२ कुरिन्थुस 3 - Muria Far Western

माक पुनाल नियमता सेवक मन्तोरोम

¹ बाताल माक असा आपुना हजोरपण किन्तोराट बहे? या माकुन दुसरो हुचुलोर लोकुरक लेहका सिफारिश पत्र मिया हेरे तताना या मियाकेडाल येताना जरुरि मन्ता बहे? बसकेय आयो!

² मावा मन्दिगा कोटता मन्ता अनि सबोय लोकुरक पुन्तोरक अनि वाचेकिन्तोरक मावा पत्र निमाटेय मन्तोरिट।

³ ओद पत्र शायिते आयो मति जिवित परमेस्वरना आत्माते कोटस मतोर अनि कलदा पाटितिगा आयो मति मानेयना मन्दा हविरुपि पाटितिगा मसि मावा सेवाता द्वारे कोटस मता मसिना पत्र निमाट मन्तोरिट इन्जोर दिसान्ता।

⁴ इदाम हिमत माक परमेस्वरनिगा मसिना कारण मन्ता।

⁵ माक आपुनास मावा साटि सबोय बुतो कियाला लाववाले मन्तोरोम इदाम आयो मति इद सबोय बुतो कियाना लाव माकुन परमेस्वरताल पुटान्ता।

⁶ ओर माकुन पुनाल नियमता सेवक आयाना योग्य कितोर। ओदे मूसाना कोटता नियमता सेवक आयो मति माकुन पवित्र आत्माता सेवक बनेकितुर बाक्याकि मूसाना कोटता जुनाल नियम अनन्त काळता हायानाता दन्डता कारण आन्ता मति परमेस्वरना आत्माते अनन्त काळता जिवन जिवेमायाना कारण आन्ता।

⁷ ते हायानाता दन्डता कारण आन्ता मूसान हिता ओद नियमता अक्षर कल्कदिगा कातस मतोर। ओद नियम हियाना बेरा परमेस्वरना महिमा दिसतु। ओद महिमाते मूसाना चेहरा मान्जसोर मता। ओद नियम परमेस्वरताल अस ओर मलस वायाना बेरा मूसाना चेहराता मान्जाना कमि आसोर मता, ओद बेरावना इस्रायेल लोकुरक मूसाना चेहरातुन हुळिला परोर अचोन ओना चेहरातुन मान्जिहतुर।

⁸ ते परमेस्वरना आत्माता सेवा मूसाना कोटता नियमताल वने बचोन मान्जार!

⁹ बाक्याकि हायानाता दन्डता कारण आन्ता ओद नियम मान्जसोर मता ते परमेस्वरना मुने येताना योग्य ठहरे किन्ता ओद बुतो अदेनताल वने पकायि मान्जार।

¹⁰ इंगो, मान्जसोर मता मूसाना नियमता ओद बुतो अदेनताल वने मान्जान्ता परमेस्वरना आत्माता इद दुसरो बुतोता पकायि हजोर मान्जाना कारण अदेन बाताले मान्जो।

¹¹ बाक्याकि बदलेमान्ता ओद पोल्लो मान्जसोर मता ते स्थिर मन्ता इद पोल्लो असा वने बचोन मान्जसोर मन्दार!

¹² इन्जोर इदाम आशा इरस माक पकायि हिमते वळकान्तरोम।

¹³ अनि कमि आसोर मता मान्जानाता अन्त इस्रयेल लोकुरक हुळमाकिर इन्जोर आपुना चेहरा पोरो दुपटा मुच मतोर मूसाना लेहका माक आयो।

¹⁴ मति ओरा मन कटोर आता बाक्याकि नेन्डवनाह जुनाल नियम वाचे कियानबेरा ओरा मन्दुन ओद दुपटाते मुचता लेहका मन्तोर इन्जोर ओरक खरोयतुन पुनोरक मति ओद दुपटा केवल मसिना विस्वासता कारणते ओद बदलेमान्ता।

¹⁵ नेडवनाह बसकेय मूसान पुस्तक वाचेकिन्तोरक ते ओरा मन दुपटा मुचता लेहका मन्ता।

¹⁶ मति बसकेय ओरा मन प्रबुनिके मलार असके ओद मुचान दुपटा बदले मायार।

¹⁷ प्रबु ते आत्मा आन्दुर अनि बोनागा प्रबुना आत्मा मन्ता अगा स्वतन्त्र मन्ता।

¹⁸ इन्जोर दुपटा बदलेमाता चेहराते प्रबुना महिमा आरसाता लेहका प्रतिबिंब किन्तोरोम। इदाम माक सबोय लोकुरक आत्मा मन्तोर ओर प्रबुना ओद मान्जाना रूपतिगा हुळुक हुळुक आसोर ओना ओदे रूपता लेहका माक वने बदले मासोर दान्तोरोम।