२ पतरस 2 - Muria Far Westernनिमाट खोटाल करिहवालोर लोकुराताल सावदान मन्ट 1 इस्रायेल लोकुरकनिगा आपुनास परमेस्वरना पोल्लो वेहवाल आन्दोम इदाम खोटाल वळकवालोरक मतोरक; अदामे मियागा वने खोटाल करिहवालोर आयनुरक, अनि ओर लोकुरक मसि विस्वासता नाश किन्ता गलत करिहना मकस मकस करहान्तोरक, अनि ओरक आपुनतुन किमत हिस असतुन स्वतन्त्र कितोर ओर हजोर प्रबुन वने इन्कार किस आपुनतुन सान्डेय नाशतिगा वाटसियानुरक। 2 पकाय लोकुरक ओरा खराब चालचलन हुळसुन ओरा परके आयनुरक अनि ओर खोटाल करिहवाल लोकुरा कारण परमेस्वरना खरोयता हरिता निन्दा आयार। 3 ओरक खोटाल करिहवाल लोकुरक ओरा पकायि लालुचता कारणते आपुना बनेहकिता दोखाता पोल्लो वळकस मियाकेडाल धन कमेह कियानुरक। ओरा दन्ड परमेस्वरना द्वारा पकाय पहलेटाले तयार किन्ता। ओरा साटि तयार किता ओद नाश ओरकुन हर हुळिला आता। 4 पाप किता ओरक स्वरगदूतकुन वने परमेस्वर आदर केवोर आस नरकता आन्दार गुमयातिगा न्यायता दियावनाह केपसोर मनिर इन्जोर बन्दि किस वाटसीतुर। 5 अनि पहलेटा काळता दुनियाता लोकुरकुन वने आदर केवोर आस परमेस्वरना आग्या पालन केवोर दुनियाता लोकुरा पोरो हजोर उसा लोहतुर, अनि परमेस्वरना मुने येताना योग्य ठहरे मायान बारेते प्रचार कितोर ओर नुहाल अनि ओनासंग सात लोकुरकुन पिसिहतुर। 6 सदोम अनि अमोरा लेहका सहेरकुन नाशता दन्ड हिस निर बनेहकिस ओव सहेरतोर लोकुरकुन दन्ड हितुर इदाम परमेस्वरना नियमता विरोदते ताकवाल लोकुरकुन इद उन्दि उदाहरण आयि। 7 ओर परमेस्वरना नियमतुन विरोदते ताकवाल पापि लोकुरा नडुम मन्ज ओरा अशुद्ध पापता चाल-चलन हुळस-हुळस अनि केन्ज-केन्ज, 8 सबोय दिया आपुना खरोय मन्दिगा पकाय दुःखते मतोर परमेस्वरना मुने येताना योग्य मन्तोर ओर लूत पोरोयतोर मानेयतुन पिसिहतुर। 9 परमेस्वरना मुने येताना योग्य लोकुरकुन पकायि तकलिपताल बदाम पिसहाना, अनि परमेस्वरना नियमता विरोदते ताकवाल पापि लोकुरकुन न्यायता दियावनाह दन्ड हियान साटि बदाम इरिला पहाजे इदेन प्रबु पुन्तोर। 10 विशेषाल बोर आपुना मेन्दुलता अनुसार अशुद्ध इच्चाता परके ताकान्तोरकुन अनि सबोय अदिकारतुन तुच्च मानेमान्तोरकुन वने। अनि ओरक खोटाल करिहवालोरक ओरा गलत बुतो कियान साटि पकाय हिमत मन्तोरक, अनि हजोर पदवालोरा वने निन्दा कियान साटि वरियोरक। 11 ते वने स्वरगदूत ओद लाव अनि सामर्थतिगा ओर खोटाल करिहवालोर लोकुरकताल हजोर मन्तोर, प्रबुना मुने ओरक खोटाल करिहवालोर लोकुरा विरोद बाताले खराब गलति इन्ज दोष लावे केवोरक। 12 मति येरक खोटाल करिहवालोरक केवल मानेयना कयते पयस हव्काना साटि जनम आता केळाता निरबुद्धि जानवर लेहका मन्तोरक। अनि बोव पोल्लोनुंग ओरक बाताले पुनोरे अदेना बारेते दुसरो लोकुरकुन गलति खराब इन्तोरक, मानेय जानवरकुन हव्कान्तोरक अदामे परमेस्वर येर खोटाल करिहवालोरकुन वने नाश कियानुर। 