बुतोंग 11 - Muria Far Western

यहुदि आयोर लोकुरा नडुम परमेस्वर किता बुतोता बारेते पतरस येरुसलेमतिगा स्पष्ट वळकान्तोर

¹ पजा यहुदि आयोर लोकुरक वने परमेस्वरना पोल्लो मानेमातोर इन्जोर येसुना खास चेलाल लोकुरक अनि यहुदि प्रदेशतिगा मनवालोर तमोलोरक केन्जतुरक।

² इन्जोर पतरस येरुसलेमतिगा वातुर असके कतना कितोर यहुदिलोकुरक ओनासंग वाद-विवाद कियाला लागतुरक।

³ “निमा कतना आयोर लोकुरकनिगा हन्जुन ओरासंग बाक्या तिति” इदाम इतुर।

⁴ असके पतरस ओरकुन सुरुवाताल ओळीय-ओळीय समजेह किस वेहतुर,

⁵ “नना याफा सहेरतिगा प्रार्थना किन्दान असके उन्दि दरशन हुळतान, आबारताल हजोर चादर लेहका नालुंगास कोन्टांग पयताप लेहका उन्दि चिज आबारताल रयस नावा हेरे वातु।

⁶ नना अदेन बेस हुळतान असके अगा दरतितांग नालुंग काल्कवाले जानवरक अनि केळाता जानवरक अनि पोटाते दान्तांग अव जन्तुंग अनि आबारतांग पिटेंग हुळतान।

⁷ अनि ‘हे पतरस तेदा, हव्कस तिन’ इदाम नावासंग वळकता उन्दि लेंग वने केन्जतान।

⁸ ओद लेंग केन्जुन नना इतान: ‘आयो प्रबु, आयो! विटाळ या अशुद्ध चिज नना बसकेय तिनोन।’

⁹ आबारताल असा ओद लेंग ‘परमेस्वर बोदायि शुद्ध कितोर अदेन निमा विटाळ इनमा’ इन्जोर इतुर।

¹⁰ मून्ड बेरा इदामे आतु असके सबोय चिज असा आबार पोरो ताहतुर।

¹¹ अनि सान्डेय कयसरियाताल कुरनेलियुस पोरोयतोर वरोर मानेय नावा हेरे लोहच मतोर ओर मुवुर मानेयक माक मतोरोम ओद लोन मुने वातुरक।

¹² ओरा बारेते बोदे शंका केवाय ओरासंग हन्दिला इन्जोर पवित्र आत्मा नाकुन वेहतुर। अनि येरक सारुंग तमोलोरक वने नावासंग वातुरक; अदाम माक कयसरिया सहेरतिगा कुरनेलियुस पोरोयतोर मानेयना लोन हतोम।

¹³ कुरनेलियुस आपुना लोतिगा वरोर स्वरगदूत नितितोर हुळतुर अनि ओर स्वरगदूत ओन ‘याफा सहेरतिगा मानेयकुन लोहच पतरस पोरोयतोर शिमोनिन केया,

¹⁴ निमा अनि निया सबोय परिवारतुन पिसहाना पुटान साटि मन्ता परमेस्वरना पोल्लो ओर निकुन इन्दानुर’ इदाम स्वरगदूत ओरकुन वेहतुर इन्जोर ओर माकुन इतुरक।

¹⁵ नना ओरकुन वळकसोर मन्दाना असके पवित्र आत्मा सुरुते मावागा रयस मता अदामे ओरागा वने रयतु।

¹⁶ असके नना: ‘युहन्नाल ते एते बपतिस्मा हितुर, मति निमाट पवित्र आत्माते बपतिस्मा येतकिट’ इदाम प्रबु इन्ज मतोर ओद पोल्लो आल्हितान।

¹⁷ इन्जोर प्रबु येसु मसिनिगा विस्वास कियानाते पुटस मन्ता ओदे दान ओरकुन वने परमेस्वर हितुर ते परमेस्वरतुन रोके कियान साटि नना बोर मन्तोना?”

