बुतोंग 27 - Muria Far Western

पोलुसना रोमि यात्रा

¹ माक जहाजते इट्टलि प्रदेशता रोमि सहेरतिगा हन्दाना इन्जोर निश्चित कितोम असके ओरक पोलुस अनि हुचुलोर असा कयदिलोरकुन वने ओगुस्तुसना सयनिक दलतोर वरोर अदिकारि युलियुसना कयदे सोपे कितुर।

² माक अद्रमुत्तियु सहेरताल वास मता उन्दि जहाजतिगा अन्जतोम। ओद जहाज आसिया प्रदेशता टका हेरेटाल हन्वाल मता। माक ओद जहाजते हन्दानपा मकिदुनिया प्रदेशता तिस्सलुनिका सहेरतोर अरिस्तुकुरस वने मावासंग मतोर।

³ दुसरो दिया माक सिदोन सहेरतिगा अवतोम अनि युलियुस पोलुसिन दया किस आपुना गोतियालोरा हेरे हन्ज ओरा पाहुन्चार येताना परवांगि हितुर।

⁴ पजा माक अगडाल पसियतोम। वळिय मावा जहाजता विरोद वासोर मता इन्जोर माक सयिप्रस टापुता टका हेरेटाल हतोम।

⁵ अनि किलिकिया अनि पंफुलिया प्रदेशता हेरेटाल समुद्रतिगाडाल आस लूसिया प्रदेशता मूरा सहेरतिगा रयतोम।

⁶ अगा सयनिक दलता अदिकारि सिकन्दरियाताल उन्दि जहाज इट्टलि हन्दानपा मिलेमातु, अनि ओर माकुन ओद जहाजतिगा उपिहतुर।

⁷ माक पकाय दियांगवनाह जहाजते हुस्तोय हुस्तोय हन्ज कठिनताते कनिदुस नगरता मुने अवतोम। वळिय माकुन मुने हन्दिला हेवो आन्दु इन्जोर समुद्र नडुम मन्ता क्रेते टापुता टका हेरेटाल सलेमोने पोरोयता जागाता हेरेटाल मुने आस हतोम।

⁸ अनि अदेना टका हेरेटाल-हेरेटाल कठिनताते हन्जुन क्रेते टापुता जहाज रोमाना शुभ जागा पोरोयता उन्दि जागातिगा अवतोम। लसया सहेर अगडाल हेरे मता।

⁹ इदाम पकाय दियांग आतुंग अनि यहुदि लोकुरा उपासता दियांग वने पुरा आस मतांग। पकाय खराब मोसमता कारण ओद महिनांग जहाजते हन्दाना दोखा आन्दु इन्जोर पोलुस ओरकुन:

¹⁰ “हे लोकुरक इद यात्रा पकाय सन्कट अनि नाश मन्ता इन्जोर नना हुळान्तोना। जहाज अनि जहाजता सबोय माल नुकसान आयार। अनि मावा जिवाता वने नाश आयवाल मन्ता” इदाम इन्ज ओरकुन समजेह कितुर।

¹¹ मति सयनिक दलता अदिकारि पोलुसना पोल्लोताल कप्तान अनि जहाजतोर मालकाना पोल्लोनुंग हजोर मानेमातुर।

¹² जहाज रोमाना शुभ जागा पोरोयता समुद्र टकाता जहाज रोमाना ओद जागा पिनिता बेरा मन्दान साटि सोबाय हिले आसि, इन्जोर अगडाल जहाजते बोदे रितिते आय परारते फिनिक्स अवस पिनिता दियांग अगा मनका इदाम ओराकेडाल पकायलोरक विचार कितुरक। फिनिक्स क्रेतेता उन्दि जहाज रोमाना जागा मता, ओद जागा दक्षिण-पश्चिम अनि उत्तर-पश्चिम रन्डास दिसाता मुने मता।

