२ कुरिन्थुस 5 - Muria Far Western

स्वरगतिगा मन्दाना योग्य मेन्दुल

¹ इगा दुनियातिगा मन्दाना तम्बु लेहका हुचुक दियांग साटि मन्ता इद दुनियातिगा मन्दाना योग्य मावा मेन्दुल नाश आयार अनि बोरे कयदे बनेकेवोर ओद अनन्तकाळ साटि परमेस्वर बनेकिता उन्दि लोन मन्जे स्वरगतिगा मन्दाना योग्य मेन्दुल मावा साटि स्वरगतिगा मन्ता इन्जोर माक पुन्तोरोम।

² इन्जोर माक तम्बु लेहका मन्ता इद दुनियातिगा मन्दाना योग्य मेन्दुलतिगा मन्तोरोम अचोनवनाह तकलिपतासंग आपुना स्वरगता लोन मन्जे स्वरगतिगा मन्दाना योग्य मेन्दुलतिगा हन्ज मन्दान साटि पकाय इच्चा किसोर मन्तोरोम।

³ ओद मेन्दुल पुटिहकाट इन्जोर मावा इच्चा मन्ता अनि अदेन पुटहिच पजा मावा लोन हिले इदाम लेहका बसकेय मनोम आयकोम।

⁴ अनि माक तम्बु लेहका मन्ता इद मेन्दुलतिगा मन्जोर तकलिपते दुःख किसोर मन्तोरोम। बाक्याकि माक इद दुनियाते मन्दाना योग्य मेन्दुल हरचियाना इच्चाते आयो मति स्वरगतिगा मन्दाना योग्य ओद मेन्दुल पोन्डस अनन्त जिवनतिगा मिलेमायाना पकाय इच्चाते मन्ता।

⁵ अनि इद पोल्लोसाटि परमेस्वर माकुन बने कितोर। अनि परमेस्वर ओद पुनाल जिवन हियाना पका कियाना साटि बयानाता रुपते पवित्र आत्मा वने माकुन हितोर।

⁶ इन्जोर ओद पुनाल जिवन पुटार इदाम दरोज माकुन हिमत मन्ता। माक इद मेन्दुलतिगा मन्तोरोम अचोनवनाह माक प्रबुताल लक अनि परदेशि मन्तोरोम इन्जोर वने माक पुन्तोरोम।

⁷ बाक्याकि माक इदेक बाताल पोल्लोंग हुळिला परान्तोरोम अदेन आयो मति माक बाताल विस्वास किन्तोरोम मन्जे पुनाल जिवन पुटार ओद विस्वासता कारण माक जिवित मन्तोरोम।

⁸ इन्जोर माक पकायि हिमते मन्तोरोम इदाम नना वेहान्तोना। अनि इद मेन्दुलताल अलग आस माक प्रबुनसंग मन्दाना पकायि इच्चा किन्तोरोम।

⁹ इन्जोर माक इद दुनियाता मन्दाना योग्य मेन्दुलतिगा मनकोम या इद मेन्दुल तासिस स्वरगतिगा मन्दाना योग्य मेन्दुलतिगा मनकोम ते वने प्रबुन सोबायि गिरिदा कियालागार इदाम मावा इच्चा मन्ता।

¹⁰ आप आपुना मेन्दुलतिगा मन्दानपा माक सबोय लोकुरक सोबायि बुतो या खराब बुतो कितोम अदेना योग्य काया पुटान साटि माक सबोय लोकुरक मसिना न्यायता सिंहासनता मुने हाजर आयिला पहाजे।

परमेस्वरनासंग मेलमिलाप किस मन्दाना

¹¹ इन्जोर प्रबुन वरियसोर माक खरोयतुन येताना साटि लोकुरकुन समजेह किन्तोरोम। मावा अनि परमेस्वर मावा मन्दा उदेशतुन सोबाय पुन्तोर अनि निमाट वने मावा मन्दा उदेशतुन पुन्दिट इन्जोर नना आशा किन्तोना।

¹² माक मिया मुने असा आपुना हजोरपण केवोम। बाक्याकि बोना मन्दिगा मन्ता पोल्लोता बारेते आयो मति दिसान्ता ओद पोल्लोतिगा हजोरपण किन्तोर लोकुरकुन उत्तर हिया परकिट इन्जोर निमाट मावा बारेते हजोरपण कियाना साटि मिकुन सन्दि हिन्तोरोम।

¹³ बाक्याकि मावा “बुद्धि बराबर हिले” ते ओद परमेस्वर साटि मन्ता अनि माक हुशयार मन्तोरोम ते ओद मिया साटि मन्तोरोम।

¹⁴ वरोर मानेय मन्जे मसि सबोय लोकुरक साटि हातोर ते सबोय लोकुरक हातोरक इदाम माक सोबाय पुन्तोरोम इन्जोर मसिना मया माकुन उत्साहित किन्ता।

¹⁵ अनि जिवित मन्तोरक ओर लोकुरक इदेक आपुना साटि जिवेमायमाकिर मति बोर सबोय लोकुरक साटि हासुन असा जिवेमातोर ओर मसिना साटि जिवेमायिर इन्जोर मसि सबोय लोकुरक साटि हातोर।

मसिनिगा पुनाल सृष्टि

¹⁶ इन्जोर माक नेटाल दुनियाता लोकुरा नियमता अनुसार बोनाय न्याय केवो आयकोम। माक मसिन पहले दुनियाता लोकुरा नियमता अनुसार न्याय कितोम मति इदेक माक ओद दुनियाता लोकुरा नियमता अनुसार बसकेय मसिना न्याय केवोम।

¹⁷ इन्जोर मसिना संगते मन्तोर ओर मानेय पुनाल सृष्टि मन्तोर; जुनाल पोल्लोंग मारतुंग अनि इदेक सबोय पुनाल आतुंग।

¹⁸ इद सबोय पोल्लोंग परमेस्वरनिकेडाल मन्तांग, ओर माकुन मसिना द्वारा आपुनासंग मिले कितुर। दुसरो लोकुरक परमेस्वरनासंग सोबायि संबन्द केविर इन्जोर मिले कियानाता इद बुतो माकुन हितुर।

¹⁹ परमेस्वरना नियमता विरोद दुनियातोर लोकुरक किता पापतुन ओर मापि किसोर मसिना द्वारा ओरकुन आपुनिगा मिलेकियालागतुर, अनि मानेयतुन परमेस्वरनासंग मिलेकियाना इद पोल्लो लोकुरकुन वेहाना बुतो माकुन सोपे कितुर।

²⁰ इन्जोर माक मसिना राजदूत आस निमाट परमेस्वरनासंग मिलेमाम्ट इन्जोर माक मसिना पोरोयते विनन्ति किन्तोरोम। इद पोल्लो परमेस्वर मावा द्वारा मिकुन समजेह किन्तोर।

²¹ मसिनिगा बोदे पाप हिले आसि माक ओना द्वारा परमेस्वरना मुने येताना योग्य ठहरे मायिला पहाजे इन्जोर परमेस्वर मावा पापतुन ओना पोरो इरस मावा पापता साटि बलि बनेहकितुर।