13 अनि ओरक पकायि लोकुरा पोरो पकायि तकलिप आयाना कारण आतोरक इन्जोर ओरा पोरो वने पकायि तकलिप आयार। दियाता वेळिचितिगा भोग-विलास कियान साटि ओरकुन बोदे लज्जा हिले। ओरक मियासंग तिन्तोर-उन्तोर ते आपुनिकेडाल मयाता जेवन किस भोग-विलास किन्तोरक इन्जोर ओरक पान्डरि सन्दरातिगा काला डाग बदाम खराब हुळस लन्जाता कारण आयार अदामे ओर लोकुरक वने निमाट विस्वासि लोकुरा नडुम डाग लेहका लन्जाता कारण आयार। 14 ओर लोकुरक व्यभिचारता इच्चाते सबोय लोकुरकुन दरोज हुळान्तोर अनि इदाम पाप कियाना ओरा इच्चा बसकेय बन्द केवोर आयनुरक। अनि मसिना विस्वासते कमजोर मन्तोरक चन्चल मनवालोर लोकुरकुन ओर लोकुरक पाप कियाना साटि फसेह किन्तोर। अनि ओरा लालुचता जरुरतुन पुराकियान साटि ओर लोकुरक सबोय पोल्लोंग पुन्तोरक। अनि परमेस्वर ओरकुन दन्ड हियानुर। 15 ओरक खरोय हरितुन तासिस परमेस्वरना मुने गलत बुतो किस डबुंग कमेकेवाल बवोरनोर मरि बिलयामना हरिते हतुरक। 16 अनि ओना गलत बुतोता अनुसार परमेस्वर ओन रांगतुर। परमेस्वरना आग्या पालन केवोर ओर परमेस्वरना पोल्लो वेहवाल बिलयामिन, बसकेय वळकिला परो मन्ता ओना गदि ओना गलत बुतोता कारण मानेयना लेंगदे वळकस ओना निर्बुध्दितुन समजेह किस ओना मूरखतातुन रोके कितु। 17 येर खोटाल करिहवालोरक लोकुरक वतिता झरा लेहका मन्तोरक, अनि वळिय उळेहकिस ओन्ता एर हिले ढगिंग लेहका आन्दुरक, ओरा साटि परमेस्वर अनन्त काळता आन्दारता जागा ठहरे किस मतोर। 18 ओरक खराब बुतो किस-किस जिवित मन्वालोर लोकुरकनिकेडाल पकायि मुसकिलते इदेक पिसिस वातोर ओर लोकुरकुन, येरक बेकार हजोरपणता पोल्लोंग वळकस वळकस आपुना शारिरिक इच्चाता खराब बुतो कियाना साटि फसेकिहिन्तोरक। 19 ओरक आपुनाय पकायि खराब स्वभावता दास मन्तोरक ते वने दुसरो सबोय लोकुरकुन वने स्वतन्त्र कियानाता बारेते वाचा किन्तोरक। बाक्याकि वरोर मानेयना पोरो बोद पोल्लो अदिकार किन्ता ओर अदेना दास मन्तोर। 20 ओरक मावोर प्रबु अनि पिसिहवाल येसु मसिना पुन्दाना द्वारा सन्सारता अलग-अलग प्रकारता अशुद्धताताल पिसियतोर, असा ओव पोल्लोतिगा हिरक्स हारेमातुर ते ओरा आकरि दसा पहलेटाल वने खराब आयार। 21 बाक्याकि ओरकुन सोपे किस मता परमेस्वरना ओद पवित्र आग्याता बारेते पुन्जुन, पजा अदेन तासिस मलस दान्तोरिट ते परमेस्वरना मुने येताना योग्य बुतोंगता बारेते ओर बसकेय पुनोर आस मन्दाना ओरा साटि सोबायि मता। 22 “नय आपुना पोरसतातिकेय मलस अदेन तिन्ता”, अनि “उन्दि नोरता पदि चिकलातिगा लोरेमायिला असा मलस दान्ता” इदाम कहावट लेहका ओरा स्थिति आता। |
© (Active) Wycliffe Bible Translators, Inc. All rights reserved.
Wycliffe Bible Translators, Inc.