२ तिमुति 1 - Muria Far Western

परिचय

¹ अनि नना येसु मसिना खास चेला पोलुस विस्वासते प्रिय मरि लेहका मन्तोर ओर तिमुथियुसिन इद पत्र कोटान्तोना। अनि परमेस्वरना इच्चा कियान साटि अनि बोर येसु मसिनिगा विस्वास किन्तोर ओर लोकुरकुन अनन्त जिवन पुटार इन्जोर परमेस्वरना ओद वाचा लोकुरकुन वेहान साटि ओर नाकुन आचतोर।

² बाबो परमेस्वर अनि मावोर प्रबु येसु मसिनिकेडाल निकुन कृपा, दया अनि शान्ति पुटसोर मनि।

धन्यवाद अनि प्रोत्साहन

³ अनि नावोर आजि-दादा लोकुरक परमेस्वरना बदाम सेवा कितुर अदामे नना वने सोबाय मन्दे परमेस्वरना सेवा किस धन्यवाद किन्तोना। अनि निकुन नावा प्रार्थनाते दरोज नरका पियाल आलहिस धन्यवाद किसोर मन्तोना।

⁴ अनि माकुन अलग कियानपा निमा पकाय किलति अदेन नना आलहान्तोना असके निकुन असा मिलेमासुन गिरदा आयान साटि नना पकाय इच्चा किन्तोना।

⁵ अनि निया खरोय विस्वासतुन नना आलहान्तोना, ओद खरोय विस्वास पहले निया आजि लोयिस अनि निया याल युनिकनिगा मता। अनि ओद खरोय विस्वास इदेक नियागा वने मन्ता इन्जोर नना पका मन्तोना।

⁶ इन्जोर नना नियागा कय इरस निकुन सोपेह किता परमेस्वरना वरदानतुन निमा सोबाय उपयोग किसोर मन।

⁷ बाक्याकि परमेस्वर माकुन पवित्र आत्मातुन हितुर ओर पवित्र आत्मा माकुन वरिहवाल आयो मति माकुन सामर्थ, मया अनि शान्ति स्वभाव हितोर।

⁸ इन्जोर मावोर प्रबु येसु मसिना गवाहि वेहान साटि अनि नना साकळि करिहसुन प्रबुना साटि जेहलतिगा मन्तोना इन्जोर बसकेय लज्जा आयमा, मति सुसमाचार साटि नना बदाम दुःख सहेमातान अदामे परमेस्वरना सामर्थता अनुसार निमा वने दुःख सहेकिम,

⁹ अनि ओर माकुन पिसितुर अनि पवित्र जिवन जिवेमायान साटि केयतुर अनि इद मावा बुतोता अनुसार आयो मति दुनिया बनेकियानाता मुने येसु मसिना द्वारा पिसाना हियान साटि आपुना योजना पुरा कियान साटि ओर योजना कितुर,

¹⁰ अनि मावोर पिसिहवाल येसु मसि दरतितिगा वातुर अनि ओद दया ओर प्रगट कितुर। अनि येसु मसि हायानाता अदिकारतुन समाप्त कितुर। अनि ओना सुसमाचारतुन स्विकार कितुर ओर लोकुरकुन परमेस्वरनासंग दरोज मन्दान साटि सन्दि पुटतु।

¹¹ इद सुसमाचारतुन फयलेकियान साटि नाकुन वेहवाल अनि येसुना खास चेला अनि उपदेशक आस निवळेकितुर।

¹² इन्जोर इद सबोय दुःखतुन नना सहेमातान। मति नना लज्जा केवोन बाक्याकि बोनागा नना विस्वास कितोना इन्जोर नना पुन्तोना, ओर ओना न्यायकियानाता दियावनाह नाकुन केप परान्तोर इन्जोर नना पका मन्तोना।

¹³ अनि निमा नावाताल करियति ओद खरोय पोल्लोतुन निमा येसु मसिना विस्वास अनि मयातासंग पालन किसोर मन अनि ओद खरोय पोल्लोतुन दुसरोन वने करहा।

¹⁴ अनि निकुन परमेस्वर सोपेकिता सबोय सोबाय पोल्लोतुन पवित्र आत्माता मदतते केपसोर मन।

¹⁵ अनि आसिया प्रदेशता सबोय विस्वासि लोकुरक नाकुन विळिच वितितुर इन्जोर निमा पुन्तोन। अनि पुगिलुस अनि हिरमुनेस वने ओरासंग मतोरक।

¹⁶ अनि उनेसिपुरुसना परिवारतुन प्रबु दया केविर बाक्याकि नना साकळिंग करिहिस जेहलतिगा मन्तोनान मति ओर पकाय बेरा नाकुन हुळान साटि जेहलतिगा वासुन नावा मन्दुन शान्ति हितुर।

¹⁷ अनि ओर रोमा सेहेरतिगा वातुर अनि ओर नाकुन मिलेमायान साटि पकाय पळकतुर अनि नाकुन मिलेमातुर।

¹⁸ अनि न्याय कियानाता दिया प्रबु ओन दया केविर! अनि इफिसुस सहेरतिगा ओर नाकुन बचोन मदत कितुर इन्जोर निमा सोबाय पुन्तोन।