२ कुरिन्थुस 7 - Muria Far Western

¹ इन्जोर हे नावोर बायि-दादालोरक, इव वाचांग माकुन पुटतांग इन्जोर वराट माक परमेस्वरना मुने आपुना मेन्दुलता अनि आत्माता अशुद्ध किन्ता पोल्लोंग सबोय हरचिस परमेस्वरतुन मानेमास पवित्रतातुन पुरा केविट।

मसिलोकुरा सभा आपुना गलतिता बारेते पस्तेमान्तोरक

² निमाट माकुन मया किम्ट, माक बोनाय बाताले खराब केवोम, बोनाय नाश केवोम अनि बोनायनिकेडाले बाताले दोखा किस बोदे फायदा येतोम।

³ माक मियासंग जिवन जिवेमायान साटि अनि हायान साटि वने तयार आस मावा मन्दिगा निमाट मन्तोरिट इदाम नना मिकुन मुने इतोना। इन्जोर नना मिकुन दोष लावेकियान साटि आयो इद पोल्लो इन्तोना।

⁴ नाकुन मियागा पकाय विस्वास मन्ता अनि नना मिया लोकुरकनिगा पकाय हजोरपण किन्तोना इदेनते नाकुन पकाय शान्ति वने पुटान्ता अनि आपुना सबोय तकलिपतिगा नना पकाय गिरिदाते मन्तोना।

⁵ बाक्याकि माक मकिदुनिया प्रदेशतिगा वातोम असके वने मावा मेन्दुलतुन बाताले सुख पुटो मति माकुन नालुंगास बासाडाल पकाय तकलिप आन्दु, बाहरो दुसरो लोकुरक माकुन सतेह कितुरक अनि मावा मन्दिगा वने वरे मता।

⁶ मति दुःखि लोकुरकुन शान्ति हेवाल परमेस्वर तितुसिन इगा अविहच माकुन शान्ति हितुर।

⁷ केवल ओना वायानाते आयो मति निमाट ओन हिता हिमते माकुन शान्ति पुटतु। अनि निमाट नाकुन हुळिलाय पकाय इच्चा किन्तोरिट अनि नावासंग मता मिया दुःखता संबन्दता बारेते पकाय दुःखते नावासंग निमाट असा मजबुत संबन्द कियाना पकाय इच्चा किन्तोरिट इन्जोर तितुस मिया बारेते वेहतुर। अदेन केन्जुन नावा गिरिदा असा पकाय विळतु।

⁸ बाक्याकि नना इदाम उन्दि पत्र कोटाना कारण मिकुन दुःख आतु ते वने नना ओद पत्र कोटतान इन्जोर पस्तेमायोन, मुने नाकुन इदेना बारेते खरोय दुःख आस मता बाक्याकि ओद पत्रते मिकुन हुळुक बेरावनाह दुःख आस मता।

⁹ ते वने इदेक नना गिरिदा आतोना। मिकुन दुःख आतु इन्जोर नाकुन गिरिदा आयो मति ओद दुःखता कारण निमाट पस्तेमातोरिट इन्जोरे नना गिरिदा आतोना। निमाट परमेस्वरना इच्चाते दुःख कितिट इन्जोर इदेनते मिकुन मावाकेडाल बोदे नुकसान आयो।

¹⁰ बाक्याकि परमेस्वरना इच्चाता अनुसार वरोरे मानेय दुःख किन्तोर ते ओद ओना पस्तेमायानाता कारण आयनुर। अदेनते ओना मुक्ति आयार। इन्जोर मिया ओद दुःख साटि माक बाताले पस्तेमायिला लागो। मति इद सन्सारता पोल्लोंगते मावा जिवनते वान्ता दुःखते बोरे मानेय पस्तेमायोर मति ओद केवल अनन्त काळता हायाना दन्ड साटि कारण आन्ता।

¹¹ परमेस्वरना इच्चाता अनुसार आता दुःख मिया जिवनतुन बचोन बदले कितु इन्जोर हुळाट। ओद दुःख मिकुन मिया बुतो कियान साटि पकाय हुशियार बनेकितु अनि निमाट निरदोष मन्तोरिट इदाम आपुनतुन तोहान साटि पकाय इच्चा कितोरिट। अदेनते निमाट पापता विरुद पकाय होंगवाले अनि पापता फासातिगा अरकिट इदाम पकाय वरे इरवाल आतोरिट, अदेनते नाकुन हुळान साटि मिकुन पकाय उत्साह आतु, अदेनते निमाट पकाय ध्यान इरवाल बनेमातोरिट, अनि खराब लोकुरकुन दन्ड किस केवल खरोय पोल्लो कियान साटि मिकुन उत्साह किता, इदन्ते सबोय पोल्लोतिगा निमाट निरदोष मन्तोरिट इन्जोर आपुन्तुन तोहतोरिट।

¹² गुनाकेवालोर या अन्याय सहन केवालोरक मानेयना कारणते आयो नना ओद पत्र मिकुन कोटतोना मति मावा बारेते मिया मया परमेस्वरना मुने दिसि इन्जोर इद पत्र कोटस मतोना।

¹³ इदेनते माकुन शान्ति पुटतु। अनि मावा इद शान्तिता संग तितुसना मन्दुन मिया सबोय लोकुरक सुख हितुर इन्जोर ओना गिरिदासंग माक असा वने पकाय गिरिदा आतोम।

¹⁴ बाक्याकि नना ओना मुने मिया बारेते बाताले हजोरपण कितान ते लज्जा आयोन, मति माक मिकुन सबोय पोल्लोंग खरोय खरोय वेहच मतोरोम अदामे तितुसिन मिया बारेते मावा हजोरपण कियाना खरोय आतु।

¹⁵ अनि पकाय वरेते कसिंगसोर निमाट ओन येचुन ओन निमाट सबोय लोकुरक मानेमातोरिट, अदेना बारेते ओर अलहानबेरा ओना मया असा वने विळान्ता।

¹⁶ माकुन सबोय पोल्लोतिगा मियागा भरोसा मन्ता इन्जोर नना पकाय गिरिदा किन्तोना।