२ कुरिन्थुस 8 - Muria Far Westernउदारताते दान हियाना 1 हे बायि-दादालोरक, मकिदुनिया सहेरता मसिलोकुरा सभातिगा पुटता परमेस्वरना दयाता बारेते माक मिकुन वेहिन्तोरोम। 2 बाक्याकि पकाय तकलिपता हजोर परिक्षातिगा मतोरक ते वने ओर विस्वासि लोकुरक तिन्दाना उन्डाना अनि आपुना बाताले जरुरितुन पुरा कियान साटि डबुंग हिले आसि ओद बेरावनाह ओरक पकाय गिरिदाते पकाय दान हितुरक। 3-4 अनि पवित्र लोकुरा सेवातिगा सहभागि आयानाता इद दान्ता बारेते ओर माकुन असा असा पकाय विनन्ति कितोरक। ओरक हिया परन्दुरक अचोने दान हितुरक अनि इचोने आयो मति आपुना मन्दे ओरक हिया परन्दुरक अदेनताल वने पकाय दान हितुरक इन्जोर नना गवाहि हिन्तोना। 5 इदाम ओरक दान हितोर ओद माक ओराकेडाल आशा मता अदामे आयो; मति डबुंग दान हियाना मुने ओरक आपुनतुन प्रबुन सोपे कितुरक पजा परमेस्वरना इच्चाते मावा साटि वने आपुनतुन सोपे कितुरक। 6 इदाम तितुस सुरु कितोर इद दयाता बुतो मिया नडुम पुरा कियाला पहाजे इन्जोर माक तितुसिन विनन्ति कितोम। 7 मति मिया मजबुत विस्वास, सोबाता पोल्लो वेहानाता वरदान, आत्मिक पोल्लोता बारेता ग्यान, सबोय प्रकारता उत्साह अनि मावाकेडाल करिहता माया, इदाम सबोय पोल्लोतिगा निमाट मुने मन्तोरिट अदामे इद दान हियानाता बुतोते वने निमाट मुने हन्ट। 8 इद नना आग्या लेहका आयो मति दुसरो लोकुरकुन मदत कियाना साटि मिया मया बचोन खरोय मता इदाम परिक्षा किस तोहान साटि मन्ता। 9 मावोर प्रबु येसु मसि सावकार मन्ज वने ओना गरिब आयानाते निमाट सावकार आयकिट इन्जोर ओर मिया साटि गरिब आतुर ओना ओद दयातुन निमाट पुन्तोरिट। 10 अनि इव पोल्लोतिगा नावा विचार इदाम मन्ता: निमाट निरेटाल दान हियानाता इच्चाते सबोयता मुने मतोरिट अनि दान हियानातिगा वने सबोयताल मुने मतोरिट। 11 इन्जोर इदेक ओद बुतो पुरा कियाना मिया साटि सोबायि मन्ता। असके मिया दान “कियाना” अनि मिया दान “कियान साटिता ओद इच्चाता” इद रन्डास पोल्लोंग बराबर आयार। अदामे निमाट बचोन हिया परान्तोरिट अचोन दान हिम्ट। 12 बाक्याकि दान हियानाता तयारि मन्ता ते बचोन हिया परान्तोरिट अचोन हिम्ट ओद परमेस्वरना येताना योग्य मन्ता। बोरे आपुना धनताल विळस दान हेविर इदाम आशा बोनाकेडाले केवोर। 13 मिया दानते दुसरो लोकुरकुन सुख पुटि अनि मिकुन तकलिप आयि इदाम नावा इच्चा हिले। मति निमाट इवुरास तुल्य मनकिट। 14 इदेक मिया हेरे पकायि धन मन्ता इन्जोर बोन जरुरि मन्ता ओर लोकुरा जरुरतुन पुरा किम्ट। अनि ओरक लोकुरा हेरे पकायि धन मन्दार ओद बेरा ओर लोकुरक मिया जरुरितुन पुरा केविर। इदाम सबोय लोकुरक बरोबर आयिर। 15 “पकायि जमा कितुर ओन पकायि मनो आतु अनि हुचुक जमा कितुरक ओन कमि आयो” इदाम पवित्र पुस्तकतिगा कोटता मन्ता। तितुस अनि ओनासंग बुतो केवालोर संगवारि लोकुरक 16 मिया साटि मदत कियाना माकुन चिन्ता मन्ता अदामे तितुसना मन्दिगा वने मिया मदत केविर इदाम चिन्ता हितोर परमेस्वरतुन नना धन्यवाद हिन्तोना। 17 तितुस केवल मावा विनन्तितुन मानेमातुर इन्जोर आयो मति ओर आपुना इच्चाते पकायि उत्साहते मियाके वायिला आतोर। 18 परमेस्वरना सोबाता पोल्लो वेहान साटि मसिलोकुरा सभातिगा पोरोय पकायि फयले माता वरोर तमोन माक ओनासंग लोहिला आतोरोम। 19 अनि इचोने आयो मति प्रबुना महिमासाटि अनि मावा मन्दा तयारि दिसान साटि मावा सेवाते मन्ता उदारताते दान हियाना ओद बुतो साटि मावासंग हनिर इन्जोर सबोय मसिलोकुरा सभाताल ओन ठहरे वने कितोर मन्तोर। 20 इद उदारताता दान हियाना बुतोता बारेते बोरे दोष हेमाकिर इन्जोर माक ओव पोल्लोतिगा हुशयार मन्ज, 21 केवल प्रबुनाय मुने आयो मति मानेयना मुने वने सोबाय मन्ता ओव पोल्लो कियाना मावा लक्ष मन्ता। 22 अनि माक पकाय बेरा असा असा परिक्षा किस ओन पकाय पोल्लोतिगा उत्साहि आस कलियतोम। अनि इदेक ते मियाबारेते ओना हिमत असा वने विळतु इन्जोर ओर असा वने पकायि उत्साहि मन्तोर मावोर ओर तमोन वने ओरासंग लोहिलातोना। 23 ते बोरे तितुसना बारेते पुच्चेमायनुर ते ओर नावोर संगवारि अनि मिया साटि नावासंग बुतो केवाल आन्दुर। अनि मावोर तमो लोकुरा बारेते पुच्चेमायनुर ते ओर मसिलोकुरा सभाताल आचुन लोहतोर अनि मसिनोर महिमा आन्दुरक। 24 इन्जोर मिया मया अनि मिया बारेते मावा हजोरपणता सबुत किस मसिलोकुरा सभाता मुने तोहाट। |
© (Active) Wycliffe Bible Translators, Inc. All rights reserved.
Wycliffe Bible Translators, Inc.