बुतोंग 20 - Muria Far Western

मकिदुनिया, युनान, अनि त्रोवासतिगा पोलुस

¹ इफिसुस सहेरता गळबड रोमतु असके पोलुस चेलालोरकुन केयस ओरकुन हिमत हिस ओराताल विदा आस मकिदुनिया प्रदेशतिगा हतुर।

² ओव सबोय प्रदेशताल हन्जुन विस्वासि लोकुरकुन पकाय उत्साहित किस ओर युनान प्रदेशतिगा वातुर।

³ मून्ड महिनांग मन्ज ओर अगडाल जहाजते सिरिया प्रदेशतिगा हनवाल मतोर असके यहुदि अदिकारि लोकुरक ओना घात कियान साटि योजना कितुरक, इन्जोर मकिदुनियाताल मलस हन्दाना इदाम ओर निश्चय कितुर।

⁴ बिरियातोर पुरोस पोरोयतोर मानेयना मरि सोपत्रुस अनि तिस्सलुनिकियातिगाडाल अरिस्तरखुस अनि सिकुन्दुस, अनि दिरबेतोर गयुस अनि तिमुथियुस अनि आसियातोर तुखिकुस अनि त्रुफिमुस आसिया प्रदेशवनाह ओनासंग हतुरक।

⁵ ओरक पोलुसना मुने हन्जुन त्रोवास सहेरतिगा मावा साटि हरहुळस मतोरक।

⁶ अनि माक अखमिरि रोटिता हनुम दियांगना पजा फिलिप्पिताल जहाजते सयुंग दियाते त्रोवास सहेरतिगा ओरा हेरे अवतोम, अनि सात दियांगवनाह अगाय मतोम।

त्रोवासतिगा युत्तिखुसतुन जितो कियाना

⁷ हपताता पहले दिया मन्जे इतवार दिया माक रोटिंग किळहान साटि उन्दि जागा जमा आतोम असके पोलुस दुसरो दिया त्रोवासताल हनवाल मतोर इन्जोर ओर वळकिला लागतुर अनि अरदो नरकावनाह ओर वळकसोर मतोर।

⁸ माक उन्दि आस जमा मतोम ओद पोरोडा माळिता खोलितिगा पकाय टिवरिंग पतियसोर मतांग।

⁹ अनि युत्तिकुस पोरोयतोर वरोर लयोर खिळकितिगा उदस पकाय हून्जतुर। पोलुस पकाय बेरावनाह वळकसोर मतोर असके युत्तिकुस हुसकाळते तिसरो माळिताल अरतुर अनि लोकुरक ओन ततानपा हास मतोर।

¹⁰ असके पोलुस अडिय रयस ओन टुन्डतुर अनि ओन आपुना छातितिगा लावेकिस इतुर, “वरियमाट, येर जिवित मन्तोर।”

¹¹ अनि पोलुस पोरो हन्जुन रोटि किळिहस तितुरक अनि कोर कुसाना बेरावनाह पोल्लोंग किसोर मतोर पजा ओर सबोय लोकुरकुन धन्यवाद इन्ज हतुर।

¹² अनि ओरक ओर लयोरतुन जितो आस ओना लोन ओतुरक अनि ओरकुन पकाय शान्ति आतु।

पोलुस त्रोवासताल मिलेतुस दान्तोर

¹³ अगडाल माक पोलुसना मुने अस्सुस हन्दाना साटि जहाजते उदितोम। पोलुस त्रोवास सहेरताल अस्सुस सहेरवनाह सळकते वासुन अस्सुसताल जहाजते उदानुर इन्जोर ठहरे किस मतोर।

¹⁴ ओर अस्सुसतिगा माकुन मिलेमातुर असके माक ओन जहाजतिगा उपिहच समुद्र नडुम मता मितुलेने सहेरतिगा वातोम।

¹⁵ अगडाल जहाजते माक दुसरो दिया समुद्र नडुम मता खियुस टापुता हेरे अवतोम, अनि अगडाल दुसरो दिया सामुस टापुतिगा अवतोम, असा दुसरो दिया मिलेतुस सहेरतिगा वातोम।

¹⁶ आसिया प्रदेशतिगा पकाय बेरावनाह मनका इन्जोर योजना किस इफिसुस सहेरता हेरेटाल हन्दाना साटि पोलुस विचार कितुर बाक्याकि आय परारते पिन्तिकुस्त हनुम दियाते येरुसलेमतिगा मन्दाना इन्जोर ओर सान्डे हन्दाना विचार कितुर।

इफिसुस सहेरता मसिलोकुरा सभाता मुक्या लोकुरकुन पोलुसनिकेडाल उपदेश

¹⁷ मिलेतुस सहेरताल पोलुस इफिसुस सहेरतिके उन्दि सन्देश लोहच मसिलोकुरा सभाता मुक्या लोरकुन केयतुर।

¹⁸ अनि अगडाल मसिलोकुरा सभाता मुक्या लोकुरक ओना हेरे वातुर असके ओरकुन इतुर: “नना आसियातिगा अवतान ओद दियाताल सबोय बेरा मियासंग बदाम मतान इन्जोर निमाट पुन्तोरिट।

