बुतोंग 17 - Muria Far Western

पोलुस अनि सिलास तिस्सलुनि सहेरतिगा

¹ पजा पोलुस अनि सिलास अंफिपुलिस अनि अपुल्लोनिया सहेरतिगाडाल हन्जुन तिस्सलुनिका सहेरतिगा वातुरक, अगा यहुदिलोरा उन्दि समाज मन्डलि मता।

² पोलुस आपुना रितिता अनुसार यहुदि लोकुरा समाज मन्डिलितिगा हन्दुर अनि यहुदि लोकुरा मून्ड पवित्र दियांग पवित्र पुस्तकता आधारिते ओरासंग वाद-विवाद कितुर।

³ अनि मसिहान पकाय तकलिप सहेन किस हातोरिगाडाल असा जिवे मायाना जरुरि मता इन्जोर नना मिकुन वेहान्तोना, येसुये ओर मसि इदाम स्पष्ट किस ओरकुन समजेह किन्दुर।

⁴ ओरागाडाल हुचुलोर लोकुरक अनि भक्त युनानि लोकुरकनिकेडाल पकाय लोकुरक अनि हजोर मानवालेह आसकनिकेडाल पकाय लोकुरक मसिनिगा विस्वास किस पोलुस अनि सिलासनासंग मिलेमातुरक।

⁵ मति यहुदिलोरक हेवा किस हाटुमतोर हुचुक दुष्ट लोकुरकुन आपुनासंग कितुरक अनि लोकुरा भीळतुन जमा किस नाटेनिगा गळबड कियाला लागतुरक। अनि यासोना लोन वास ओरकुन लोकुरा मुने तताना कोसिस कितुरक।

⁶ पोलुस अनि सिलासिन अगा पुटोर आतुरक ते ओरक यासोन अनि हुचुलोर तमोलोरकुन सहेरतोर न्याय केवालोरा मुने पिळिंगसोर ततुरक, “दुनियातुन उलटो-पुलटो कितोरक ओर लोकुरक इगा वने वातोरक।

⁷ यासोन ओरकुन आपुना लोन मन्दिला हितुर। येरक सबोयलोर येसु राजाल आन्दुर इन्जोर वेहच हजोर राजाना आग्याता विरोद किन्तोरक” इन्जोर जोरदे इतुरक

⁸ इदाम केन्जुन सहेरता दुसरो लोकुरकुन अनि सहेरता अदिकारि लोकुरक पकाय वरियतुरक।

⁹ अनि पजा ओरक यासोन अनि पिसतोर लोकुरकुन जमानत येतस ओरकुन तासितुर।

पोलुस, सिलास अनि तिमुथियुस बिरिया नाटेनिगा

¹⁰ तिस्सलुनि सहेरतोर मसिलोकुरक सान्डेय नरकाय नरका पोलुस अनि सिलासतुन बिरिया नाटेनिके लोहचितुरक अनि ओरक अगा अवस यहुदिलोरा समाज मन्डलितिगा हतुरक।

¹¹ बिरिया नाटेनिगा मन्ता ओद यहुदि लोकुरा समाज मन्डलिता यहुदिलोकुरक ते तिस्सलुनितोर यहुदिलोकुरकताल परमेस्वरना पोल्लो करियाना इच्चा केवालोरक मतोरक। अनि ओरक पोलुस अनि सिलास प्रचार किता मसिना बारेता सोबाता पोल्लो पकायि गिरिदाते स्विकार कितुरक, अनि ओरक वेहता इव पोल्लोंग इदाम मन्तांग या हिलेंग इन्जोर दरोज पवित्र पुस्तकतिगा पकाय ध्यानते पळकसोर मतोरक।

¹² इन्जोर ओरागाडाल पकाय लोकुरक अनि मानेमातांग युनानि आसकनिगाडाल अनि मानेयनिगाडाल वने पकाय लोकुरक मसिनिगा विस्वास कितुरक।

¹³ मति पोलुस बिरियातिगा वने परमेस्वरना पोल्लो वेहान्तोर इन्जोर तिस्सलुनितोर यहुदिलोकुरक पुतुरक ते अगा वने वास लोकुरकुन भळकेह किस गळबड कियाला लागतुरक।

¹⁴ सान्डे बिरिया नाटेनोर मसि विस्वासि लोकुरक पोलुसिन समुद्रता टकाहेरे हनिर इन्जोर सार कितुर मति सिलास अनि तिमुथियुस अगाय मतुरक।

¹⁵ पोलुसतुन अविहवालोर ओन बिरिया नाटेनिकेडाल एथेन्स सहेरवनाह ओतुरक, अनि सिलास अनि तिमुथियुस सान्डे आपुना हेरे वायिर इन्जोर पोलुसनिकेडाल आग्या येचुन ओरक पोलुसनिकेडाल मलस वातुरक।

पोलुस एथेन्स सहेरतिगा

¹⁶ एथेन्स सहेरतिगा सिलास अनि तिमुथियुसिना वायाना पोलुस हरहुळसोर मन्दुर असके ओद सहेर मूरतिंगते निन्दिता हुळस ओना मन पकाय दुःखि आतु।

¹⁷ ओर यहुदि लोकुरा समाज मन्डलितिगा यहुदि लोकुरासंग अनि परमेस्वरना वरे इरवाल युनानि लोकुरासंग अनि चोवकतिगा दरोज मिलेमान्दुर ओरासंग वाद-विवाद किसोर हन्दुर।

