२ पतरस 3 - Muria Far Western

प्रबुना असा मलस वायाना दिया

¹ हे प्रिय गोतियालोरक, नना इदेक मिकुन दुसरो पत्र कोटान्तोना।

² बाक्याकि निमाट परमेस्वरना पोल्लो वेहवाल पवित्र लोकुरक पहलेटाले इतोर ओव पोल्लोंग अनि मावोर प्रबु अनि पिसिहवाल ओर येसु मसि आपुना खास चेलाल लोकुरा द्वारा हिता आग्यातुन आल्हाट इन्जोर इव रन्डास पत्रतिगा हुचुक पोल्लोंग आलिहच खरोय रितिते विचार कियान साटि मिया मन्दुन जागृत कियाना कोसिस किन्तोना।

³ “ओना वायाना वाचा बगा हतु?

⁴ बाक्याकि बाबो-दादिलोरक हातोरक अदेना पजा सबोय पोल्लोंग सृष्टिता सुरुवाताल बदाम मता ओद सबोय पोल्लो अदामे मन्ता” इन्जोर वेहचुन आपुनाय इच्चाते ताकानुरक ओरक मजाक केवालोरक आकरि दियाते वायनुरक इन्जोर पहले पुन्ट।

⁵ परमेस्वरना पोल्लोता द्वारा ब्रंमान्ड पहलेटा काळताल बनेकितोर।

⁶ अनि दरति वने एताल बनेमातु अनि एते स्थिर मन्ता अनि ओद काळता दुनिया एतिगा मुळन्दस नाश आतु,

⁷ अनि इदेकता ब्रंमान्ड अनि दरति ओदे पोल्लोता द्वारा पोतहान साटि इरतोर, अनि न्यायता दिया अनि परमेस्वरना मुने खराब बुतो केवालोरा नाश आयाना दियांगवनाह इदामे इरस मन्दानुर इन्जोर ओरक आपुनास मरिंगतुरक।

⁸ मति हे प्रिय गोतियालोरक, प्रबुन उन्दि दिया हजार वरसाना बराबर मन्ता अनि हजार वरसा उन्दि दियाता बराबर मन्ता इन्जोर इद पोल्लो निमाट मरिंगमाट।

⁹ हुचुलोर लोकुरक विचार किन्तोरक लेहका प्रबु आपुना वाचा पुराकियान साटि बेरा केवोर। मति बोरे नाश आयमाकिर इन्जोर सबोय लोकुरकुन पस्तेमायाना सन्दि पुटि इन्जोर मिया बारेते पोसोरिंग सहेन किस मन्तोर।

¹⁰ मति प्रबुना दिया कलेर लेहका वायार, ओद दिया ब्रंमान्ड पकाय गुळजेमास बदलेमायार अनि दरतिता सबोय घटक पकायि कासाना कारण पिघले मायार, दरति अनि अदेना पोरोडा सबोय चिजक करानुंग।

¹¹ इव सबोय चिजक इदे रितिते पिघलेमायवाल मन्तांग इन्जोर आबार किसते पिघलेमायार, अनि ब्रंमान्डता सबोय चिजक पकाय कासते पिघले मायनुंग, अनि परमेस्वर सबोय लोकुरकुन न्याय कियान साटि वायान ओद दिया हर हुळस ओद दिया सान्डे वायाना साटि कोसिस किस,

¹² निमाट परमेस्वरना मुने पवित्र चाल-चलन किस ओना गिरिदा कियाना बुतो केवालोरक आयिला पहाजे।

¹³ मति केवल परमेस्वरना इच्चाता अनुसार सबोय लोकुरक जिवेमायनुरक ओद पुनाल आबार अनि पुनाल दरति साटि माक परमेस्वरना वाचाता अनुसार हर हुळिला आतोरोम।

केपसोर अनि तयार मन्ट

¹⁴ इन्जोर हे गोतियालोरक, निमाट परमेस्वर सबोय लोकुरकुन न्याय कियान साटि वायाना ओद दियातुन हर हुळान्तोरिट ते परमेस्वरना मुने निरदोष अनि बोदे डाग हिलेर आस शान्तिते मिकुन हुळान साटि पकायि कोसिस किसोर मन्ट।

¹⁵ अनि आकरि न्यायता दन्डताल निमाट पिसान साटि इन्जोर प्रबु पोसोरिंग सहेन किस मन्तोर इदाम समजेमाम्ट। अदामे मावोर मायातोर तमो पोलुस वने ओद पिसानाता बारेते आपुनतुन परमेस्वरताल पुटता ओद ग्यानता अनुसार मिकुन कोटतोर।

¹⁶ अनि पोलुस इव पोल्लोता बारेते आपुना सबोय पत्रतिगा कोटतोर अनि ओव पत्रतिगा हुचुक पोल्लोंग समजेमायान साटि कठिन मन्तांग। अनि परमेस्वरना पोल्लोता अर्थ दुसरो लोकुरकुन खरोय रितिते वेहान साटि करहोरक, अनि येसु मसिना खरोय विस्वासते चन्चल लोकुरक परमेस्वरना पवित्र पुस्तकता दुसरो भाग लेहकाय पोलुसना पत्रता अर्थतुन वने गलत रितिते करहान्तोर इन्जोर आपुने नाश किन्तोरक।

¹⁷ इन्जोर हे प्रिय गोतियालोरक, निमाट पहलेटाले इव पोल्लोनुंग पुन्ज इन्जोर परमेस्वरना मुने खराब बुतो केवालोरा खोटाल करिहनाता कारण आपुना विस्वासता स्थिरतातुन तासिमाट इन्जोर हुशार मन्ट।

¹⁸ मावोर प्रबु अनि पिसिहवाल येसु मसिना दया अनि पुन्दानातिगा विळसोर हन्ट। ओनाय दरोज अनि सबोय काळदे महिमा आसोर मनि। आमिन।