२ पतरस 1 - Muria Far Westernअभिवादन 1 येसु मसिनोर दास अनि येसु मसिना खास चेलाल शिमोन पतरस, मावोर परमेस्वर अनि पिसिहवाल येसु मसिना दारमिकताता द्वारा मावालेहका पकाय किमति विस्वास पुटहान्तोर ओर लोकुरक साटि इद पत्र कोटान्तोर। 2 परमेस्वर अनि मावोर प्रबु येसुना पुन्दानाता कारण दया अनि शान्ति मियागा पकाय विळसोर हनि। परमेस्वरना केयाना अनि आचाना 3 आपुना दारमिकता अनि महिमाता सहभागि आयान साटि माकुन केयतोर ओर परमेस्वरना बारेता मावा पुन्दानाते परमेस्वरना गिरिदा किस जिवेमायान साटि बाताले माकुन जरुरि मन्ता ओद सबोय आपुना दिव्य लावता द्वारा परमेस्वर माकुन हितोर। 4 इद दुनियातिगा लोकुरा खराब इच्चाता कारण मन्ता ओद नाशताल पिसिच, परमेस्वरना स्वभावता सहभागि आयान साटि ओर अवेहना द्वारा माकुन पकाय किमति अनि पकायि महान वाचांग हितोर। 5 इदे कारणते निमाट आपुना विस्वासतासंग लोकुरक साटि सोबायि बुतो कियाना पकायि हिमत, अनि अदेनासंग परमेस्वरना बारेता पुन्दाना, 6 अनि परमेस्वरना बारेता पुन्दानातासंग संयम अनि संयमतासंग विस्वासते स्थिर मन्दाना, अनि स्थिरतातासंग परमेस्वरना गिरिदा कियाना बुतोंग कियाना, 7 अनि परमेस्वरना गिरिदा कियाना बुतोंगता संग वरोन दुसरोन मदत कियाना साटि दया अनि दयातासंग बन्धुभावता मया विळहाना साटि सबोय प्रकारता कोसिस किम्ट। 8 बाक्याकि इव सबोय गुणंग मियागा मन्तांग अनि अदेना विकास आयिला आता ते मावोर प्रबु येसु मसिना पुरा ग्यानता बारेते हलकायिते बुतो किस पकायि कायांग ततान साटि मिकुन मदत किन्ता। 9 बाक्याकि इव पोल्लोंग बोनिगा विकास केवोर ते ओर आन्दराल मन्तोर। अनि ओर मुने वायाना पोल्लोंगता बारेते समजेमाय परोर अनि ओर आपुना जुनाल पापतुन नोरस शुद्ध आतोर इन्जोर मरिंगतोर मन्तोर। 10 इन्जोर हे बायि-दादालोरक, परमेस्वर मिकुन खरोय केयतोर अनि आचतोर ओद पोल्लोतुन मिया मन्दे पका कियान साटि सोबाय कोसिस किसोर हन्ट, बाक्याकि इदाम कियाकिट ते बसकेय मिया विस्वास जिवनतिगा कोदोर हेवि आयकिट। 11 इदाम कियाकिट ते निमाट मावोर प्रबु अनि पिसिहवाल येसु मसिना अनन्त काळता राज्यतिगा हजोर आदरतासंग हन्दा परकिट। पतरस आपुना हायानाता मुने कियाना बुतोता बारेते 12 इन्जोर निमाट इव पोल्लोंग पुन्तोरिट, अनि बोद खरोय पोल्लो मिकुन पुटता अगा टिकेमास मन्तोरिट ते वने नना मिकुन इव पोल्लोंग असा आलहिच हियान साटि दरोज तयार मनका। 13 मावोर प्रबु येसु मसिहाल नावागा प्रगट कितोर अदाम लेहका नावा तम्बु लेहका मन्ता इद मेन्दुलता नाश सान्डेय वायवाल मन्ता इन्जोर पुन्तोना। 14 इन्जोर नना इद तम्बु लेहका मन्ता नावा मेन्दुलतिगा मनका अचोक दियांग इव पोल्लोंग मिकुन आलहिच केपसोर इराना नाकुन उचित मन्ता इदाम विचार किन्तोना। 15 इन्जोर नावा हातपा पजा निमाट इव सबोय पोल्लोनुंग दरोज आल्हान साटि नना पकायि कोसिस कियाका। मसिना महिमा हुळता गवाह 16 बाक्याकि बसके माक मिकुन आपुना प्रबु येसु मसिना लावता अनि ओना असा मलस वायानाता पोल्लो मिकुन हिस मतोम ओद हुशयारिते मानेय बनेकिता पिटोता अनुसार हिले आसि बाक्याकि माक आपुनास ओना महिमातुन हुळस मतोम। 17 बाक्याकि “येर नावोर मायातोर मरि आन्दुर, ओनाताल नना गिरदा मन्तोना” इन्जोर ओद पकाय महिमाताल इद लेंग वातु असके ओर बाबो परमेस्वरनिकेडाल आदर अनि महिमा ओन पुटतुर। 18 माक ओनासंग पवित्र मटा पोरो मतोम असके स्वरगताल इद लेंग वायानपा केन्जतोम। 19 बाक्याकि परमेस्वरना पोल्लो वेहवालोरा पोल्लो इद घटनातुन पका किस मावा हेरे मन्ता। अनि वियाना बेरा आसुन मिया मन्दिगा सकारिता हुको पसियानवनाह अन्दकारतिगा उन्दि दिवाता वेळिचि लेहका निमाट परमेस्वरना पोल्लो वेहवालोरा ओद पोल्लोतुन ध्यान हियाकिट ते मिकुन बेस आयार। 20 मति पवित्र पुस्तकता बोनाय परमेस्वरना पोल्लो वेहवालोरा सन्देश बोनाय मन्दा विचारते आपुना इच्चाता अनुसार वेहोर इन्जोर पहले पुन्ट। 21 बाक्याकि परमेस्वरना पोल्लो बसकेय मानेयना इच्चाते आयो मति परमेस्वरना प्रेरणाते मानेय पवित्र आत्माता द्वारा परमेस्वरना पोल्लोंग वळकन्दुर। |
© (Active) Wycliffe Bible Translators, Inc. All rights reserved.
Wycliffe Bible Translators, Inc.