¹⁸ असके इप्पिकूरि अनि स्तोयिकि पोरोयता तत्वग्यानि लोकुरा दलताल हुचुलोर लोकुरक ओनासंग वाद-विवाद कितुरक। हुचुलोर लोकुरक “येर बरबळया बाताल वळकान्तोर?” इन्जोर इतुरक। दुसरो लोकुरक ओर येसुन अनि येसुना असा जिवे मायाना बारेता सोबाता पोल्लो वेहिन्दुर इन्जोर “येर विदेशि पेनता बारेते वेहान्तोर” इदाम इतुरक।

¹⁹ असके ओरक पोलुसिन अरियुपगुस सभातिगा ओतुरक अनि पुच्चेमातुरक, “निमा वेहान्तोन इद पुनाल पोल्लोंग माकुन समजेकिस हिम।”

²⁰ बाक्याकि निमा पुनाल पोल्लोंग माकुन वेहान्तोन, इदेना बारेते माक बसकेय केन्जोम इन्जोर इदाना अर्थ बाताल मन्ता इन्जोर माक पुन्दाना इच्चा किन्तोरोम।

²¹ (मति एथेन्स सहेरतिगा मन्वालोर सबोय लोकुरक अनि दुसरो देशताल वास अगा मन्वालोर परदेशि लोकुरक केवल पुनाल पोल्लोंग केन्जाना या अवे पोल्लोता चर्चा कियाना तासिस दुसरो बोदे दुसरो पोल्लोतिगा आपुना मन लावे केवोर आन्दुरक।)

अरियुपगुसता सभातिगा पोलुसना भाषण

²² असके पोलुस अरियुपगुस सभातिगा नितस इतुर अनि वेहतुर, “हे एथेन्सतोर लोकुरक, निमाट सबोय पोल्लोतिगा परमेस्वरतुन पकाय वरे इरवालोरक मन्तोरिट इन्जोर नना हुळान्तोना।

²³ बाक्याकि नना वलियानपा मिया पुजा कियाना चिजतुन पकाय ध्यानते हुळन्दान असके ‘पुनोर ओर परमेस्वर साटि’ इदाम पोरो कोटस मता उन्दि वेदि वने हुळतान, इन्जोर निमाट पुनविट पुजा किन्तोरिट ओना बारेते नना मिकुन समाचार वेहान्तोना।

²⁴ दरति अनि अगाडांग सबोय चिजतुन बनेहकितुर ओर परमेस्वर स्वरग अनि दरतितुन राज केवाल प्रबु मन्तोर इन्जोर ओर मानेयना कयदे बनेहकिता बोदे मन्दिरतिगा मनोर;

²⁵ ओर सबोयलोरकुन जिवन अनि स्वास अनि सबोय पोल्लोंग हेवाल मन्तोर इन्जोर ओर बोदे चिजता जरुरि मन्तोर लेहका मानेयना कयदा बोदे सेवा येतोर।

²⁶ दरतिता सबोय जागातिगा फयलेमास मनिर इन्जोर परमेस्वर आदम पोरोयतोर वरोर मानेयताल मानेयना सबोय जातितुन तयार कितुर अनि ओर लोकुरक बोद जागातिगा बोद काळदे मन्दिला पहाजे इन्जोर ओरा साटि सिवा वने ठहरे कितुर।

²⁷ परमेस्वरतुन पळकसोर आपुना अनुभते ओन दिसिर इन्जोर ओरक पळकान साटि मन्ता; ते वने ओर मावानिगाडाल लक हिलेर।

²⁸ बाक्याकि ओर मावासंग मन्तोर इन्जोर माक जिवित मन्तोरोम, अनि ताकान्तोरोम-वलियान्तोरोम, अनि स्थिर मन्तोरोम; इदाम मिवोर कवि लोकुरकनिकेडाल हुचुलोर लोकुरक ‘माक ते ओनाय वंशज आन्दोम’ इन्जोर इतोरक।

²⁹ माक परमेस्वरना वंश मन्तोरोम इन्जोर सोनो या चान्दि या कलते मानेय आपुना कलपनाते अनि आपुना विचारता अनुसार बनेहकिता मूरति लेहका मन्ता परमेस्वरना रुप इदाम निमाट विचार केमाट।

³⁰ अनि मुने लोकुरक परमेस्वरतुन पुनोर आस मतोर मति ओर अन्जानता बेरातुन परमेस्वर ध्यान हेवोर आस इदेक सबोय जागातिगा सबोय मानेयकुन पस्तेमायिला पहाजे इन्जोर आग्या हिन्तोर।

³¹ बाक्याकि परमेस्वर आपुनोर आचतोर मानेयना द्वारा दरतितुन खरोय रितिते न्याय कियान साटि उन्दि दिया निश्चय कितोर। परमेस्वर आचतोर ओर मानेयतुन हातोरिगाडाल असा जिवेहकिस दरतितुन खरोय रितिते न्याय कियानुर ओद पोल्लोतुन पका कितुर।”

³² हातोरिगाडाल असा जिवेमायाना पोल्लो केन्जचुन हुचुलोर लोकुरक पोलुसिन मजाक कियाला लागतुरक अनि हुचुलोर लोकुरक इतुर: “माक इद पोल्लोता बारेते नियाकेडाल असा बसकेय केन्जकोम” इन्जोर इतुर।

³³ असके पोलुस ओरा नडुमताल पसियस हतुर।

³⁴ मति हुचुलोर मानेयक ओनासंग मिलेमातुर अनि पोलुस येसुना बारेते वेहता पोल्लो विस्वास कितुरक। ओरागा अरियुपगुसतोर सदस्य दियुनुसियुस अनि दमरिस पोरोयदा उन्दि आळ अनि असा हुचुलोर लोकुरक मतोरक।