बुतोंग 19 - Muria Far Western

इफिसुस सहेरतिगा पोलुस

¹ अपुल्लोस कुरिन्थुस सहेरतिगा मतोर असके पोलुस मटा देशताल हन्जुन इफिसुसतिगा वातुर। अगा हुचुलोर चेलालोरकुन हुळस,

² “बाताल निमाट विस्वास येताना बेरा पवित्र आत्मा पुटतु?” इन्जोर ओरकुन पुच्चेमातुर। मति ओरक “माक ते पवित्र आत्मा मन्तोर इदाम वने बसकेय केन्जोम!” इन्जोर पोलुसिन उत्तर हितुरक।

³ अनि पोलुस ओरकुन पुच्चेमातुर “ते पजा बोद रितिता बपतिस्मा निमाट येतितोरिट?” इन्जोर पुच्चेमातुर। अनि “युहन्नाना बपतिस्मा” इन्जोर ओरक उत्तर हितुर।

⁴ असके पोलुस इतुर, “बपतिस्मा हेवाल युहन्नाल नावा पजा वायवाल मन्तोर ओनागा मन्जे येसुनिगा विस्वास कियाकिट इन्जोर इन्जुन पस्तेमायानाता बपतिस्मा हितुर।”

⁵ इद केन्जचुन ओरक प्रबु येसुना पोरोयते बपतिस्मा येतितुरक।

⁶ पोलुस ओरा पोरो कय इरतुर असके पवित्र आत्मा ओरागा रयतु, अनि ओरक अन्जान बोलि वळकाना अनि परमेस्वरना पोल्लो वेहाना लागतुरक।

⁷ येरक सबोय बारा मानेयक मतोरक।

⁸ ओर यहुदि लोकुरा समाज मन्डलितिगा हन्ज परमेस्वरना राज्यता बारेते यहुदि लोकुरासंग वाद-विवाद किस ओरकुन समजेह किसोर मून्ड महिनांगवनाह बिना वरेते वळकसोर मतोर।

⁹ मति हुचुलोर लोकुरक कटोर आस ओना पोल्लो मानेमायोर आस सबोय लोकुरा मुने इद हरितुन खराब इन्दिला लागतुरक असके ओर यहुदि लोकुरा समाज मन्डलितुन तासितुर। अनि चेलालोरकुन ओनासंग किस दरोज तुरन्नुसता शाळातिगा परमेस्वरना राज्यता बारेते वाद-विवाद किसोर मतोर।

¹⁰ रन्ड वरसावनाह इदामे आसोर मता इन्जोर आसिया प्रदेशतिगा मन्वालोरक सबोय यहुदि अनि युनानि लोकुरक प्रबुना पोल्लो केन्जतुरक।

¹¹ परमेस्वर पोलुसना कयदे पकाय लावदांग चमत्कारता बुतोंग तोहन्दुर।

¹² ओना मेन्दुलतिगा दुपटा अनि गमचा ओना मेन्दुलताल इटस बिमार लोकुरकनिगा वाटिन्दुरक असके ओरा बिमारि बेस आन्दु अनि दुष्टात्मांग ओरागाडाल पसियस हन्दुंग।

^13-14 मति हिके होके वलियस दुष्टात्मातुन पसिहन्दुर हुचुलोर यहुदि होदाह लोकुरक मतोरक। स्विकवा पोरोयतोर वरोर यहुदि महा याजकनोर सात मरक इदामे किन्दुरक। ओरक पोलुस वेहता येसु मसिना पोरोयते नना मिकुन शपथ हिन्तोना इदाम इन्जुन दुष्टात्मा पयस मतोर ओर लोकुरा पोरो प्रबु येसुना पोरोय उपयोग किस दुष्टात्मातुन पसिहलाय कोसिस कितुर।

¹⁵ मति दुष्टात्मा ओरकुन: “येसुन नना पुन्तोना, अनि पोलुसतुन वने पुन्तोना, मति निमाट बोर आन्दिट?” इन्जोर पुच्चेमातु।

