बुतोंग 25 - Muria Far Western

राजपाल फेस्तुसना मुने पोलुसना चवकसि किन्तोर

¹ फेस्तुस यहुदि प्रदेशतोर राजपाल आतुर मून्ड दियाना पजा कयसरिया सहेरताल येरुसलेमतिगा हतुर।

² असके मुक्याल याजकलोरक अनि यहुदितोर मुक्याल लोकुरक ओना मुने वास पोलुसना विरोद केस कितुर।

³ हरितिगा मकस मन्जुन पोलुसिन हव्काना साटि ओरक डाव किस मतोरक इन्जोर दया किस ओन येरुसलेमतिगा ततिला पहाजे इदाम ओनाके विनन्ति कितुर।

⁴ फेस्तुस उत्तर हितुर: “पोलुसिन कयसरियातिगा केपसोर मन्तोर, अनि नना अगा सान्डेय दाका।

⁵ मियागा अदिकारि लोकुरक नावासंग वायिर अनि येर मानेय बोदे खराब बुतो कितोर ते ओनागा दोष लावे केविर” इन्जोर उत्तर हितुर।

⁶ फेस्तुस आठ-दहा दियांग येरुसलेमतिगा ओरासंग मन्ज ओर कयसरियातिगा मलस हतुर, अनि दुसरो दिया न्याय सिंहासनतिगा उदस पोलुसतुन तताना आग्या हितुर।

⁷ पोलुस वातुर असके येरुसलेमताल वास मतोर ओरक यहुदिलोरक ओना हेरे-गुरे नितस ओना विरुद पकाय दोष लावे कितुरक।

⁸ मति पोलुस ते उत्तर हितुर: “नना यहुदिलोरा नियमता अनि मन्दिरता अनि हजोर राजाना विरोदते बोदे गुन्हा केवोन” इन्जोर उत्तर हितुर ते अदेना सबुतता यहुदि अदिकारि लोकुरक हियाला परोर आन्दुरक।

⁹ असके फेस्तुस यहुदिलोरकुन गिरदा कियाना इच्चाते पोलुसतुन पुच्चेमातुर: “येरुसलेमतिगा हन्जुन अगा नावा मुने इद पोल्लोता बारेते निया न्याय आयि इदाम निया इच्चा मन्ता बहे?”

¹⁰ अदेन पोलुस उत्तर हितुर: “नना हजोर राजाना न्याय सिंहासन मुने नितितोना, अगाय नावा न्याय आयिला पहाजे। नना यहुदिलोरा बोदे गुन्हा केवोन, इद निमा वने बेस पुन्तोन।

¹¹ नना गुन्हेगार अनि हव्कस वाटाना योग्य बोदे बुतो कितोना ते नना हायान साटि तयार मन्तोना, मति येरक नावागा दोष लावे किन्तोरक ओद पोल्लो खरोय मन्ता इदाम ठहरे मायो आयार ते बोरे नाकुन ओरा कयदे सोपेकिया परोर।

¹² नना हजोर राजाना हेरे असा न्याय कियाना सन्दि तलकान्तोना” इन्जोर पोलुस इतुर। असके फेस्तुस सभाता विचार येतस उत्तर हितुर: “निमा हजोर राजान हेरे न्याय तलकतोन ते हजोर राजाना मुने दाकि।”

राजाल अग्रिपाना मुने पोलुस

¹³ हुचुक दियांग आतपा अग्रिपा राजाल अनि ओना हेलाळ बिरनिके कयसरियातिगा वास फेस्तुसतुन मिलेमातुर।

¹⁴ ओरक पकाय दियांग अगा मतपा पजा फेस्तुस पोलुसना बारेते राजान वेहतुर, “फेलिक्स जेहलतिगा बन्दि इरस तासिस हतोर वरोर मानेय इगा मन्तोर।

¹⁵ नना येरुसलेमतिगा मन्दान असके मुक्याल याजक अनि यहुदि अदिकारि लोकुरक नावा हेरे वास ओना विरोद दोष लावेकिस ओन दन्डता आग्या हेविर इन्जोर इच्चा कितुर।

¹⁶ मति केस केवालना मुने वास गुन्हा केवाल आपुना पोरो किता गुन्हाता बारेते उत्तर हियाना सन्दि गुन्हा केवालतुन पुटाना मुने बोनाय दन्ड साटि सोपेह कियाना रोमि लोकुरा रिति हिले इन्जोर नना यहुदि अदिकारिलोकुरकुन उत्तर हितान।

¹⁷ इन्जोर ओरक इगा जमा आतुरक असके नना बाताले बेरा केवोन आस दुसरोय दिया न्याय सिंहासन पोरो उदस ओर मानेयतुन तताना आग्या हितान।

¹⁸ ओनागा दोष लावे केवालोर वळकान साटि नितितुर असके ओरक नना विचार किन्दान बोदे दोष ओनागा लावे केवाय,

¹⁹ केवल ओरा दरमता बारेते अनि बोर जितो मन्तोर इदाम पोलुस इन्तोर बोरे हातोर मानेय येसुना बारेते ओरा अनि येरा विवाद आतु।

²⁰ असके येना चवकसि बदाम कियाना इद नना सोबाय पुनोन इन्जोर नना ओन पुच्चेमातान येरुसलेमतिगा हन्जुन अगा इद पोल्लोता बारेते निया न्याय आयि इदाम निया इच्चा मन्ता बहे?

²¹ मति पोलुस ओना न्याय हजोर राजाना हेरे आयि इदाम विनन्ति कितुर असके ओन हजोर राजाना हेरे लोहोन अचोनवनाह जेहलतिगा इराट इन्जोर नना आग्या हितान।”

²² असके अग्रिपा राजाल फेस्तुसतुन इतुर, “नना वने ओर मानेयना केन्जाना इच्चा किन्तोना।” अनि ओर इतुर, “निकुन ओन नाळ केन्जिला पुटार।”

²³ दुसरो दिया अग्रिपा अनि ओना हेलाळ बिरनिके सयनिक दलतोर मुक्य अदिकारिलोरक अनि सहेरतोर मुक्याल लोकुरासंग न्याय कियाना सभा भवनतिगा पकाय सोबाय तयारि किस अवतुरक। असके ओरक पोलुसतुन तरीर इन्जोर फेस्तुस आग्या हितुर।

²⁴ फेस्तुस इतुर: “हे अग्रिपा राजा अनि मावासंग इगा वातोरक हे सबोय मानेयक! येर मानेयतुन निमाट हुळान्तोरिट बहे। सबोय यहुदिलोरा दल, येरुसलेमतिगा अनि इगा वने केयस-केयस ओर जितो मन्दाना उचित हिले इन्जोर नाकुन विनन्ति कितुरक ओद येर मानेयना विरोदते मता।

²⁵ ओर हव्काना योग्य इदाम बाताले केवोर इदाम नना पुतान; अनि ओर आपुनास हजोर राजाना हेरे न्याय तलकतुर ते नना ओन हजोर राजान हेरे लोहाना निर्णय कितान।

²⁶ ओना बारेते हजोर राजान बाताल कोटका इन्जोर नना पुनोन; इन्जोर नना ओन मिया मुने, विशेषाल हे अग्रिपा राजा निया मुने ततोना। अनि चवकसि कितपा पजा ओना बारेते बाताले कोटिला नाकुन पुटार।

²⁷ बाक्याकि कयदितुन हजोर राजान मुने लोहानपा ओनागा बोव दोष लावेकितुर अदेना बारेते वेहाना सोबाय मन्ता इन्जोर नाकुन लागता।”