२ तिस्लुनि 2 - Muria Far Western

प्रबुन अनि प्रबुना कानुनतुन विरुद बुतोकेवाल

¹ हे बायि-दादालोरक, इदेक निमाट मावोर प्रबु येसु मसिना असा मल्स वायाना अनि ओना हेरे मिलेमायानाता विषयता बारेते मिकुन स्पष्टकिस वेहान्तोरोम,

² अनि प्रबुना असा वायानाता दिया वातु इन्जोर इदाम केन्जिकिट ते अचानक मिया मन अस्थिर आयमाकि अनि वरियमाट। बोरे भविस्यवानितिगा इद पोल्लो वेहानुर या बोदे सन्देश या मावाकेडाल वाता पत्र लेहका इद पोल्लो वाय परान्ता।

³ बोदे रितिते निमाट बोनाय दोखाते अरमाट बाक्याकि पहले विस्वासता त्याग आयार अनि प्रबुन अनि प्रबुना कानुनतुन विरुद बुतोकेवाल प्रगट आयनुर।

⁴ अनि लोकुरक परमेस्वर इन्जोर मानेमान्तोर इद सबोयतुन या बोना आरादना किन्तोर ओद सबोय पोल्लोतुन ओर विरुद किस आपुनतुन हजोर कियानुर। प्रबुन अनि प्रबुना कानुनतुन विरुद बुतोकेवाल ओर मानेय परमेस्वरना प्रार्थना लोतिगा दायनुर अनि अगा ओर उदस आपुनतुन परमेस्वर इन्जोर इन्दानुर।

⁵ बाताल मियासंग मनेक नना मिकुन इव सबोय पोल्लोंग समजेह किन्दान इन्जोर मिकुन आटवन हिले?

⁶ ओर आपुना बेराता पहले प्रगट आयो आयान साटि बोद लाव इदेक रोकेकिन्ता इन्जोर निमाट पुन्तोरिट।

⁷ बाक्याकि प्रबुन अनि प्रबुना कानुनतुन विरुद बुतोकेवालना रहस्य इदेक वने बुतोकिसोर मन्तोर मति इदेक वरोर पोसिहवाल मन्तोर ओर आपुना हरितिगाडाल लक हन्दानवनाहा ओर प्रगट आयोर।

⁸ बसके ओर पोसिहवाल आपुना हरितिगाडाल लक हन्दानुर असके प्रबुन अनि प्रबुना कानुनतुन विरुद बुतोकेवाल प्रगट आयनुर असके प्रबु येसु आपुना आग्याते ओन हव्कानुर अनि आपुना वायाना लावते ओन भस्म कियानुर।

^9-10 मति प्रबुन अनि प्रबुना कानुनता विरुद बुतोकेवालना वायाना सयताना लावते मन्ता। ओर सबोय प्रकारता खोटाल लाव, चिन्ह अनि कपटिपुरण चमत्कार तोहच नाश आयवाल मानेयतुन अदरमता सबोय प्रकारता दोखाते वाटान्तोर। बाक्याकि ओरकुन पिसान साटि लाव मन्ता ओर प्रबु येसुना बारेता खरोयतुन ओर लोकुरक स्विकार केवोर।

¹¹ इन्जोर ओर मानेय लोकुरकुन दोखा हियान साटि परमेस्वर परवांगि हियानुर। अनि इद कारणते ओर मानेय बाताल इन्तोर अदेन लोकुरक स्विकार कियानुरक।

¹² अनि बचोक लोकुरक प्रबु येसुना बारेता खरोय उपदेशतुन विस्वास केवोरक मति ओरक अदरमताल गिरदा आन्तोरक ओरक सबोय लोकुरक दन्ड भोगेमायिर।

मुक्ति पुटहान साटि मिकुन आचतोर

¹³ हे बायि-दादालोरक, प्रबु मिकुन मया किन्तोर। अनि परमेस्वर मिकुन सबोय बनेकियानता मुने आचतुर इन्जोर माकुन मिया बारेते दरोज परमेस्वरना धन्यवाद हियाला पहाजे। बाक्याकि पवित्र आत्मा मिकुन पवित्र बनेकिन्तोर अनि निमाट आपुना विस्वास सच्चायिते किन्तोरिट।

¹⁴ अनि मावोर प्रबु येसु मसिना महिमातुन पुटहान साटि ओर मावा सोबाता पोल्लोता वेहानाता द्वारा मिकुन केयतुर।

¹⁵ हे बायि-दादालोरक, निमाट विस्वासते कम्बिर मन्ज मावा पोल्लोता या पत्रता रुपते मिकुन पुटता करहानातुन पालन किसोर मन्ट।

¹⁶ अनि मावोर प्रबु येसु मसि अनि मावोर बाबो परमेस्वर माकुन मया किन्तोर अनि ओना दया माकुन प्रोत्साहन अनि सोबाय आशा हिता।

¹⁷ अनि मिया मन्दे शान्ति हेविर अनि मिया सबोय बुतोतिगा अनि पोल्लोतिगा कम्बिर केविर।