२ कुरिन्थुस 9 - Muria Far Western

पवित्र लोकुरक साटि दानता मदत

¹ परमेस्वरना लोकुरक साटि दान हियाना सेवाता बारेते नना मिकुन कोटाना जरुरि हिले।

² बाक्याकि निमाट मदत कियान साटि पकाय इच्चाते मन्तोरिट इन्जोर नना पुन्तोना। मदत कियाना मिया सोबाय मन्दा बारेते नना मकिदुनिया प्रदेशता लोकुरा मुने मिया हजोरपण तोहतोना। अखया प्रदेशतोर लोकुरक निरेटाल मदत कियान साटि तयार मतोरक। अनि दान हियाना मिया गिरिदा हुळस इगा पकाय लोकुरकुन दान हियाना साटि प्रोत्साहित किता।

³ मिया बारेते माक किता हजोरपण व्यर्थ आयो आयार इन्जोर साटि नना वेहचोर मतोना लेहका निमाट तयारिते मन्दाना साटि नना तमो लोकुरकुन लोहतान।

⁴ आयोते मकिदुनियाता बोरे विस्वासि लोकुरक नावासंग मियाके वायनुर अनि निमाट तयार मन्वि आयकिट इदाम हुळानुरक ते केवल निमाट आयो मति माक वने मिया बारेते मता ओद विस्वासता कारण लज्जा आयकोम।

⁵ इन्जोर ओर तमो लोकुरक नावा मुने मिया हेरे वायिर अनि निमाट मुने वाचा हितोरिट ओद दान मुनेय उदारताते तयारिते इरान साटि तमोलोकुरकुन प्रोत्साहन कियाना जरुरि मन्ता इदाम समजेमातान। इदाम ओद दान मावा जबरदस्ति आयो मति मिया उदारताते जमाकितोरक इन्जोर तोहिर।

⁶ हुळुक विजा वीतानतोर ओर हुळुके कोयानुर अनि पकाय विजा वीतान्तोर ओर पकाय कोयानुर इन्जोर इद पोल्लोता ध्यान इराट।

⁷ वरोर वरोर मानेय आपुना मन्दिगा बचोन दान हियाला पाहाजे इन्जोर इच्चा किन्तोरक अचोन दान केविर। निमाट बळबळेमास आयो अनि बोनाय जबरदस्तिते आयो मति गिरिदाते दान हेवाल लोकुरकुन परमेस्वर मया किन्तोर।

⁸ निमाट सबोय पोल्लोतिगा दरोज गिरिदा आस मिया सबोय सोबाय बुतोतिगा पकाय विळान साटि मिकुन सबोय प्रकारता वरदान पकाय हियाना साटि परमेस्वर लाववाले मन्तोर।

⁹ “ओर उदारताते गरिब लोकुरकुन पकाय दान हितुर, ओना सोबायि बुतो दरोज आलहान्तोरक” इन्जोर पवित्र पुस्तकतिगा कोटता मन्ता।

¹⁰ मति विजा वीतवालेन विजा अनि तिन्दान साटि रोटि परमेस्वर हिन्तोर। ओर परमेस्वर मिकुन वीतान साटि विजा हियानुर अनि ओद विजातुन हादिहनुर अनि सबोय मन्दे हियाना मिया मन्दुन परमेस्वर आशिष किस बरसाहनुर।

¹¹ निमाट सबोय बेरा उदारताते हेवालोर आयान साटि परमेस्वर मिकुन सबोय प्रकारते सावकार बनेहकिस ओद मावा द्वारा परमेस्वरना स्तुति कियाना कारण आयि।

¹² बाक्याकि इद सेवा पुरा कियानाते केवल पवित्र लोकुरा जरुरि पुरा आयो मति लोकुरकनिकेडाल परमेस्वरना पकाय स्तुति आयाना कारण आन्ता।

¹³ मसिना सोबाता पोल्लोता आग्यातुन निमाट मानेमायानाता कारण, येरुसलेम सहेरता पवित्र लोकुरक अनि दुसरो सबोय विस्वासि लोकुरकुन उदारताते मदत कियाना हुळसुन विस्वासि लोकुरक परमेस्वरना धन्यवाद कियानुरक।

¹⁴ इचोने आयो मति मिकुन परमेस्वर हिता पकाय हजोर दयाता कारण विस्वासि लोकुरक मिकुन मिलेमायाना पकाय इच्चा किस मिया साटि प्रार्थना किन्तोर।

¹⁵ माक वर्णन किया परोम परमेस्वरना दान साटि परमेस्वरिन धन्यवाद आयि!