२ कुरिन्थुस 6 - Muria Far Western

¹ माक परमेस्वरना बुतो मिया संगे केवालोर मन्तोरोम इन्जोर परमेस्वरताल मिकुन पुटता ओद दया बेकार हन्दिला हेमाट इन्जोर मिकुन विनन्ति किन्तोरोम।

² “येताना योग्य बेरा नना मिया केन्जतान अनि पिसानाता दिया नना मिया मदत कितान” इन्जोर परमेस्वर इन्ज मतोर। हुळाट परमेस्वर माकुन येताना साटि ओद खरोय बेरा इदेक मन्ता अनि इदेके परमेस्वर माकुन पिसाना साटि मन्ता दिया मन्ता।

³ येसु मसिना सोबाता पोल्लो वेहाना मावा बुतोतुन बोरे दोष हेमाकिर इन्जोर माक बोदे पोल्लोतिगा बोनाय तकलिप आयार इदाम बोदे सन्दि हेवोम।

⁴ माक पकाय हिमते तकलिपतुन सहेनकिस गरिबिते अनि सन्कटता नडुमताल मुने हन्जुन इदाम सबोय पोल्लोतिगा परमेस्वरना सेवक लेहका आपुना सोबाय गुणतुन माक तोहान्तोरोम।

⁵ विरोदि लोकुरक माकुन सोटाते हाहान्तोरक अनि मावागा दोष लावे किस जेहलतिगा वाटस हिन्तोरक, अनि नाटेना पकाय विरोदि लोकुरक पकाय होंग आस माकुन विरोद किस वाहाचान्तोरक, माक बिना हुन्जवाय अनि तिन्दान साटि बाताले पुटो ते उपास मन्ज परमेस्वरना बुतोतुन पकाय मेहनत किन्तोरोम।

⁶ अनि माक परमेस्वर हिता ग्यानते आपुना पवित्रताते, अनि धिरजताते, दुसरो लोकुरकुन दया कियानाते माक परमेस्वरना सेवक लोकुरक आन्दोम इदाम तोहान्तोरोम। पवित्र आत्माता द्वारा खरोय मयाते,

⁷ परमेस्वरना खरोय पोल्लो इमान्दारिते वेहचुन, परमेस्वरना लाव मावागा बुतो किसोर मता, आपुना विरोदि लोकुरा सबोय विरोदि बुतोताल पिसान साटि परमेस्वरना मुने येताना योग्य जिवन जिवेमान्तोरोम।

⁸ हुचुलोर लोकुरक माकुन आदर किन्तोरक मति दुसरो हुचुलोर लोकुरक माकुन अनादर किन्तोरक। हुचुलोर लोकुरक मावा प्रशंसा किन्तोरक मति दुसरो हुचुलोर लोकुरक मावा विरोदते निन्दा किन्तोरक। मावोर विरोदि लोकुरक माक खोटाल समजेमान्तोर मति माक खरोय वळकान्तोरोम।

⁹ हुचुलोर लोकुरक माकुन पुनवाप लेहका हुळतोरक मति सबोय लोकुरक माकुन सोबायि पुन्तोरक, माक हायवाल मानेय लेहका मन्तोरोम ते वने हुळाट! माक जिवित मन्तोरोम, माक दन्ड पुटता मानेयक लेहका मन्तोरोम ते वने लोकुरक माकुन हव्कोरक।

¹⁰ माक दुःख कियान साटि पकाय पोल्लोंग मन्तांग ते वने माक दरोज पकाय गिरिदाते मन्तोरोम, माक गरिब लेहका मन्तोरोम ते वने माक दुसरो लोकुरकुन सावकार बनेकिन्तोरोम, मावा हेरे बाताले हिले ते वने सबोय मावाय मन्ता।

¹¹ हे कुरिन्थुस सहेरतोर बायि-दादालोरक, माक सबोय पोल्लोंग इमान्दारिते इतोरोम, माक पुरा मन्दे मिकुन मया किन्तोरोम।

¹² मिया साटि मावा मया कमि आयो मति निमाट माकुन मया कियाना कमि कितोरिट।

¹³ मिकुन आपुना बालक लेहका समजेमास नना मियासंग वळकतान, माक मियासंग किता मयाता बदला निमाट वने आपुना मन्दे सोबायि मया मावागा तोहाट।

मसिनिगा विस्वास केवोर लोकुरासंग संबन्द कियानाता बारेते चेतावनि

¹⁴ मसिनिगा विस्वास केवोरक लोकुरा खराब चालचलनतासंग निमाट संबन्द केमाट। बाक्याकि खरोय अनि खराब बाताल जोळेमायार बहे? या वेळिचि अनि अन्दकारतासंग बाताल संगत मन्ता?

¹⁵ अनि मसि सयतानासंग बाताल जमेमायार बहे? या विस्वासि अनि अविस्वासि ओरा विस्वासता संबन्दते बाताल संगत मन्ता?

¹⁶ अनि मूरतिहनासंग परमेस्वरना मन्डिलिता बाताल संबन्द मन्ता? बाक्याकि माक जिवित परमेस्वरना मन्दिर आन्दोम। “नना ओरासंग मनका अनि ओरासंग ताकिका; अनि नना ओरा परमेस्वर आयिका अनि ओरक नावोर लोकुरक आयनुरक” इदाम परमेस्वर इतोर इन्जोर पवित्र पुस्तकतिगा कोटता मन्ता।

¹⁷ इन्जोर “ओर लोकुरा नडुमताल पसिस अलग आम्ट इन्जोर प्रबु इन्तोर; अनि बोदे विटाळ चिजतुन इटमाट ते नना मिकुन येचुन”

¹⁸ “नना मियोर बाबो आयका अनि निमाट नावोर बालक आयकिट इन्जोर सबोयताल लाव वाले प्रबु परमेस्वर वेहिन्तोर।”