२ कुरिन्थुस 4 - Muria Far Western

तोळियता दडिया लेहका मन्ता मावा मेन्दुलतिगा इरता आत्मिक धन

¹ इन्जोर परमेस्वरना दयाते माकुन सेवाकियाना सन्दि पुटतु इन्जोर माक बसकेय हिमत तासोर आस,

² माक लज्जाता गुपित बुतोतुन हरचिस दुसरो लोकुरकुन दोखा केवोम परमेस्वरना पोल्लोतिगा बाताले गलति पोल्लो मिलेह कियाना या परमेस्वरना पोल्लोताल बदले कियाना केवोम। इदाम खरोय पोल्लो वळकानाते माक परमेस्वरना मुने बचोन खरोय लोकुरक मन्तोरोम इन्जोर सबोय लोकुरकुन समजेमायार।

³ माक दुसरो लोकुरकुन वेहानतोरोम ओद येसुना सोबाता पोल्लो बोरे लोकुरकुन समजेमायो ते इद केवल नाश आयाना हरिते ताकिला आतोरक ओर लोकुरकुन समजेमायो।

⁴ मसि परमेस्वरना रुप मन्तोर। ओर मसिना महिमाता सोबाता पोल्लोता वेळिचितुन ओरक हुळिला परोर इन्जोर साटि इद सन्सारतोर स्वामि सयतान विस्वास केवोर ओर लोकुरा मन्दुन आन्दराल कितोर।

⁵ बाक्याकि माक आपुना बारेते वेहोम मति येसु मसिना बारेते ओर प्रबु आन्दुर इन्जोर वेहान्तोरोम अनि येसु मसिना कारण माक ते मिया लोकुरा दास आन्दोम इदाम माक वेहान्तोरोम।

⁶ बाक्याकि “आन्दारताले वेळिचि मान्जार” इदाम इन्ज मतोर ओरे परमेस्वर मसिना चेहराते दिसता परमेस्वरना महिमाता बारेता ग्यान माक पुन्दाना साटि मावा मन्दिगा मान्जिहतुर।

⁷ मति इद अत्भुत लाव मावा आयो मति परमेस्वरना आन्दु इन्जोर दिसान साटि इद धन तोळियता दडिया लेहका नाश आयाना मन्तांग मावा मेन्दुलतिगा इरता मन्ता।

⁸ माकुन सबोय बासाडाल पकाय तकलिप आन्ता ते वने माक सन्कट ते अरोम, माक तकलिप आन्ता मति निराश आयोम।

⁹ मावोर दुश्मन लोकुरक माकुन पकाय सतेह किन्तोरक मति परमेस्वर माकुन हरचिवोर अनि ओर माकुन हहान साटि अरहान्तोरक मति माक हायोम।

¹⁰ येसुना जिवन मावा मेन्दुलतिगा दिसि इन्जोर माक येसुना हायानातुन दरोज आपुना मेन्दुलतिगा अनुभव कियालातोरोम।

¹¹ मावा नाश आयवाल इद मेन्दुलतिगा येसुना जिवन दुसरो लोकुरकुन दिसि इन्जोर माक जिवित मन्तोरोम ते वने दरोज येसुना कारण हायाना टोडितिगा अरान्तोरोम।

¹² इदाम माक ते हायानासंग लळेमासोर मन्तोरोम मति इदेनते मिया आत्मिक जिवन बरसोर दान्ता।

¹³ “नना विस्वास कितान इन्जोर वळकतान” इदाम पवित्र पुस्तकतिगा कोटता मन्ता लेहका विस्वासता ओदे आत्मा मावागा वने मन्ता। अनि माक वने विस्वास किन्तोरोम इन्जोर माक वने वळकान्तोरोम।

¹⁴ बाक्याकि प्रबु येसुन हातोरिगाडाल असा जिवेहकितोर ओर परमेस्वर माकुन वने असा जिवेहकिस मियासंग परमेस्वरना मुने निपिहनुर इन्जोर माक पुन्तोराट। इद सबोय पोल्लो मिया साटि आयिला आता

¹⁵ अदामे पकाय लोकुरकनिगा परमेस्वरना दया विळसोर दान्ता इन्जोर परमेस्वरना महिमासाटि धन्यवादता प्रार्थना केवालोरा संख्या पकाय आसोर मन्ता।

पुटवाल अनन्त काळता महिमातिगा ध्यान हिम्ट

¹⁶ इन्जोर माक निराश आयोम आस मावा मेन्दुलता लाव कमि आसोर दान्ता ते वने मावा अन्तरात्मा दियांग दियांग पुनालताल पुनाल आसोर दान्ता।

¹⁷ मावा घळिमेटा तकलिप मावा साटि पकाय महत्वता मन्ता बाक्याकि अदेनते अनन्त जिवनता महिमा उत्पन्न आयाना कारण आन्ता। इद महिमा दुसरो बगाय पुटो।

¹⁸ अनि माक दिसान्ता ओव चिजकुन आयो मति बाहरो दिसोंग ओव चिजकुन हुळसोर मन्तोरोम बाक्याकि दिसान्ता ओव चिजक मारिच दान्ता मति दिसोंग ओव चिजक अनन्त काळ साटि मन्तांग।