बुतोंग 5 - Muria Far Western

हनन्याह अनि सफीराता बारेते

¹ मति हनन्याह पोरोयतोर वरोर मानेय अनि ओना मुत्ते सफीरा ओरक इवुरास आपुना हुडुक डन्डतुन मोमतुरक,

² अनि पुटता डबुंगताल हुचुक डबुंग मुत्तेन मिलेमास आपुना हेरे इरतुर अनि हुचुक डबुंग तचुन येसुना खास चेलाल लोकुरा काल्कना मुने इरसितुर।

³ असके पतरस ओन पुच्चेमातुर, “हे हनन्याह! निमा पवित्र आत्माता मुने खोटाल वळकति, आपुना डन्डतुन मोमस पुटता डबुंगताल हुचुक डबुंग आपुना हेरे इरति इन्जोर सयतानतुन निमा आपुना मन्दिगा इदाम बुतो कियालाय बाक्या इदाम सन्दि हिति?

⁴ मोमाना मुने बाताल ओद निया हिले आसि? अनि अदेन निमा मोमसिति असके वने ओद धन बाताल मिया इच्चा अनुसार अदेन उपयोग किया परकि बहे? निमा इदाम खोटाल पोल्लो कियान साटि बाक्या विचार किति? इद खोटाल पोल्लो निमा मानेयतुन आयो मति परमेस्वरतुन वळकतोन।”

⁵ इव पोल्लोंग केन्जतपा हनन्याह जिवा तासिस अडिय अरतुर, अनि सबोय केन्जवालोरकुन पकाय वरे आतु।

⁶ पजा लयोर तेदचुन ओना सकुलि बनेहकितुर अनि ओन बाहरो ओस मिसितुरक।

⁷ लगभग मून्ड गन्टाता पजा हनन्याहना मुत्ते, अगा बाताले आस मता अदेन पुनवाप, लोपा वातु।

⁸ असके पतरस अदेन पुच्चेमातुर: “नाकुन वेहा बाताल निमा ओद डन्ड इचोने डबुते मोमस मन्दिट?” ओद इतु, “इंगो, माक इचोने डबुते मोमस हितोम।”

⁹ पतरस अदेन इतुर, “निमाट इवुरास प्रबुना आत्माता परिक्षा कियान साटि बाक्या उन्दि आतिट? हुळा! नियोर मुजोन मिसवालोरक इदेक वायनुरक, अनि ओर निकुन वने बाहरो ओस अदामे कियानुरक।”

¹⁰ असके ओद सान्डेय जिवा तासिस ओना मुने अरतु, अनि लयोर लोपा वास अदेन हाता हुळतुरक अनि बाहरो ओस अदेना मुजोना हेरे मिसितुरक।

¹¹ मसिलोकुरा सभाता सबोय लोकुरकुन अनि इव पोल्लोनुंग केन्जवालोर सबोय लोकुरकुन पकाय वरे आतु।

येसु मसिना खास चेलालोरक किता अत्भुत बुतोंग

¹² येसुना खास चेला लोकुरा कयदे पकाय चिन्ह अनि चमत्कारता बुतो लोकुरा नडुम तोहन्दुर अनि ओरक सबोय उन्दि मन आस सुलेयमान राजाना मन्डातिगा जमा आन्दुरक।

¹³ पकाय लोकुरक ओरा वाहवा किन्दुरक ते बोरे ओरासंग मिलेमायानाता हिमत केवोर,

¹⁴ ते वने असा असा पकायि मानेयक अनि आसक प्रबुनिगा विस्वास किस मसिलोकुरा सभातासंग जुळेमासोर मतोरक।

¹⁵ अनि लोकुरक बिमार लोकुरकुन हरितिगा तच-तच पतरस वायनुर असके ओना दळमि ओरागाडाल बोनागाय अरि इन्जोर कटुल अनि चटयि पोरो हुन्जिहन्दुर:

¹⁶ इचोने आयो येरुसलेमता हेरेगुरेटा सहेरताल वने पकाय लोकुरक बिमार अनि दुष्टात्मा सतेह कितोरकुन तच-तच जमा किन्दुरक। अनि येसुना खास चेला लोकुरा द्वारा सबोयलोरकुन परमेस्वर सुदरे किन्दुर।

येसुना खास चेलालोरकुन पकायि तकलिप किन्तोरक

¹⁷ असके हजोर याजक अनि सदुकियाता दलतोर मतोर ओनोर संगवारिह येसुना खास चेला लोकुरा विरोदते पकाय हेवाते आस नितितुरक।

¹⁸ अनि ओरक येसुना खास चेला लोकुरकुन पयस जेहलतिगा बन्द किसितुरक।

¹⁹ मति नरका प्रबुनोर वरोर स्वरगदूत जेहलता कवाळ तरियस ओरकुन बाहरो तच,

²⁰ “हन्ट, प्रार्थना लोतिगा नितस इद जिवनता पोल्लोंग सबोय लोकुरकुन वेहाट” इन्जोर इतुर।

²¹ ओरक इद केन्जचुन सकार आतपा प्रार्थना लोतिगा हन्जुन उपदेश हियाला लागतुरक। असके हजोर याजक अनि ओनोर संगवारि वास हजोर सभातिगा इस्रायेलतोर सबोय अदिकारि लोरकुन जमा कितुर। अनि येसुना खास चेलालोरकुन तरीर इन्जोर जेहलतिगा लोहतुर।