¹⁸ ओरक इद केन्जचुन पतरसना विरोद वाद कियाना बन्द किस कमेक मतोरक: “असके ते परमेस्वर यहुदि आयोर लोकुरकुन वने अनन्त जिवन साटि पस्तेमायाना दान हितोर” इदाम इन्जुन परमेस्वरना महिमा कियाला लागतुर।

अन्ताकिया सहेरतिगा मसिलोकुरा सभाता सुरुवात

¹⁹ स्तिफानुसना घटनाते आता पकाय तकलिपते हिके होके आस मतोरक सबोय विस्वासि लोकुरक केवल यहुदिलोकुरकुन येसु मसिना सोबाता पोल्लो वेहचोर फिनिके प्रदेश अनि सायिप्रस पोरोयता समुद्र नडुमता टापु अनि अन्ताकिया सहेरतिगा वने वलियसोर वलियसोर हतुरक।

²⁰ मति ओरागाडाल हुचुक सायिप्रसलोरक अनि कुरेनिलोरक मतोरक; ओरक अन्ताकियातिगा हन्जुन युनानि लोरकुन वने प्रबु येसुना सुसमाचारता पोल्लोंग केन्जहिला लागतुरक।

²¹ प्रबुना लाव ओरागा मता अनि पकाय लोकुरक विस्वास किस प्रबुनिके मलतुरक।

²² अन्ताकिया सहेरता मसिलोकुरा सभाता बारेता इद चर्चा येरुसलेम सहेरता मसिलोकुरा सभातिगा केन्जतुरक असके ओरक बरनाबासतुन अन्ताकिया लोहतुरक।

^23-24 ओर बरनबास वरोर सोबाय मानेय मतोर; अनि ओर पवित्र आत्मातुन मानेमास परमेस्वरनिगा सोबाय विस्वास केवालोर मतोर, ओर अगा अवस परमेस्वर लोकुरा पोरो हिन्तोर आशिष हुळस गिरदा आतुर अनि जिवालावे किस प्रबुनिगा विस्वास किम्ट इन्जोर सबोयलोरकुन उपदेश हितुर। अनि दुसरो पकाय लोकुरक प्रबुनिगा विस्वास कितुरक।

²⁵ असके ओर शावुलिन पळकान साटि तरसुसतिगा हतुर। ओर शावुलिन मिलेमातुर असके ओन अन्ताकियातिगा ततुर।

²⁶ अनि ओरक उन्दि वरसाहवनाह अन्ताकिया सहेरता मसिलोकुरा सभातासंग मिलेमासोर पकाय लोकुरकुन उपदेश हिसोर मतोर। अनि मसिना चेलाह लोकुरकुन सबोयता पहले अन्ताकियातिगाय “मसिलोकुरक” इदाम पोरोय केयतुरक।

²⁷ अवे दियांगते हुचुलोर परमेस्वरना पोल्लो वेहवालोरक येरुसलेमताल अन्ताकिया वातुरक।

²⁸ ओरागाडाल वरोर परमेस्वरना पोल्लो वेहवालना पोरोय अगबुस मता। ओर नितस सबोय दुनियातिगा पकाय दुष्काळ अरार इन्जोर पवित्र आत्माता द्वारा भविष्यवाणि कितुर। अनि ओद दुष्काळ रोमि देशता क्लवुदियुस पोरोयता हजोर राजाना काळते अरतु।

²⁹ असके चेलालोरक सबोयजन आपुना धनता अनुसार यहुदियातिगा मन्वालोर विस्वासि लोकुरा मदत साटि हुचुक मदत लोहिर इन्जोर चेलालोरक निर्णय कितुरक।

³⁰ ओरक डबुंग जमा किस बरनबास अनि शावुलना कयदे हितुरक। ओरक ओव डबुंग यहुदा प्रेदेशता मसिलोकुरा सभाता मुक्या लोकुरकनिके लोहतुरक।