२ कुरिन्थुस 2 - Muria Far Western

¹ इन्जोर मिया हेरे असा वास मिकुन दुःखि केवोन आयिका इन्जोर नना आपुना मन्दिगा निश्चय किस मतोना।

² बाक्याकि नना मिकुन दुःखि कियाका ते केवल बोन नना दुःखि कितान ओन तासिस बोर नाकुन गिरिदा हियानुर?

³ अनि नना मिया हेरे वायाना बेरा नाकुन गिरिदा हेवालोर लोकुरकनिकेडाल नाकुन दुःख आयमाकि इन्जोर नना इद पोल्लो मिकुन कोटतान। नावा गिरिदा मिया सबोय लोकुरा वने गिरिदा मन्ता इन्जोर नाकुन मिया सबोय लोकुरा बारेते पका विस्वास मन्ता।

⁴ पकायि तकलिप अनि मन्दा दुःखते नना पकायि कनेळ पोंगिस पोंगिस मिकुन कोटतोना ओद मिया दुःख कियान साटि आयो मति नाकुन मियासंग मन्ता ओद हजोर मायातुन पुन्ट इन्जोर मन्ता।

गुनाकेवाल मानेयतुन मापि किम्ट

⁵ बोरे नाकुन दुःखि कितोर ते ओर केवल नाकुने आयो मति-ओना बारेते असा बाताले खराब पोल्लो इनोन आयका-मति ओर निमाट सबोय लोकुरकुन वने दुःखि कितोर।

⁶ मियागा पकायि लोकुरक ओन विरोद किस दन्ड हितोर ओद दन्ड ओना साटि पकाय मन्ता।

⁷ इन्जोर ओर मानेय पकायि दुःखि आस निराश आयमाकिर इन्जोर ओना गुना माप किम्ट अनि ओन शान्ति हियाला पहाजे।

⁸ इन्जोर ओनासंग निमाट असा सोबायि मया किम्ट इन्जोर नना मिकुन विन्ति किन्तोना।

⁹ बाक्याकि निमाट नावा सबोय पोल्लोतुन मानेमायिला तयार मन्तोरिट या हिलविट इन्जोर नना मिया परिक्षा किस समजेमायान साटि इदाम कोटस मतोना।

¹⁰ निमाट बोनाय बाताले मापि किन्तोरिट ओन नना वने मापि किन्तोना। नना बाताले मापि कितोना या मापि किसोर मनका ते मसिना मुने मिया फायदा साटि मापि कितोना।

¹¹ सयतान माकुन हारे केमाकिर; ओना चलाकितुन माक पकायि पुन्तोरोम बहे।

त्रोवास सहेरतिगा पोलुसना चिन्ता

¹² नना मसिना सोबाता पोल्लो वेहान साटि त्रोवास सहेरतिगा वातान असके मसिना सोबाता पोल्लो वेहान साटि प्रबु नाकुन उन्दि सन्दि हितुर।

¹³ ते नना नावोर तमो तितुसिन अगा कल्योन आतान ते नावा मन्दुन शान्ति पुटो आतु इन्जोर ओरकुन नमस्कार किस नना मकिदुनिया प्रदेशतिगा हतान।

मसिना द्वारा विजय आयाना

¹⁴ मति मसिनिगा दरोज माकुन विजयता गिरिदातिगा ओन्तोर अनि मसिना बारेता ग्यान सोबाय दयमुर लेहका मावा द्वारा सबोय जागातिगा फयले किन्तोर ओर परमेस्वरना धन्यवाद आयि।

¹⁵ बाक्याकि माक परमेस्वरना हेरे मुक्ति पुटिहवालोर अनि नाश आयवालोर इवुरास साटि माक मसिना सोबाय दयमुर लेहका मन्तोरोम।

¹⁶ माक वेहता मसिना सोबाता पोल्लोतुन येतोर लोकुरक साटि इद ओरा हायाना साटि हायानाता खराब दयमुर मन्ता। अनि मसिना सोबाता पोल्लो येतवालोर लोकुरक साटि इद ओरा अनन्त जिवन साटि जिवनता सोबायि दयमुर मन्ता। मति इद पोल्लोसाटि योग्य बोर मन्तोर?

¹⁷ बाक्याकि आपुना फायदा साटि परमेस्वरना पोल्लोतिगा बाताले मिलेकिस वेहान्तोरक पकाय लोकुरक लेहका माक आयो। मति परमेस्वरिन मुने खरोय मन्दते अनि परमेस्वर निवळे कितोर इदाम समजेमास मसिना अदिकारते माक वळकान्तोरोम।