²² मति ओरकुन ततान साटि हतोर, “माक जेहलतुन पकाय चवकसिते बन्द कितोम अनि केपवालोर सयनिक लोकुरकुन बाहरो कवाळतिगा नितितोरक हुळतोम,

²³ मति कवाळ तरियतोम असके लोपा येसुना खास चेलाल लोरकुन कलियोम आतोम” इदाम ओरक मलस वास वेहतुरक।

²⁴ प्रार्थना लोतुन केपवालोर सयनिक लोकुरा अदिकारि अनि मुक्य याजक लोकुरक इद पोल्लो केन्जतुरक असके येसुना खास चेला लोकुरकुन बाताल आतु इन्जोर ओरा बारेते पकाय चिन्ताते अरतुरक।

²⁵ अचोय बेरा बोरे वास ओरकुन वेहतुर, “हुळाट, निमाट जेहलतिगा बन्द किस मन्दिट ओरक मानेयक प्रार्थना लोतिगा नितस लोकुरकुन उपदेश हियाला आतोरक!”

²⁶ असके प्रार्थना लोतुन केपवालोर सयनिक लोकुरा अदिकारि आपुना सिपायिलोरासंग हन्जुन लोकुरक माकुन कलदे हेमाकिर इदाम ओर लोकुरकुन वरियन्दुर इन्जोर ओरकुन जबरदस्ति केवाय ततुरक।

²⁷ इदाम ओरक येसुना खास चेलालोरकुन तचुन हजोर सभाता मुने निपिहतुर, असके हजोर याजक ओरकुन,

²⁸ “ओर येसुना पोरोयते उपदेश हेमाट इन्जोर माक कटोर आदेस हिस मतोरोम ते वने पुरा येरुसलेमतुन निमाट आपुना उपदेशते निहतोरिट अनि ओर मानेयना हायाना गुन्हा मावागा तताना निमाट इच्चा किन्तोरिट” इन्जोर इतुर।

²⁹ असके पतरस अनि येसुना दुसरो खास चेला लोकुरक हजोर याजकिन इदाम उत्तर हितुर: “मानेयना आग्याताल विळस माक परमेस्वरना आग्याता पालन जरुर कियाला पहाजे।

³⁰ निमाट कुरुस पोरो अन्जहिस हव्कस मन्दिट ओर येसुन मावोर आजि-दादिलोरा परमेस्वर असा जिवेहकितुर;

³¹ इस्रायेल लोरकुन पस्तेमायाना अनि पापतुन मापि केविर इन्जोर परमेस्वर ओनेय प्रबु अनि पिसिहवाल आस ठहरे किस आपुना तिन्दान कयबासा उपिहतुर।

³² इव पोल्लोता माक अनि परमेस्वर आपुना आग्यातुन मानेमान्तोर ओरकुन हिता पवित्र आत्मा वने गवाह मन्तोर।”

³³ इद केन्जचुन हजोर सभातुन पकाय होंग आस ओरकुन हव्काना इच्चा कितुर।

³⁴ मति मूसाना नियमतुन करिहवाल सबोय लोकुरक मानवाले मतोर गमालियेल पोरोयतोर वरोर परीसि मानेय ओर सभातिगा नितस येसुना चेला लोकुरकुन हुडुक बेरा साटि बाहरो ओयाना आग्या हितुर।

³⁵ अनि ओर असा ओरकुन इतुर, “हे इस्रायेलोरक, निमाट बाताले येरक मानेयकनासंग कियाना इच्चा किन्तोरिट, ते सोबाय विचार किस किम्ट।

³⁶ बाक्याकि इव दियाता पहले थियुदास पोरोयतोर वरोर मानेय नना वने बोरे आन्दान इदाम इन्ज तेदितुर, अनि नालुंग नुहकना हेरे लोकुरक ओनासंग मिलेमातुर; मति ओन हव्कतुरक अनि बचोक लोकुरक ओन मानेमान्दुरक ओरक सबोय हिके-होके आस नाश आतुरक।

³⁷ ओना पजा गलीलितोर यहुदाल जनगणनाता दियाते प्रगट आतुर अनि हुचुलोर लोकुरकुन आपुना बासा कितुर, ओन वने हव्कतुरक अनि बचोक लोकुरक ओन मानेमान्दुरक ओर सबोय लोकुरक हिके-होके आतुरक।

³⁸ इन्जोर येरक मानेयकताल लके मन्ट अनि येरक मानेयकुन ओरा बुतो साटि तासिम बाक्याकि येरा इद योजना या इद बुतो मानेयनिकेडाल मन्ता ते ओद बुतो आपुनास नाश आयार;

³⁹ मति ओद परमेस्वरनिकेडाल मन्दार ते अदेन निमाट नाश किया परविट अनि निमाट परमेस्वरतुन विरोद केवालोरक इदाम ठहरे मायकिट!” इन्जोर इन्तोर।

⁴⁰ असके ओरक ओना पोल्लो मानेमातुरक; अनि येसुना खास चेलालोरकुन केयस हाहितुरक अनि येसुना पोरोयते असा बोवे पोल्लोंग केमाट इन्जोर आदेस हिस तासितुरक।

⁴¹ असके माक येसुना पोरोयते अपमान आयान साटि योग्य ठहरे मातोम इन्जोर ओरक गिरदा आस यहुदि लोकुरा हजोर सभाता मुनेटाल हतुरक।

⁴² असा ओरक दरोज प्रार्थना लोतिगा अनि लोहक लोहक हन्जुन उपदेश कियाना अनि येसुये मसि आन्दुर इद सुसमाचार वेहाना रोमोर आतुरक।