२ तिमुति 2 - Muria Far Western

येसुनोर सयनिक

¹ इन्जोर हे नावोर प्रिय मरि, निमा येसुना दयाता द्वारा लाववाले आम।

² अनि नना पकाय लोकुरा मुने परमेस्वरना पोल्लो वेहतुर अनि निमा वने अदेन केन्जति। अनि इद पोल्लोतुन दुसरोन वने करहान साटि योग्य मन्तोर ओर इमान्दार लोकुरा कयते इद पोल्लोतुन निमा सोपेकिम।

³ अनि निमा येसु मसिना सोबाय सयनिक बनेमासुन नावासंग येसु मसि साटि दुःख सहेमाम।

⁴ अनि बोरे सयनिक आपुना मुक्याल अदिकारिन गिरदा कियान साटि ओर लळायितुन विळिचुन दुसरो बुतोते हनोर।

⁵ अनि बोरे करसवाल बोदे करसना नियमतुन अनुसार करसोर ते आकरि मुकुट ओन मिलेमायो।

⁶ अनि वरोर मेहनत केवाल कास्ताकार मानेय ओना मेहनता कायांग पहले ओन पुटिला पहाजे।

⁷ अनि नना वेहता पोल्लोता बारेते निमा पकाय ध्यान किम अनि प्रबु इद सबोय पोल्लोतुन निकुन समजे केविर।

⁸ येसु मसि दावुद राजाना वंशते जनम आतुर अनि असा हातोरिगाडाल जिवेमातुर इन्जोर इद निमा दरोज अलहा। इद नना लोकुरकुन वेहता सुसमाचार मन्ता,

⁹ अनि इद सुसमाचार साटि नना कुकरमिना लेहका साकळि करिहसुन दुःख सहेमान्तोनान, मति परमेस्वरना पोल्लो फयलेकियान साटि बोरे मानेय रोके कियापरोर।

¹⁰ इन्जोर परमेस्वर आचतोर ओर लोकुरकुन येसु मसिना द्वारा पिसाना पुटि अनि ओर उदस मन्तोर ओद स्थानतिगा महिमातासंग ओरक वने दरोज मन्दान साटि नना परमेस्वर आचतोर ओर लोकुरक साटि इद सबोय दुःख सहेमान्तोना।

¹¹ अनि माक येसु मसिना संग हातोम ते येसु मसिना संगे जिवेमायिकाट;

¹² अनि माक येसु मसिना विस्वास ते आकिरवनाह मनकाट ते येसुना संग राज वने कियाकाट। मति येसु मसिना विस्वासतुन माक हरचिकोम ते ओर माकुन वने हरचियानुर;

¹³ अनि माक परमेस्वरनासंग अविस्वासते मन्काट ते वने ओर वाचातुन पुराकियानुर, बाक्याकि ओर बसकेय आपुना वाचा बदले केवोर अनि खोटाल पोल्लोंग वळकोर।

परमेस्वरना मानवालेर सेवक

¹⁴ अनि नना वेहता सबोय पोल्लोंग विस्वासि लोकुरकुन आलहिच हिम्ट, अनि उन्दि उन्दि पोल्लोता अर्थतुन पयसुन ओरक अदेना बारेते तर्क वितर्क किसुन लोकुरकना विस्वासतुन नाश किन्तोर अनि इदेना द्वारा दुसरोन बाताले लाभ पुटो। अदाम तर्क वितर्कतुन निमा बन्द किम।

¹⁵ अनि परमेस्वर निकुन स्विकार कियान साटि योग्य अनि परमेस्वरना उचित सेवक आसुन निमा सोबाय मेहनत किम। अनि परमेस्वरना खरोय पोल्लोतुन खरोय रितिते करहा। अनि इदाम कियाकि ते प्रबुना मुने बसकेय निमा लज्जित आयो आयिकि।

¹⁶ अनि परमेस्वरना विरोद मन्ता ओद गलति करहानाताल निमा लक हन बाक्याकि इदाम पोल्लोंग लोकुरकुन परमेस्वरनिकेडाल लक ओयनुंग।

¹⁷ अनि बदाम करक रोग शरिरतिगा सान्डे फयलेमान्ता अदामे ओरा गलति करहाना लोकुरा मन्दे सान्डे फयले मान्ता। अनि हुमिनयुस अनि फिलेतुस गलति करहानतोर ओर लोकुरा संगे मन्तोर।

¹⁸ अनि ओरक इद खरोय करिहाना हरितुन विळिच गलति करिहाना हरिते वितान्तोर। अनि हातोर लोकुरक असा जिवेमातुरक इन्जोर वेहान्तोरक अनि इदाम हुचुक लोकुरा खरोय विस्वासतुन बहके किन्तोरक।

¹⁹ मति बोर परमेस्वरनिगा विस्वासकिन्तोर ओर लोकुरक उन्दि लोता मजबुत पायवा लेहका मन्तोर। ओरा विस्वास बसकेय नाश आयो आयार। अनि ओद पायवातिगा इदाम उन्दि शिक्का कोटस मतोर: “प्रबु आपुना लोकुरकुन सोबाय पुन्तोर अनि ओर लोकुरक पाप कियाना बन्द कियाला पहाजे।”

²⁰ अनि उन्दि धनि मानेयना लोतिगा सोनाता अनि चान्दिता दळियांग मन्तांग अनि मराना अनि तोळियता दळियांग वने मन्तांग; अनि हुचुक दळियांग खास बुतो साटि अनि दुसरो हुचुक दळियांग साधारन बुतो साटि उपयोग किन्तोर।

²¹ अनि वरोन पापताल शुद्ध किन्तोर ते बदाम आदर कियानाता दळियातुन आपुनोर मालकाल उपयोग किन्तोर अदामे ओरकुन सोबायता बुतो साटि प्रबु उपयोग कियानुर।

²² इन्जोर हे तिमुथियुस, लयोर लोकुरक ओद पापता बुतो कियाना इच्चा किन्तोर मति निमा इदाम गलतितिकेडाल लक हन। अनि निमा परमेस्वरना मुने दरमि बनेमाम अनि भरोसा योग्य बनेमाम अनि दुसरोनिगा मयाकिम, अनि बोर शुद्ध मन्दे प्रबुनिगा विस्वास किन्तोर ओर लोकुरासंग शान्तिते मन्दान साटि पकाय कोसिस किम।

²³ अनि मुर्खताता निरर्थ बहसताल वाहचाना आन्ता इन्जोर समजेमास अदेनताल निमा लक हन।

²⁴ अनि प्रबुनोर सेवक वाहचवाल आयमाकिर मति सबोय लोकुरासंग शान्तिते मन्दिला पहाजे। अनि परमेस्वरना पोल्लोतुन सोबाय करहिवाल आयिर अनि आपुना पोरो दोष केवाल लोकुरा दोषतुन सहन केवाल मनिर।

²⁵ अनि निया खरोय करिहनातुन बोर विरोद किन्तोरक ओरकुन नम्रताते ओरा गलतितुन समजेहकिस हिम, बाक्याकि ओरकुन परमेस्वर पस्तेमायानाता सन्दि हियानुर,

²⁶ मति सयतान आपुना आग्या पालन कियान साटि ओर लोकुरकुन आपुना अदिकारतिगा कितुर, मति परमेस्वर आपुना इच्चातुन पुराकियान साटि ओरकुन पिसहानुर।