२ तिस्लुनि 3 - Muria Far Westernमाकुन साटि प्रार्थना किम्ट 1 हे बायि-दादालोरक, बदाम निमाट प्रबुना पोल्लो स्विकार कितिट अदामे प्रबुना पोल्लो सबोय प्रदेशतिगा सान्डे फयलेमायि अनि महिमा फयलेमायिर इन्जोर आकरिते निमाट मावा साटि प्रार्थना किम्ट। 2 हेकळ अनि दुष्ट लोकुराताल माकुन पिसान साटि निमाट प्रार्थना किम्ट बाक्याकि सबोय लोकुरक विस्वासि हिलेरक। 3 मति प्रबु येसु खरोय विस्वासनिय मन्तोर, ओर मिकुन विस्वासते कम्बिर कियानुर अनि दुष्टलोकुरक निगाडाल मिकुन पिसिहानुर। 4 निमाट मावा आग्याता पालन कियाला आतोरिट अनि अदामे किसोर मनकिट इन्जोर मियाबारेते पुरा भरोसा मन्ता बाक्याकि मिकुन परमेस्वरनासंग सोबाय संबन्द मन्ता। 5 प्रबु परमेस्वर मिया मन्दुन परमेस्वरना मया अनि येसु मसिना धिरजतिके बरसान साटि मदत किम्ट। बुतो किसोर मन्ट। 6 हे बायि-दादालोरक, बोर खरोय करहाना मावाकेडाल येतितोर मति ओदेना अनुसार ओर ताकोर अनि ओर खराब चाल ताकान्तोरक अदाम तमो लोकुरकताल निमाट अलग आम्ट इन्जोर माक मिकुन प्रबु येसु मसिना पोरोयते आग्या हिन्तोरोम। 7 अनि बदाम मावा लेहका चाल चलन कियाला पहाजे इन्जोर निमाट पुन्तोरिट बाक्याकि माक मियासंग आळसि बनेमास बाताले बुतो केवोम आस मनोम, 8 अनि मियागडाल बोनाय पोरो वजा आयमाकि इन्जोर माक बोनागाय पुकट गाटो तिनोम, माक नरका-पियाल मेहनत किन्तोम। 9 अनि माक नियागाडाल पुकटते जेवन कियाना अदिकार मता, मति मिक मुने उन्दि सोबाय चाल चलन साटि माक अदाम केवोम। 10 “बोने बुतो कियाना इच्चा हिले ते ओर गाटो वने तिनमाकिर” इन्जोर माक मियागा मन्तोम असके इद आग्या मिकुन हिन्दोम। 11 अनि मियागडाल हुचुक लोकुरक आपुना बुतो केवोर अनि ओरक बिना कारणते दुसरो लोकुरा हेरे हन्जुन आपुना बेरातुन पुकट हन्दिला हिन्तोर इन्जोर माक केन्जान्तोरोम। 12 अनि इदाम आळसि लोकुरकुन ओरक कमेक बुतोकिसोर मनिर अनि आपुना कमायिता हारिनुंग तिनिर इन्जोर माक प्रबु येसु मसिना पोरोयते आग्या हिस ओरकुन समजेह किन्तोरोम। 13 हे बायि-दादालोरक, निमाट सोबाय बुतो कियान साटि बसकेय कमजोर आयमाट। 14 अनि बोरे इद पत्रते वेहता पोल्लोतुन मानेमायोर ते ओनागा ध्यान इराट अनि ओनासंग निमाट संबन्द बन्द किम्ट, इदामते ओर आपुना आचरनते लज्जा आयिर। 15 ते वने निमाट ओनासंग दुश्मन लेहका व्यवहार केमाट मति ओरकुन आपुना हेलाळ दादाल लेहका ओरकुन चेतावनि हिम्ट। आकरि नमस्कार 16 अनि शान्ति हेवाल प्रबु बोदे परिस्थितितिगा मिकुन दरोज शान्ति हिसोर मियासंग मनिर। 17 अनि इद नावा सबोय पत्रता उन्दि विशेषाल चिन्हा आन्दु इन्जोर नना पोलुस आपुना कयदे मिकुन नमस्कार कोटान्तोना। अनि इद चिन्हा नावा कोटानाता रिति मन्ता। 18 मावोर प्रबु येसु मसिना दया मिया सबोय लोकुरकनिगा आसोर मनि। |
© (Active) Wycliffe Bible Translators, Inc. All rights reserved.
Wycliffe Bible Translators, Inc.