¹⁶ अनि दुष्टात्मा मता ओर मानेय ओरागा टुन्डस ओरकुन आपुना वशते कितुर इन्जोर ओरक होदाह लोकुरक नंगाह अनि जखमि आस ओद लोताल पसियस वितितुरक।

¹⁷ इद पोल्लो इफिसुसतिगा मन्वालोर सबोय यहुदि अनि युनानि लोकुरक वने पुतुरक, अनि ओरक सबोयलोरकुन वरे आतु, अनि प्रबु येसुना पोरोयता महिमा आतु।

¹⁸ अनि विस्वास कितोर लोकुरकनिगाडाल पकाय लोकुरक मसिलोकुरा सभाता मुने वास आप आपुना किता खराब बुतोतुन मानेमास तासितुरक।

¹⁹ होदाल बुतो केवालोरनिगाडाल पकाय लोकुरक आपुना आपुना पुस्तकिंग जमा किस सबोय लोकुरा मुने पोतिहसितुरक, अनि अवेहनांग किमत गिन्ति किस हुळतुरक असके पन्नास हजार चान्दिता डबुंग बराबर आतु।

²⁰ इद रितिते प्रबुना पोल्लो लावदे अनि मजबुत आस फयलेमासोर हतु।

रोम हन्दाना साटि पोलुसना योजना

²¹ इव पोल्लोंग आतुंग असके पोलुस मकिदुनिया अनि अखिया प्रदेशताल आसोर येरुसलेम दाका इन्जोर मन्दे योजना कितुर। अनि “अगा येरुसलेम अवतपा पजा नाकुन रोमि सहेरतुन वने हुळाना जरुरि मन्ता” इन्जोर वने पोलुस विचार कितुर।

²² तिमुथियुस अनि इरास्तुसतुन पोलुसना सेवा केवालोर मतोर। इन्जोर ओरकुन मकिदुनिया प्रदेशतिगा लोहचितुर अनि पोलुस हुचुक दियांग आसिया प्रदेशतिगा मतोर।

इफिसुस सहेरतिगा मसिलोकुरा विरोद पकाय तकलिप

²³ अनि पोलुस आसिया प्रदेशतिगा मन्दाना बेरा मसि विस्वासता बारेते इफिसुस सहेरतिगा पकाय गळबड आतु।

²⁴ देमेत्रियुस पोरोयतोर वरोर सोनार इफिसुस सहेरतिगा मतोर। ओर अरतिमिस देविना मन्दिरता हुळिला रुप चान्तिते बनेहकितुर। ओद बुतो केवालोरक कारागिरलोरक इदेनते पकाय डबुंग कमेय कितोरक।

²⁵ देमेत्रियुस ओनासंगे बुतो केवालोरक अनि इदामे चिज बनेकिन्तोर दुसरो कारागिर लोकुरकुन जमा कितुर: “हे लोकुरक, इद बुतोते माकुन पकाय डबुंग पुटान्तांग इन्जोर निमाट पुन्तोरिट।

²⁶ मति पोलुस पोरोयतोर येर मानेय बाताल किन्तोर इन्जोर निमाट हुळाट! अनि ओना पोल्लो निमाट ध्यान किस केन्जाट! मानेयना कयदे बनेकिता बोदे मूरति परमेस्वरे हिले इदाम लोकुरकुन इन्जुन केवल इफिसुस सहेरतिगाय आयो मति सबोय आसिया प्रदेशतिगा सबोय लोकुरकुन इदाम समजेह किस लोकुरकुन भळकेह कितोर।

²⁷ पोलुसना इद पोल्लोता कारण सबोय लोकुरक मावा बुतोता विरोद आयनुरक। केवल इचोने आयो मति हजोर पेन अरतिमिस देविना मन्दिरतुन लोकुरक तुच्च समजेमायनुरक, अनि सबोय आसिया अनि सबोय दुनिया आरादना किन्तोरक ओद अरतिमिस देविना महत्व वने इदाम नाश आयार” इन्जोर इतुर।