समुद्रतिगा हूरेमाटियाल वळिय

¹³ दक्षिण भागताल वळिय हुस्तोय हुस्तोय वान्दु असके आपुना विचार पुरा आत इन्जोर हुळस ओरक जहाज रोमाना कचि ताहच क्रेते टापुता टकाता हेरेटाल जहाजते हन्दिला लागतुरक।

¹⁴ मति हुडुक बेराता पजा “युरिकुलिन” पोरोयता उन्दि पकाय हजोर हूरेमाटियाल वळिय जहाजते विरोद वातु।

¹⁵ हूरेमाटियाल वळिय जहाजतिगा वातु असके जहाज मुने हन्दिला परो आतु इन्जोर माक जहाजतुन वळियता बराबर हन्दिला हितोम।

¹⁶ पजा कोवदा पोरोयदा उन्दि हुळिला टापुता टकातिगा माक जहाजतुन हुस्तोय हुस्तोय मुने आस जहाजतासंगे मता हुळिला डोंगातुन पकाय तकलिपते आपुना काबुते कितोम।

¹⁷ पजा जहाज ताकिहवालोरक जहाजतासंगे मन्ता ओद हुळिला डोंगातुन ताहच जहाजता पोरो इरस मोरोसते जहाजसंग दोहतुरक, अनि सुरतिस पोरोयता समुद्र टका हेरे हन्ज जहाज हिरकमाकि इद वरेते जहाजता दोहता पळदातुन रेहचुन वळियता बराबर जहाज हन्दिला हितुर।

¹⁸ हूरेमाटियालते माक समुद्रतिगा पकाय होले मास वलियतोम इन्जोर दुसरो दिया जहाजताल माल हरचिला लागतुरक।

¹⁹ अनि तिसरो दिया ओरक आपुना कयदे जहाजता पळदा वने हरचितुरक।

²⁰ पकाय दियांगवनाह पोळद, हुकोंग दिसोंग आतुंग अनि पकाय हूरेमाटियाल वळिय वान्दु इन्जोर मावा पिसाना सबोय आशा हन्जोर मता।

²¹ ओरक पकाय दियांगवनाह उपास मतोरक। असके पोलुस ओरा नडुम नितस इतुर: “हे लोकुरक निमाट नावा पोल्लो मानेमायिला पहाजे आस मता। क्रेतेताल जहाजते वायो आस मनेरोम ते इद सन्कट वायो आस मनवार।

²² मति इदेक हिमते मन्ट इन्जोर नना विनन्ति किन्तोना, बाक्याकि केवल जहाजतुन तासि मियागाडाल बोनाय जिवातुन नुकसान आयो आयार।

²³ बाक्याकि नना आरादना किन्तोना अनि नना सेवा किन्तोना ओर परमेस्वरनोर दूत होनेटा नरका नावा हेरे वास इतुर:

²⁴ ‘हे पोलुस, वरियमा! निमा हजोर राजालना मुने जरुर नितकि। हुळा, नियासंग यात्रा कियाला आतोरक सबोय लोरकुन परमेस्वर निकुन हितोर।’

²⁵ इन्जोर हे गोतियालोरक, हिमते मन्ट, बाक्याकि स्वरगदूत नाकुन इता ओद पोल्लो अदामे आयार इन्जोर नना परमेस्वरनिगा विस्वास किन्तोना।

²⁶ मति माकुन समुद्र नडुमता उन्दि टापुता टकातिगा हन्जुन रोमिला लागार।”

जहाज उरंगान्ता

²⁷ चवदावो नरका वातु, अनि माक अन्द्रिया समुद्रतिगा जहाजते नेस्क वलियसोर मतोम असके अरदो नरकाता हेरे जहाज ताकिहवालोर माक बोदे देशता हेरे अवतोम इन्जोर अन्दाजते पुतुरक।

²⁸ समुद्र बचोन खोल मन्ता इन्जोर मोरोसतुन उन्दि कचि दोहच काहतुर असके लगभग सदतिस मीटर लाटि खोल मता इन्जोर हुळतुरक। अनि हुडुक बेराता पजा ओरक असा काहतुर ते लगभग सताविस मीटर लाटि समुद्र खोल मन्ता इदाम हुळतुरक।

