बुतोंग 10 - Muria Far Westernपतरस अनि कुरनेलियुस 1 कयसरिया सहेरतिगा कुरनेलियुस पोरोयतोर वरोर मानेय मतोर। ओर रोमि देशता “इतालियानि” पोरोयता सयनिक दलतोर अदिकारि मतोर। 2 ओर परमेस्वरनिगा सोबायि विस्वास केवाल मतोर। अनि ओर आपुना सबोय परिवारतासंग परमेस्वरतुन वरियन्दुर अनि जरुरि लोकुरकुन दान हेवाल अनि परमेस्वरना मुने रोज प्रार्थना केवाल मतोर। 3 ओर उन्दि दिया मून्ड नेकाना हेरे, “हे कुरनेलियुस” इन्जोर वरोर स्वरगदूत ओन केयसुन ओना हेरे लोपा वायाना उन्दि दर्शन सोबाय दिसतुर। 4 कुरनेलियुस ओन बेस हुळसुन वरियतुर अनि ओन “हे प्रबु, बाताल मन्ता?” इन्जोर पुच्चेमातुर। ओर कुरनेलियुसतुन इतुर, “निया प्रार्थनांग अनि निया दान्तांग सोबाय बुतो परमेस्वर हुळतुर। अनि परमेस्वर निकुन आल्हान्तोर। 5 अनि इदेक याफा सहेरतिगा बोरे मानेयकुन लोहच पतरस पोरोयतोर शिमोनतुन केया। 6 ओर तोलाता बुतो केवाल शिमोना लोन वरताल मन्तोर, ओना लोन समुद्रता टकाहेरे मन्ता” इन्जोर इतुर। 7 ओनासंग वळकस मतोर ओर स्वरगदूत हतुर असके ओर इवुर सेवक अनि ओना हेरे हाजर मन्जोर मतोर ओरागाडाल परमेस्वरिन वरे इरवाल सिपायितुन केयतुर। 8 अनि ओरकुन सबोय पोल्लोंग सोबायि वेहच याफा सहेरतिगा लोहतुर। पतरस प्रार्थना कियाना बेरा दर्शन हुळिन्तोर 9 दुसरो दिया ओरक ताकसोर ताकसोर याफा सहेरता हेरे अवतुर असके दुपाडे पतरस प्रार्थना कियान साटि ढाबातिगा अन्जतुर। 10 अनि ओर प्रार्थना किसोर मतोर असके ओन करवस्तु अनि बाताले तिन्दाना इच्चा किन्दुर, मति ओरक जेवन तयारि किसोर मतोर असके ओर उन्दि दिव्य दर्शन हुळतुर। 11 अनि आबार तरियतु अनि उन्दि हजोर चादर लेहका बोदे चिज ओद चादरता नालुंगास कोन्टांग पयताप दरतितिगा रयिला आता इदाम हुळतुर। 12 अगा दरतिता सबोय प्रकारतांग नालुंग काल्कवाले जानवर अनि पोटाते दान्तांग अव जानवर अनि आबारता पिटेंग मतांग। 13 अनि “हे पतरस, तेदा अनि इवेहकुन हव्कस तिन” इदाम ओन इन्दाना उन्दि लेंग ओर केन्जतुर। 14 मति पतरस इतुर, “आयो प्रबु, बसकेय आयो, बाक्याकि नना बोदे विटाळ अनि अशुद्ध चिज बसकेय तिनोने।” 15 असा दुसरो बेरा ओद लेंग ओन इतुर, “परमेस्वर बोदायि शुद्ध ठहरे कितोर, अदेन निमा विटाळ मन्ता इदाम विचार केमा” इन्जोर इतुर। 16 मून्ड बेरा इदामे आतु, असके सान्डेय ओद हजोर चादर लेहका मन्ता ओद चिज आबार पोरो ताहतुर। 17 इद दर्शनता अर्थ बाताल मन्ता इन्जोर पतरस विचार किसोर मतोर असके कुरनेलियुस लोहच मतोर ओर मानेयक शिमोनना लोता पत्ता लावेकिस कवाळ मुने वास नितितुरक। 18 अनि “पतरस पोरोयतोर शिमोन बाताल ओर इगाय वरताल मन्तोर?” इन्जोर ओरक जोरदे पुच्चेमायिला लागतुरक। 