²⁸ पोलुसना बारेता इद पोल्लो केन्जुन लोकुरक पकाय होंग आतुरक अनि “इफिसिलोरा अरतिमिस हजोर देवि मन्ता!” इन्जोर लोकुरक पकाय जोरदे केयस केयस इन्दिला लागतुरक।

²⁹ अनि सबोय सहेरतिगा पकाय गळबड आतु। अनि पोलुसना संगवारि लोकुरक मकिदुनियातोर गयुस अनि अरिस्तारखुसिन पोलुसना विरोद होंग केवालोरक पयस उन्दि आस नाटकता थेटरतिके वितितुरक।

³⁰ पोलुस लोकुरा हेरे थेटरता लोपा हन्दाना विचार कितुर असके चेलालोर ओन हन्दिला हेवोर आतुरक।

³¹ आसियातोर अदिकारिनिगाडाल राज्यपाल वने ओनोर गोतियालोरक मतोर इन्जोर नाटकता थेटरतिगा हन्जुन दोखा ताहमाकिर इदाम ओरक ओना हेरे सन्देश लोहच विनन्ति कितुर।

³² अगा लोकुरकनिकेडाल हुचुलोरक बाताले केयन्दुरक अनि दुसरो लोकुरक दुसरो बाताले केयन्दुरक। सभातिगा पकाय गळबड आसोर मता, अनि पकाय लोकुरक ते माक बाताल साटि इगा जमा आतोरोम इन्जोर वने पुनोर आन्दुरक।

³³ असके यहुदिलोकुरक भीळता मुने नितिहिच मतोर सिकन्दरतुन भीळताल हुचुलोर लोकुरक वळकाना साटि प्रोत्साहन हितुरक। सिकन्दर कयदे इशारा किस भीळतुन कमेक कियाना इतुर बाक्याकि ओर भीळता मुने इद गळबडता कारण इन्दाना इच्चा किन्दुर।

³⁴ मति इफिसुसि सहेरतोर लोकुरक सिकन्दर यहुदि आन्दुर इन्जोर पुतुरक असके सबोयलोरक उन्दिय लेंगते “इफिसिलोरा अरतिमिस हजोर देवि मन्ता” इदाम रन्ड गन्टावनाह केयसोर मतोरक।

³⁵ असके सहेरतोर मन्त्रिलोर भीळतुन शान्त आयिला साटि इतुर: “हे इफिसुसतोर लोकुरक, इफिसिया सहेरतिगा मन्वालोरक हजोर देवि अरतिमिसना मन्दिर अनि जेयुस पोरोयता पेननिकेडाल अरता अरतिमिसना मूरतिता रक्षक किन्तोरक इन्जोर दुनियातोर सबोय लोकुरक पुन्तोरक।

³⁶ नना वेहता इव पोल्लोंग खोटाल मन्ता इदाम बोरे इन्कार किया परोर। इन्जोर निमाट शान्त मन्दिला पहाजे अनि बाताले कियाना मुने सोबाय विचार किम्ट।

³⁷ बाक्याकि येरक मानेयकुन निमाट ततोरिट ओरक मन्दिरतुन लुटे केवाल आयोर अनि मावा पेनता निन्दा केवालोर आयोर।

³⁸ मति देमेत्रियुस अनि ओनोर संगवारिह कारागिरलोरकुन बोनायसंग विवाद मन्दार ते ओरा साटि कोर्ट मन्ता। ओरक अगा हन्जुन वरोर दुसरोना बारेते कोर्टतिगा केस केविर।

³⁹ मति निमाट दुसरो बोदे समस्याता बारेते बाताले पुच्चेमायाना इच्चा किन्तोरिट ते सहेरता सभातिगा न्याय आयार।

⁴⁰ सहेरता इद गळबड साटि बोदे कारण हिले, इन्जोर रोमि अदिकारि लोकुरक इद गळबडता दोष मावागा लावेकियाना सन्दि मन्ता। रोमि अदिकारिलोकुरकुन इद भीळ आयानाता बारेते माक बोदे उत्तर हिया परोम।”

⁴¹ इदाम इन्जुन ओर सभातुन बन्द कितुर।