बुतोंग 18 - Muria Far Western

पोलुस कुरिन्थुस सहेरतिगा

¹ असके पजा पोलुस एथेन्स तासिस कुरिन्थुस सहेरतिगा वातुर।

² अगा ओन अक्विलास पोरोयतोर वरोर यहुदि मानेयिन मिलेमातुर। अक्विला अनि ओना मुत्ते प्रिसकिला इट्टलिताल हुचुक दियांग मुने कुरिन्थुस सहेरतिगा वास मतोर। ओना जनमा पुन्तुस प्रदेशतिगा आस मता। सबोय यहुदिलोरकुन रोमि सहेरताल पसियस हन्दाना इन्जोर रोमि देशता हजोर राजाल क्लवुदियुस आग्या हिस मतोर इन्जोर साटि ओरक इट्टलिताल पसियस वातोरक। पोलुस अक्विलास अनि प्रिसकिलान हुळिला ओरा लोन हतुर।

³ पोलुसना अनि ओरा बुतो उन्दिय मता इन्जोर ओर ओरासंग मन्ज बुतो कियाला लागतुरक, अनि ओरा बुतो तम्बु बनेहकियाना मता।

⁴ मति यहुदि लोकुरास सबोय पवित्र दियांग यहुदि लोकुरा समाज मन्डलितिगा हन्जुन वाद-विवाद किस यहुदि अनि युनानिलोरकुन वने मसिना बारेता परमेस्वरना सोबाता पोल्लो समजेह किन्दुर।

⁵ सिलास अनि तिमुथियुस मकिदुनियाता बिरिया नाटेनिकेडाल कुरिन्थुस सहेरतिगा पोलुसना हेरे वातुरक अनि पजा पोलुस तम्बु बनेहकियाना बुतो बन्द किस केवल मसिना सोबाता पोल्लो वेहान साटि सबोय बेरा मन लावे किस येसुये मसि आन्दुर इन्जोर गवाहि हिस यहुदिलोरकुन समजे कियाला पकाय कोसिस किसोर मतोर।

⁶ मति यहुदिलोकुरक विरोद अनि निन्दा कियाला लागतुरक असके ओर आपुनांग सन्दरांग झटकेकिस ओरकुन इतुर, “परमेस्वरताल मियागा वायवाल मन्ता दन्डता कारण केवल निमाटेय मन्तोरिट! नना दोषि हिलेन। नेटाल नना दुसरो जातितोर लोकुरा हेरे दाका” इन्जोर इतुर।

⁷ अनि ओर अगडाल पसियस ओर तितुस युस्तुस पोरोयतोर वरोर परमेस्वरना वरे इरवाल मानेयना लोन वातुर, ओना लोन यहुदि लोकुरा समाज मन्डलिता हेरे मता। ओर यहुदि मानेय आयोर आस मतोर।

⁸ असके यहुदि लोकुरा समाज मन्डलिता मुक्याल क्रिसपुस आपुना सबोय परिवारतासंग प्रबु येसुनिगा विस्वास कितुर, अनि कुरिन्थुस सहेरतिगा पकायि लोकुरक परमेस्वरना पोल्लो केन्जचुन मसिनिगा विस्वास किस बपतिस्मा येतितुरक।

⁹ प्रबु उन्दि नरका दर्शनता द्वारा पोलुसतुन इतुर: “वरियोन आस वळकसोर हन, कमेक मनमा।

¹⁰ नना नियासंग मन्तोना, अनि बोरे नियागा हमला किस निया नुकसान केवोर आयनुर, बाक्याकि इद सहेरतिगा नावोर पकाय लोकुरक मन्तोरक।”

¹¹ इन्जोर ओर कुरिन्थुस सहेरतिगा परमेस्वरना पोल्लो करिहसोर दिळ वरसाहवनाह मतोर।

आख्या प्रदेशता राजपालना मुने पोलुस

¹² आखया प्रदेशतिगा रोमि देशतोर राजपाल गल्लियो पोरोयतोर मतोर असके यहुदिलोकुरक उन्दि आस पोलुसना विरोद किस ओन न्याय कियाना साटि कोर्टतिगा तचुन इन्दिला लागतुरक,

¹³ “ओर मूसाना नियमता विरोद आस परमेस्वरना उपासना कियान साटि लोकुरकुन करहान्तोर” इन्जोर यहुदिलोकुरक इतुरक

¹⁴ पोलुस बाताले वळकवाल मतोर ते गल्लियो यहुदिलोरकुन इतुर, “हे यहुदिलोर इद बोदे अन्याय या दुष्टताता पोल्लो मन्वार ते नना मिया केन्ज मनेना इन्जोर उचित मता।

