२ तिमुति 3 - Muria Far Western

येसु मसिना असा मल्स वायानाता मुनेटा दियांगता अदरम

¹ मति हे तिमुथियुस, माक सहेनकिया परोम आयकोम इदाम पकाय तकलिप येसु मसिना असा मलस वायाना मुने वायार इन्जोर निमा समजेमाम।

² बाक्याकि लोकुरक आप आपुना मया कियानुर, ओरक दुसरोन मया केवोर आयनुरक अनि पयसांग कमेह कियान साटि पकाय विचार कियानुरक, अनि आपुना पकाय हजोर बुतो किताप लेहका पकाय गमन्डते वळकानुरक, अनि दुसरो लोकुराताल ओरक हजोर मन्तोर लेहका आपुना बारेते पकाय घमन्ड कियानुरक। अनि दुसरो लोकुरकुन दरोज अपमान कियानुरक अनि आपुना अवाल-बाबोना आग्यातुन मानेमायोर आयनुरक। अनि आपुना मदत केवालोरकुन मया अनि धन्यवाद केवोर आयनुरक अनि परमेस्वरना मुने अपवित्र जिवेमायनुरक,

³ अनि ओरक बोनायसंग मया केवोरक आयनुरक अनि दुसरोना गलतितुन बसकेय मापि केवोर आयनुरक अनि सोबाय लोकुरा विरोद गलति पोल्लोंग वेहच सबोय प्रकारता नाश कियानुरक। अनि आपुना गलति विचार अनि खराब बुतोतुन काबु किपरोर आयनुरक अनि पकाय दुष्ट लोकुरक आयनुरक। अनि सबोय सोबाय पोल्लोनुंग विरोद केवालोरक आयनुरक,

⁴ अनि सोबाय गोतियाल लेहका नाटेक किस आपुना गोतियालोरकुन दुश्मना कयते पयपियानुर, अनि दुसरो लोकुराताल पकाय हजोर लेहका समजेमास गमेन्डते व्यवहार कियानुरक। अनि आपुना मेन्दुलता सुख विचार किसोर मन्दानुरक मति परमेस्वरतुन माया केवोरे आयनुरक,

⁵ अनि ओरक खरोय विस्वासि लेहका लोकुरकना मुने आपुनतुन प्रगट कियानुरक मति ओर लोकुरक आपुना जिवनते परमेस्वरतुन बुतो कियाला हेवोर। निमाट इदाम लोकुराताल लक मन्ट।

⁶ अनि खरोय विस्वासता लावतुन हरचिन्तोर ओर लोकुरक दुसरोना लोहक लोहक दान्तोरक। अनि ओद लोता मुर्ख आसकनिगा आपुना गलति उपदेश किस अवेकुन नियत्रण किन्तोर। अनि अव आसक दरोज पाप किस सबोय प्रकारता गलति शारिरिक विचारता नियत्रणते मन्तांग,

⁷ अनि अव आसक दरोज पुनांग पुनांग उपदेशतुन करियसोर मन्दानुंग मति अवेहकुन येसुना खरोय उपदेश बसकेय समजेमायिला परो।

⁸ अनि बदाम यन्नोस अनि यम्ब्रोस पकाय वरसाना पहले परमेस्वरनोर सेवक मूसाना विरोद कितुरक अदामे खोटाल उपदेश करिहवालोरक मसिना खरोय उपदेश करिहानातुन विरोद किन्तोरक। अनि ओर आपुना बुद्धिते गलति पोल्लोंग विचार किन्तोरक। अनि ओर लोकुरक येसु मसिना खरोय उपदेश करिहानातुन बसकेय विस्वास केवोरक।

⁹ अनि ओर आपुना खोटाल करिहनाते लोकुरकुन दरोज दोखा हिपरोर आयनुरक। बाक्याकि बदाम यन्नेसना अनि यम्ब्रेसना मुर्खता सबोय लोकुरकना मुने उन्दि दिया दिसतु अदामे खोटाल उपदेश केवालोरिगा वने वायार। अनि ओर लोकुरक खोटाल उपदेशतुन करहान्तोरक इन्जोर सबोय लोकुरकुन उन्दि दिया समजेमायार।

तिमुथियुस साटि खास सूचना

¹⁰ मति हे तिमुथियुस, इव सबोय पोल्लोंग निमा सोबाय पुन्तोन बाक्याकि लोकुरकुन नना करिहता नावा जिवन जगेमायाना ओद रिति परमेस्वरना इच्चाता अनुसार मता। अनि नावा लक्ष्य लोकुरकुन परमेस्वरना पोल्लो करहाना मता। अनि बदाम नना येसु मसिनिगा विस्वास कितान अनि बदाम नना लोकुरासंगे धीरज अनि मया किसोर मतान। अनि नना सबोय कटिन परिस्थितितिगा बदाम सहेन किन्दान, इव सबोय पोल्लोतुन निमा सोबाय पुन्तोन।

¹¹ अनि नना बसके अन्ताकिया अनि इकुनियुम अनि लुस्त्रा पोरोयता सहेरतिगा मन्दान असके अविस्वासि लोकुरकना द्वारा नना पकाय कष्ट अनि दुःख सहेन कितान। मति नना इद सबोय पकाय तकलिपता मुने बदाम कितान इन्जोर निमा पुन्तोन। मति प्रबु नाकुन सबोय पकाय तकलिपतिगाडाल पिसिहतुर।

¹² अनि येसु मसिनिगा विस्वास किस पवित्र जिवन जिवेमायाना विचार किन्तोरक सबोय लोकुरकुन पकाय तकलिप आयार,

¹³ अनि खोटाल उपदेश करिहवालोर ओर लोकुरक सोबाय उपदेश करहान्तोर लेहका आपुना खोटाल उपदेश करहिन्तोर अनि खराब बुतो किसोर मन्दानुरक। अनि ओर लोकुरक दुसरोन दोखा किन्तोर अनि आपुन वने दोखा तिन्तोर।

¹⁴ मति हे तिमुथियुस, निमा करियता खरोय उपदेशतिगा विस्वास किसोर मन अनि इद उपदेश खरोय मन्ता इन्जोर निमा पुन्तोन बाक्याकि निकुन इद खरोय उपदेश करिहवालोर लोकुरक निया विस्वास योग्य मतोरक,

¹⁵ अनि निमा हुडलोरपणताल परमेस्वरना पवित्र पोल्लो करियतोन अनि येसु मसिनिगा विस्वास किस पिसाना पुटार इन्जोर परमेस्वरना पोल्लोताल निमा समजेमातोन।

¹⁶ अनि परमेस्वरना पवित्र पोल्लो कोटता लोकुरा मन्दे परमेस्वर प्रेरणा कितुर। अनि परमेस्वरना पवित्र पोल्लो लोकुरकुन करहान साटि सोबाय मन्ता बाक्याकि बाताल गलति विस्वास किन्तोरोम अनि बाताल गलति व्यवहार किन्तोरोम अनि माक बदाम खरोय रितिते व्यवहार किपरान्तोरोम इन्जोर ओद पवित्र पोल्लो माकुन समजेह किन्ता।

¹⁷ इन्जोर ओद पवित्र पोल्लो, परमेस्वरनिगा विस्वास केवालोरकुन सबोय सोबाय बुतो कियान साटि तेयार अनि योग्य बने कियार।