²⁹ असके कल्कवाले जागातिगा आदळेमायाना वरेते ओरक जहाज रोमाना साटि मन्ता नालुंग कचि जहाजता परके वाटतुरक अनि सकार आयाना साटि प्रार्थना कियाला लागतुरक।

³⁰ मति जहाजतुन ताकिहवालोरक जहाजताल पसियस विताना कोसिस किन्दुरक, अनि जहाजता मुनेटा भागताल जहाज रोमान कचि वाटाना बहानाते जहाजता हुडिला डोंगा समुद्रतिगा रेहतुर।

³¹ असके पोलुस सयनिक दलता अदिकारि अनि सयनिक लोकुरकुन इतुर: “येरक जहाजतिगा मनो आयनुरक ते निमाट वने पिसिला परविट।”

³² असके सयनिक लोकुरक अदेना मोरोस कदियस जहाजता हुडिला डोंगातुन अरिहचितुरक।

³³ सकार आयवाल मता असके पोलुस सबोयलोरकुन जेवन कियान साटि विनन्ति कितुर: “निमाट हर हुळसोर हुळसोर करदे मतिट, नेन्ड चवदा दियांग आतुंग।

³⁴ इन्जोर निमाट बाताले तिन्जुन लाववाले आम्ट इन्जोर नना विनन्ति किन्तोना। बाक्याकि मियागाडाल बोनाय तलाता उन्दि कल वने नाश आयो आयार इन्जोर खरोय मन्ता।”

³⁵ इदाम इन्जुन ओर रोटि पयस सबोयना मुने परमेस्वरना धन्यवाद किसुन किळिहच तिन्दिला लागतुर।

³⁶ असके ओरक सबोयलोर हिमत किस जेवन कियाला लागतुरक।

³⁷ माक सबोय लोकुरक मिलेमास जहाजतिगा रन्ड नुहक च्याहत्तर लोकुरक मतोम।

³⁸ ओरक जेवन किस ओरा पोटा पन्जतु असके गोहकुन समुद्रतिगा हरचिस जहाजतुन हलको कियाला लागतुरक।

³⁹ पोळद पसियत असके ओरक ओद देश बोद मन्ता इन्जोर पुनोर आतुरक, मति समुद्रता उन्दि टका हुळतुरक अनि आय परारते ओद टकातिगा जहाजतुन ओयकाट इन्जोर विचार कितुरक।

⁴⁰ असके ओरक जहाज रोमान कचि लेहच समुद्रतिगा तासितुर अनि ओदे बेरा जहाजता पळदातुन दोहच मता ओद मोरोसतुन लेहच वळियता मुने पळदा चळेहकिस टकातिके हन्दिला लागतुरक।

⁴¹ अनि जहाज मुने हन्ज रन्डास समुद्र जोळेमान्ता टकातिगा आदळेमातु। जहाजता मुनेटा भाग तोळियतिगा हिरक्स अदेना ताकाना बन्द आतु अनि पकाय लाववाले पळवाहते जहाजता परकेडा भाग उरंगिला लागतु।

⁴² असके कयदि लोकुरकनिगा बोरे नरियसोर पसियस हन्माकिर इन्जोर सयनिक लोकुरक ओरकुन हव्कस वाटाना विचार कितुरक।

⁴³ मति सयनिक दलता अदिकारि पोलुसतुन पिसहाना इच्चाते ओरा विचारताल रोमिहतुर। अनि नरिय परान्तोर ओरक पहले डेयस टकातिगा हनिर।

⁴⁴ अनि पिसतोर लोकुरक पाटिंग पोरो अनि जहाजता बोदे चिजतुन पयस पसियस हनिर इन्जोर इतुर। इदाम सबोय लोकुरक पिसियस टकातिगा अवतोम।