२ तिमुति 4 - Muria Far Western

¹ येसु मसिलोकुरकनिगा राज कियान साटि असा मलस वायनुर असके ओर जितो अनि हातोर लोकुरा न्याय कियानुर इन्जोर नना परमेस्वर अनि येसु मसिन गवाहि किस मिकुन आग्या हिन्तोना:

² परमेस्वरना पोल्लो प्रचार कियान साटि सबोय परिस्थितिते तयार मन्ट। अनि सबोय प्रकारता सहनशीलताते उपदेशतासंग गलतितुन समजेकिस हिम। अनि प्रोत्साहन किस करहा।

³ बाक्याकि लोकुरक खरोय उपदेशतुन केन्जोर आयनुरक अनि ओरक केन्जान साटि विचारकिता पोल्लोंग वळकस ओरकुन गिरदा किन्तोर करिहवालोरकुन ओर लोकुरक पळकानुरक।

⁴ अनि ओर खरोय उपदेशतुन केन्जोर मति ओरा आजि-दादा लोकुरक बनेकिता कालपनिक पिटोनिंग मानेमायनुरक इदाम उन्दि बेरा वायार।

⁵ अनि हे तिमुथियुस, निया सबोय परिस्थितितिगा सावदान मन, अनि दुःख सहेकिम, परमेस्वरना पोल्लोतुन प्रचार कियाना बुतो किम अनि परमेस्वर निया कयदे सोपे किता परमेस्वरना सेवातुन पुराकिम।

धारमिकाताता मुकुट

⁶ बाक्याकि नावा जिवातुन परमेस्वर साटि बलिदान कियाना बेरा वात अनि नावा पोरो हन्दाना बेरा वने हेरे वाता।

⁷ अनि उन्दि लळायि लेहका नना परमेस्वरना विस्वास साटि लळायि कितान, वरोर वितवाल बदाम जिकान्तोर अदाम लेहका परमेस्वर नावा कयदे हिता सोबाता पोल्लो वेहानाता बुतो नना सोबाय पुरा कितान। अनि येसु मसिना खरोय करहाना उपदेशतुन नना बसकेय तासिस हनोन।

⁸ अनि नावा साटि स्वरगतिगा उन्दि मुकुट बाकि मन्ता। ओद मुकुट परमेस्वरना मुने येताना योग्य जिवन जिवे मातोरक साटि मन्ता। अनि बसके प्रबु न्याय कियान साटि वायनुर असके ओद मुकुट प्रबु नाकुन हियानुर। अनि नाकुन वरोन साटि आयो मति ओना असा दुसरो बेरा वायाना साटि आशा केवालोरक सबोय लोकुरकुन इद मुकुट हियानुर।

व्यक्तिगत सन्देश

⁹ अनि तिमुथियुस निमा नावा हेरे सान्डे वायान साटि कोसिस किम,

¹⁰ अनि देमास इद दुनियाता पोल्लोतुन मया किसुन नाकुन विळिच तिस्सलुनिका सहेरतिके हतुर। अनि क्रेसकेस गलातियातिके हतुर अनि तितुस दलमतियातिके हतुर।

¹¹ अनि इदेक लूकाल वरोरे मावा संगे मन्तोर। मरकुसिन नावा हेरे तरा बाक्याकि प्रबुना सेवा साटि ओर नाकुन पकाय मदत केवाल मतोर।

¹² अनि तुहिकुसुन नना इफिसुसतिके लोहतान।

¹³ अनि नना त्रोवास सेहेरतिगा करपुसनासंग सोळे कितान उन्दि कोट, पुस्तक अनि विशेषाल जानवरता तोलाते बनेकिता पुस्तक नाकुन साटि ताय।

¹⁴ अनि तांबाना बुतोकेवाल सिकन्दर माकुन येसु मसिना पोल्लो वेहाना बेरा पकाय विरोद कितुर। ओर नाकुन बाताल कितुर अदेन अनुसार प्रबु ओन बदले कियानुर।

¹⁵ अनि ओर मावा सोबाता पोल्लो प्रचार कियानातुन पकाय विरोद कितुर, इन्जोर निमाट वने ओनाताल सावदान मन्ट।

¹⁶ अनि पहले बेरा रोमि सहेरतिगा नावा न्याय कियान साटि नाकुन ततुर असके नाकुन पिसान साटि बोरे मदत केवोर, मति सबोय लोकुरक नाकुन विळिच हतुर। अनि परमेस्वर ओरकुन मापि केविर इन्जोर नना प्रार्थना किन्तोना।

¹⁷ मति नावा वेहानाता द्वारा सबोय जातितोरक लोकुरक सोबाता पोल्लो केन्जान साटि प्रबु नाकुन लाव हिस नाकुन मदत कितुर। इन्जोर बदाम वरोर मानेय निरालता टोडिताल पिसान्तोर अदाम लेहका प्रबु नाकुन हायनाताल पिसिहतुर।

¹⁸ अनि प्रबु सबोय पापतिकडाल नाकुन संभाले किस स्वरगतिगा सुरक्षित ओयनुर। अनि परमेस्वरिन मावाकेडाल दरोज स्तुति आयि। आमेन।

अन्तिम अभिवादन

¹⁹ अनि प्रिसका, अक्विला अनि उनेसिपुरुसना लोतोर सबोय लोकुरकुन नमस्कार किम।

²⁰ अनि इरास्तुस कोरिन्युसतिगा नावा संग मतोर अनि त्रिपिमुसिन बिमारि आतु इन्जोर नना मिलेतुसतिगा विळिच हतान।

²¹ अनि पिनि अरानाता मुने मावा हेरे वायान साटि निमा जरुर कोसिस किम। युबुलुस, पूदेन्स, लिनुस अनि क्लेयोदिया, अनि सबोय संगवारि लोकुरकनिकेडाल निकुन नमस्कार।

²² प्रबु नियासंग मनिर। अनि ओना दया नियागा आसोर मनि।