¹⁵ मति निमाट इन्तोरिट ओद पोल्लोंग केवल मिया यहुदि लोकुरा नियमता बारेता प्रश्न अनि वाद-विवाद मन्ता। इन्जोर इद समस्यातुन निमाट आपुना उपाय किम्ट बाक्याकि इव पोल्लोतुन न्यायि बनेमायाना नना इच्चा केवोन” इन्जोर इतुर।

¹⁶ अनि ओर ओरकुन न्याय खुर्चिता मुनेटाल पसिहसितुर।

¹⁷ असके सबोय लोकुरक यहुदि समाज मन्डलिता अदिकारि सोस्थिनेसतुन पयस न्याय केवाल गलियोना मुने हाहतुरक। मति गल्लियो इव पोल्लोता बाताले ध्यान केवोर आतुर।

पोलुस सिरिया प्रदेशता अन्ताकियातिगा मलस वान्तोर

¹⁸ पोलुस पकाय दियांगवनाह कुरिन्थुस सहेरतिगा मतुर। पजा कुरिन्थुस सहेरता विस्वासि लोकुरकुन धन्यवाद किस ओर प्रिसकिलाना अनि अक्विलासनासंग समुद्र टकाता किंख्रिया नाटेनिगा हतुर। अगा ओर परमेस्वरना मुने किता शपथ पुरा कितुर इन्जोर तोहान साटि आपुना तला टकल कितुर। अनि पजा ओर जहाजते सिरियातिगा हतुर अनि ओनासंग प्रिसकिल्ला अनि अक्विलास वने मतांग।

¹⁹ अनि पोलुस इफिसुसतिगा अवस अक्विलास अनि प्रिसकिलान अगा तासितुर, अनि ओर यहुदि लोकुरा समाज मन्डलितिगा हन्जुन येसुना बारेते यहुदिलोरासंग वाद कियाला लागतुर।

²⁰ अनि “मावासंग असा हुचुक दियांग मन” इन्जोर ओरक पोलुसिन विनन्ति कितुरक ते ओर स्विकार केवोर आतुर।

²¹ मति “परमेस्वर इच्चा कियानुर ते नना मिया हेरे असा वायका” इन्जोर इन्ज ओराताल विदा आतुर। असके ओर इफिसुसताल जहाजतिगा उदस हतुर।

²² अनि कयसरियातिगा रयस येरुसलेमतिगा हतुर अनि मसिलोकुरा सभातुन नमस्कार किस सिरिया प्रदेशता अन्ताकिया सहेरतिगा हतुर।

पोलुसना तिसरो बेरा येसुना सोबाता पोल्लो वेहान साटि हन्दाना

²³ पजा हुचुक दियांग पोलुस अन्ताकिया सहेरतिगा मन्ज ओर अगडाल पसियस गलातिया अनि फ्रूगिया प्रदेशतिगा हन्जुन सबोय चेलालोरकुन विस्वासते स्थिर किसोर वलियतुर।

इफिसुस नगरतिगा अपुल्लोस

²⁴ अपुल्लोस पोरोयतोर वरोर यहुदि इफिसुसतिगा वातुर। ओना जनमा सिकन्दरियातिगा आस मता, ओर पकाय करियतोर मानेय मतोर अनि पवित्र पुस्तकतुन बेस पुन्दुर।

²⁵ ओन प्रबुना हरिता बारेता सबोय शिक्षण पुटस मता अनि ओर केवल युहन्नाना बपतिस्माता पोल्लोतुन पुन्दुर ते वने ओर मन लावेकिस येसुना बारेते बेस बेस वेहिन्दुर अनि करिहन्दुर।

²⁶ ओर यहुदि लोकुरा समाज मन्डलितिगा हिमतते वळकिला लागतुर; अक्विला अनि प्रिसकिल्लानांग पोल्लोंग केन्जचुन अनि ओन आपुना लोन ओतुंग अनि परमेस्वरना हरि ओन असा बेस बेस वेहतुरक।

²⁷ ओर अगडाल अखाया प्रदेशतिगा हन्दाना निश्चय कितुर ते इफिसुस सहेरता मसि विस्वासि लोकुरक ओन सोबाय रितिते हिमत किस ओन मिलेमायिर इन्जोर आख्या प्रदेशता चेलालोरकुन पत्र कोटतुरक। अनि ओर आखाय प्रदेशतिगा अवतुर। ओर अगा अवस परमेस्वरना दयाते विस्वास कितोर ओर विस्वासि लोकुरकुन पकाय मदत कितुर।

²⁸ बाक्याकि ओर पवित्र पुस्तकताल पकाय सबुतता हिस येसुये मसि आन्दुर इदाम तोहच ओर पकाय लावदे यहुदिलोरकुन सबयलोकुरा मुने वळकिला परोर आतुर।