19 पतरस ओद दर्शनता बारेते विचार किसोरेय मतोर असके, “हुळा, मुवुर मानेयक निकुन पळकिला आतोरक। 20 इन्जोर तेदचुन अडिय हन अनि हनोन या दायका इदाम विचार केवाय ओरासंग हन बाक्याकि ननाय ओरकुन लोहतोना” इन्जोर पवित्र आत्मा ओन इतुर। 21 असके पतरस अडिय रयस ओरक मानेयकुन, “हुळाट, निमाट पळकिला आतोरिट ओर ननाय आन्दान। निमाट बाक्या वातोरिट?” इन्जोर पुच्चेमातुर। 22 ओरक इतुरक, “सयनिक दलतोर अदिकारि कुरनेलियुस परमेस्वरना मुने येताना योग्य अनि परमेस्वरतुन वरियवाल अनि सबोय यहुदि लोकुरा सोबायि गवाहि पुटतोर मानेय मन्तोर। ओर निकुन आपुना लोन केयस नियाकेडाल परमेस्वरना पोल्लो केन्जिर इन्जोर ओन वरोर पवित्र स्वरगदूत सुचेह कितोर” इदाम ओर पतरसिन इतुरक। 23 पतरस ओरा विनन्तितुन स्विकार कितुर। अनि नरका लोपा वास ओनासंग मन्दान साटि पतरस ओरकुन केयतुर। अनि दुसरो दिया पतरस कुरनेलियुस लोहतोर लोकुरासंग कयसरिया सहेरतिके हतुर, अनि याफा सहेरता तमोहनिगाडाल हुचुलोर लोकुरक पतरसनासंग हतुरक। कुरनेलियुसना लोन पतरस 24 दुसरो दिया ओरक कयसरियातिगा अवतुरक असके कुरनेलियुस आपुना परिवार अनि प्रिय गोतयाहकुन आपुना लोतिगा जमा किस ओरा साटि हर हुळन्दुर। 25 पतरस कुरनेलियुसना लोन लोपा वान्दुर असके, कुरनेलियुस ओन मिलेमातुर अनि ओनांग काल्क अरस ओन नमस्कार कितुर। 26 मति पतरस ओन “तेदा, नना वने वरोर मानेय आन्दान” इन्जोर वेहचुन ओन तेहचितुर। 27 अनि ओनासंग वळकसोर पतरस लोपा हतुर, अनि पकाय लोकुरक अगा जमा आतोर हुळस 28 ओरकुन इतुर, “यहुदि आयोर लोकुरासंग संगत कियाना या ओरा लोन हन्दाना यहुदि लोकुरा नियमता विरोद मन्ता इन्जोर निमाट पुन्तोरिट मति बोरे मानेयतुन ‘विटाळ’ या ‘अशुद्ध’ इन्जोर इनोन आयका इदाम परमेस्वर नाकुन तोहतोर। 29 इन्जोर निमाट नाकुन केयति ते नना बाताले इनवाय इगा वातान। नाकुन बोद बुतो साटि निमाट केयतोन इन्जोर इदेक वेहा।” 30 कुरनेलियुस इतुर: “नालुंग दियांग मुने, इदे बेरा नना आपुना लोतिगा पियाल मून्ड नेकाना हेरे प्रार्थना किसोर मन्दान ते मान्जतांग सन्दरांग करस मतोर वरोर मानेय नावा मुने वास नितितुर। 31 अनि ओर इन्दिला लागतुर, ‘हे कुरनेलियुस, निया प्रार्थना केन्जतोर अनि गरिब लोकुरकुन निया दान हियाना बुतोतुन परमेस्वर आल्हितोर। 32 इन्जोर बोने याफा सहेरतिगा लोहच पतरस पोरोयतोर ओर शिमोनिन केया। ओर समुद्रता टकाहेरे तोलाता बुतो केवाल शिमोना लोतिगा वरताल मन्तोर।’ 