२ तिस्लुनि 1 - Muria Far Western

अभिवादन

¹ पोलुस, सिलवानुस अनि तिमुथियुस असा वने तिस्सलुनिया सहेरता मसिलोकुरा सभाते परमेस्वर अनि येसु मसिनिगा विस्वास केवालोरक विस्वासि लोकुरकुन साटि इद पत्र कोटान्तोरोम। मिकुन मावोर बाबो परमेस्वर अनि प्रबु येसु मसिनिगा मन्तोरिट।

² मावोर बाबो परमेस्वर अनि प्रबु येसु मसिते मिकुन दया अनि शान्ति पुटसोरिन मनि।

न्यायता दिया

³ हे बायि-दादालोरक, मिया विस्वास अनि आपसता मया बरसोरिंग मन्ता इन्जोर माक परमेस्वरना मुने दरोज मिया साटि धन्यवाद कियाला पहाजे।

⁴ अनि मिया जिवाता उपद्रव अनि पकाय तकलिपतुन शान्तिते सहेनकिस मिया विस्वासते जिकतोरिट इन्जोर इदेक वने माक परमेस्वरना सबोय मसिलोकुरा सभातिगा मिया विस्वासता बारेते अभिमान किन्तोरोम।

⁵ अनि निमाट परमेस्वरना राज्यतिगा हन्दान साटि पकाय तकलिप सहेन किन्तोरिट अनि परमेस्वर मिया पकाय तकलिपतुन हुळान्तोर। अनि ओर परमेस्वर मिकुन आपुना राज्यतिगा हन्दान साटि योग्य ठहरे कियानुर अनि इदाम किसुन परमेस्वर दरमि मन्तोर इन्जोर आपुनतुन प्रगट किन्तोर।

⁶ बाक्याकि बोरे मिकुन पकाय तकलिप हिन्तोर अदेना बदलाते परमेस्वर ओरकुन पकाय तकलिप हेविर इदाम परमेस्वर आपुना न्यायतुन प्रगट कियानुर।

^7-8 अनि प्रबु येसु आपुना लाववाले स्वरगदूतकनासंग स्वरगताल दमकेमाता किसते प्रगट आस परमेस्वरतुन पुनोर अनि मावोर प्रबु येसुना सोबाता पोल्लोतुन मानेमायोर ओरकुन दन्ड हियानुर। अनि मिकुन अनि माकुन वने आपुना पकाय तकलिपतिगाडाल ओन आराम हियानुर।

⁹ अनि बोर लोकुरक परमेस्वरतुन पुनोर अनि ओना सोबाता पोल्लोतुन मानेमायोर ओर लोकुरकुन प्रबु येसु आपुना मुनेटाल हटेकिसुन अनन्त नाशता दन्ड हियानुर। इव पोल्लोंग प्रबु येसु मसि दुसरो बेरा वायानपा आयार।

¹⁰ असके येसु मसि आपुना विस्वासि लोकुरा कारणते महिमा स्विकार कियानुर। अनि येसुनिगा विस्वास कितोर सबोय लोकुरक येसुन हुळसुन आश्चरय आयार। निमाट वने ओद समुहतिगा मन्दाकिट बाक्याकि माक वळकता ओद पोल्लो निमाट विस्वास कितिट।

¹¹ इन्जोर मावोर परमेस्वर मिकुन केयतुर ओद केयानाता योग्य अनुसार हन्दान साटि मदत केविर, अनि सबोय इच्चा अनि विस्वासता सबोय बुतोतुन सोबाय पुराकियान साटि परमेस्वर मदत केविर इन्जोर माक मिया साटि दरोज प्रार्थना किन्तोरोम।

¹² अनि मावोर प्रबु येसु मसिना पोरोय मियागा महिमा आयि अनि निमाट येसु मसिनिगा महिमा आम्ट अनि ओद महिमा मावोर परमेस्वरना दयाताल अनि प्रबु येसु मसिनिकेडाल वान्ता।