¹⁹ पकाय नम्रताते अनि कनेळक अरहिच-अरहिच यहुदि लोकुरा खराब योजनाता कारण नावागा वास अरता पकाय तकलिपतासंग नना प्रबुना सेवा किसोरे मतान।

²⁰ अनि बोव बोव पोल्लोंग मिया फायदाता मतांग, अवेहकुन सबोय मिया साटि वेहतान। अनि प्रबु येसुना बारेते लोकुरा मुने वेहतान अनि नना लोहक लोहक वासुन येसुना बारेते मिकुन करिहतान।

²¹ यहुदि अनि यहुदि आयोर सबोय लोकुरक पस्तेमास परमेस्वरनिके मलस वायकिट अनि मावोर प्रबु येसुनिगा विस्वास कियाला पहाजे इन्जोर गवाहि हिसोर मतान।

²² मति इदेक नना पवित्र आत्माता आग्याता अनुसार येरुसलेम दान्तोना अनि अगा नाकुन बाताल-बाताल आयार इन्जोर नना पुनोन।

²³ अगा केवल बन्दन अनि पकाय तकलिप निया साटि तयार मन्ता इन्जोर पवित्र आत्मा सबोय नाटेनिगा गवाहि हिस-हिस नाकुन इन्तोर।

²⁴ मति नना नावा जिवातुन बाताले किमत मन्ता इदाम विचार केवोन। मति प्रबु येसु नाकुन निवळे किता ओद बुतो पुरा कियाना मुक्य पोल्लो मन्ता। परमेस्वरना हजोर दयाता सोबाता पोल्लो सबोय लोकुरकुन वेहान साटि प्रबु येसु नाकुन निवळेकितोर ओद बुतो पुरा कियाना केवल नावा लक्ष मन्ता।

²⁵ मति मियागा परमेस्वरना राज्यता बारेते वेहचोर वलियान्तोना, मति नाकुन निमाट असा हुळवि आयकिट इदाम नना पुन्तोना।

²⁶ इन्जोर मियागा बोरे मसिनिगा विस्वास केवाय हायकिट ते ओना नतुरते निरदोष मन्तोना इन्जोर नना नेटा दिया मिकुन गवाहि हिस इन्तोना।

²⁷ बाक्याकि परमेस्वरना सबोय योजना मकिहिच इरोन आस मिकुन पुरा रितिते नना वेहतोना।

²⁸ इन्जोर आपुनतुन अनि बेळांग लेहका मन्ता मसिलोकुरा सबोय सभातुन चवकसि किम्ट। परमेस्वर आपुनोर मरिना नतुर हिस असतोर परमेस्वरना बेळांग लेहका मन्ता मसिलोकुरा सभातुन केपान साटि पवित्र आत्मा मिकुन अध्यक्ष ठहरे कितोर।

²⁹ नावा हतपा पजा ओव बेळानुंग मानेमायोर पकाय दुष्ट हुन्डराह लेहका मन्तोरक लोकुरक मियागा वायनुरक ओर बेळांगना पोरो बोदे दया केवोर आयनुरक इन्जोर नना पुन्तोना।

³⁰ चेलालोरकुन येसुना बदला आपुना परके कियान साटि मसिना बारेता खरोय पोल्लोतुन बदले केवालोरक मियागाडाल तेदानुरक।

³¹ इन्जोर इदाम लोकुरताल हुशार मन्ट! नना मून्ड वरसांगवनाह नरका-पलिंग किल्स-किल्स निमाट सबोयलोरकुन करियनाताल रोमहोन आतान इन्जोर आल्हाट।

³² मिकुन मसिना विस्वासते मजबुत कियाना अनि सबोय पवित्र लोकुरकुन परमेस्वर हिता वाचाता वारिस हिया परान्तोर ओर परमेस्वरनिगा अनि ओना दयाता पोल्लोतिगा नना इदेक मिकुन सोपे किन्तोना।

³³ नना बोनाय सोनो, चान्दि या सन्दराता लालुच केवोन।

³⁴ नावा अनि नावासंगवारि लोकुरा जरुरतुन पुरा कियान साटि नना इवे कयदे मेहनत कितान इन्जोर निमाट पुन्तोरिट।

³⁵ इदाम मेहनत किस जरुरि लोकुरकुन मदत कियाला पहाजे इन्जोर तोहान साटि सबोय पोल्लोतिगा नना मिकुन नमुना कितान। ‘येतानाताल हियाना पकाय धन्य मन्ता’ इदाम प्रबु येसु इतोर ओद पोल्लो नना मिकुन करिहतान।”

³⁶ इदाम वळकतपा पोलुस इफिसुस सहेरता मसिलोकुरा सभाता मुक्या लोकुरासंग मिन्डांग टेकेकिस प्रार्थना कितुर।

³⁷ असके ओरक सबोयलोरक पकाय किलतुरक।

³⁸ नावा तोडी निमाट असा हुळविट आयकिट इदाम पोलुस इन्ज मतोर, ओना ओद पोल्लोते ओरक पकाय दुःख आस पोलुसतुन टुन्डस पकाय चुमा कितुरक अनि ओरक पोलुसिन जहाजवनाह अविहचितुरक।