्जिहसोर हतुरक।

फिलिप्पुस अनि कूश देशतोर अदिकारि

²⁶ पजा प्रबुनोर वरोर स्वरगदूत फिलिप्पुसतुन, “तेदा अनि येरुसलेमताल दक्षिण देशता गासा सहेरतिके दान्ता ओद सुनसान हरिते हन” इन्जोर इतुर।

²⁷ ओर तेदचुन हतुर कूश देशतोर वरोर हिजळाल मानेय, कूश देशता रानि कन्दाकेना डबुंगना लेनदेन केवाल मंत्रीन हुळतुर, ओर आरादना कियान साटि येरुसलेम वासुन मलस दान्तोर।

²⁸ ओर आपुना रथतिगा उदस परमेस्वरना पोल्लो वेहवाल यशायाहना पुस्तक वाचेकिसोर मन्दुर।

²⁹ असके पवित्र आत्मा फिलिप्पुसतुन: “निमा ओद रथता हेरे हन्जुन ओदेनासंग हन” इन्जोर इतुर।

³⁰ फिलिप्पुस ओद रथतिके वितितुर अनि ओन परमेस्वरना पोल्लो वेहवाल यशायाहना पुस्तक वाचेकियानपा केन्जतुर; “निमा पुस्तक वाचेकियाला आतोन ओद निकुन समजेमान्तोन बहे?” इन्जोर पुच्चेमातुर।

³¹ “बोरे नाकुन समजेहकिस वेहोर अचोनवनाह नाकुन बदाम समजेमायार?” इन्जोर ओर इतुर। अनि ओर अन्जकुन ओना हेरे उदिर इन्जोर ओर फिलिप्पुसतुन विनन्ति कितुर।

³² अनि पवित्र पुस्तकता बोद भाग ओर वाचेकिसोर मतोर, ओद इद मता: “ओन बेळा लेहका असकान साटि ओतुर अनि बदाम बेळा पिला असकवालना मुने कमेक मन्ता, अदामे ओर वने आपुना टोडि तरियोर।

³³ ओना अपमान कियाना बेरा ओना न्याय पुटो आतु। दरतिताल ओना जिवन ताहच मतोर। ओद पिळितोर लोकुरा बारेते बोर वर्णन कियानुर?”

³⁴ असके हिजळाल फिलिप्पुसतुन पुच्चेमातुर, “परमेस्वरना पोल्लो वेहवाल इद बोना बारेते इन्तोर? आपुना या दुसरोना बारेते?” इन्जोर नाकुन वेहा।

³⁵ असके फिलिप्पुस ओनासंग वळकाना सुरु कितुर, अनि इदे पवित्र पुस्तकताल सुरु किस ओन येसुना बारेता सोबाता पोल्लो वेहतुर।

³⁶ अनि हन्जोर हन्जोर ओरक एर मता उन्दि तळाय हेरे अवतुरक असके हिजळाल: “हुळा इगा एर मन्ता, इदेक नाकुन बपतिस्मा येतान साटि बाताल अळचन मन्ता” इन्जोर इतुर।

³⁷ (अनि फिलिप्पुस ओन इतुर: “निमा आपुना सबोय मन्दे विस्वास किन्तोन ते बपतिस्मा येतिला परान्तोन।” अनि ओर इतुर, “येसु मसि परमेस्वरनोर मरि आन्दुर इन्जोर नना विस्वास किन्तोना।”)

³⁸ असके ओर रथतुन निपहाना आग्या हितुर, अनि फिलिप्पुस अनि हिजळाल इवुरास तळायतिगा रयतुरक अनि फिलिप्पुस हिजळान बपतिस्मा हितुर।

³⁹ ओरक एताल पसियस पोरो वातुर असके प्रबुना आत्मा फिलिप्पुसतुन ताहच ओतु, अनि हिजळाल पजा ओन हुळोर आतुर, अनि ओर गिरदा किसोर आपुना हरिते हतुर।

⁴⁰ अनि पजा फिलिप्पुसिन अशदोद सहेरतिगा दिसतुर, अनि ओर कयसरिया सहेरतिगा हन्दिलातोर। अशदोदताल सबोयि नाटे नाटेनिगा येसुना सोबाता पोल्लो केन्जिहसोर ओर कयसरिया सहेरतिगा अवतुर।