33 असके नना सान्डेय लोकुरकुन निया हेरे लोहतान, अनि निमा वातिते बेस आतु। परमेस्वर निकुन इतोर ओद सबोय पोल्लोंग केन्जाट इन्जोर माक सबोय इदेक इगा परमेस्वरना मुने मिलेमातोरोम” इन्जोर इतुर। पतरस कुरनेलियुसना लोतिगा वळकान्तोर 34 असके पतरस इतुर: “परमेस्वर बोनाय भेदभाव केवोर इन्जोर 35 परमेस्वरिन वरियस ओना मुने येताना योग्य बुतो किन्तोर सबोय देशतोर लोकुरकुन ओर स्विकार किन्तोर इन्जोर नना इदेक समजेमातान। 36 शान्तिता सोबाता पोल्लो सबोयलोरा प्रबु येसु मसिना द्वारा वेहिच आपुना पोल्लो परमेस्वर इस्रायेल लोकुरा हेरे लोहतुर। 37 बोद बपतिस्मा हेवाल युहन्नान बपतिस्माता बारेते वेहतुर अनि पजा गलील प्रदेशताल सुरु आस सबोय यहुदि प्रदेशतिगा फयलेमाता ओद पोल्लो निमाट पुन्तोरिट। 38 नासरितोर येसुन पवित्र आत्मा अनि लावदे परमेस्वर बदाम अभिषेक कितुर अनि ओर बदाम सोबाय किसोर सयताना कारण सतेहकिस मतोर सबोयलोरकुन सुदरे किसोर वलियतुर इन्जोर निमाट पुन्तोरिट। परमेस्वर ओनासंग मतोर। 39 यहुदि देश अनि येरूसलेमतिगा वने ओर कितोर सबोयि बुतोतुन माक गवाहि मन्तोरोम। अनि ओरक ओन कुरुस पोरो अन्जिहिच हव्कस वाटतुर। 40 परमेस्वर ओर येसुन तिसरो दिया असा जितो कितुर, अनि ओर लोकुरा मुने प्रगट वने कितोर; 41 सबोय लोकुरकुन ओर दिसो मति गवाहि साटि परमेस्वर मुनेटाले आचतोर केवल माकुने ओर दिसतुर। ओर हातोरिगाडाल असा जिवेमातपा माक ओनासंग तितोम-उतोम। 42 जिवित मन्तोरक अनि हातोर मन्तोरक सबोय लोकुरा न्याय कियान साटि परमेस्वर ठहरे कितुर ओर येरेय मन्तोर इन्जोर लोकुरकनिगा वळकान साटि अनि गवाहि कियान साटि ओर माकुन आग्या हितुर। 43 ओनिगा विस्वास किन्तोर बोरे मानेयतुन ओना पोरोयता द्वारा पापतुन मापि पुटार इन्जोर सबोय परमेस्वरना पोल्लो वेहवालोर गवाहि हिन्तोरक।” यहुदि आयोर लोकुरिगा पवित्र आत्मा रयिन्तोर 44 पतरस इव पोल्लोंग वळकसोरे मतोर असके परमेस्वरना पोल्लो केन्जवालोरा सबोय लोकुरकनिगा पवित्र आत्मा रयतुर। 45 ओरक अन्जान बोलिंग वळकान्तोरक अनि परमेस्वरना महिमा किन्तोरक इन्जोर केन्जुन, 46 याफा सहेरताल पतरसनासंग वास मतोरक ओर कतना आतोरक यहुदि विस्वासि लोकुरक, कयसरिया सहेरतिगा कुरनेलियुसना लोतिगा यहुदि आयोर लोकुरकनिगा पवित्र आत्माता दान आता इन्जोर हुळस ओर सबोय लोकुरक चकेमातुरक। 47 असके पतरस “मावा लेहका पवित्र आत्मा पुटहितोरक येरकुन एरतिगा बपतिस्मा येतमाकिर इन्जोर बोरक रोमिहला परान्तोरक?” इन्जोर इतुर। 48 अनि पतरस ओरकुन येसु मसिना पोरोयते बपतिस्मा हेविर इन्जोर आग्या हितुर। असके ओर हुचुक दियांग असा ओरासंग मनिर इन्जोर ओरक ओन विनन्ति कितुरक। |
© (Active) Wycliffe Bible Translators, Inc. All rights reserved.
Wycliffe Bible Translators, Inc.