२ कुरिन्थुस 13 - Muria Far Western

खोटाल करिहवालोरा विरुद आकरि चेतावनि

¹ इदेक तिसरो बेरा नना मिया हेरे वायिला आतोना। इवुर या मुवुर लोकुरा गवाहिते बोदे पोल्लोतुन पका कियाकाट।

² नना दुसरो बेरा मियासंग मतोना असके पाप कितोर ओर लोकुरा अनि दुसरो सबोयि लोकुरा पापता विरोद चेतावनि हिस मतोना। अदाम इदेक नना लक मन्ज वने असा ओर लोकुरकुन नना चेतावनि हिन्तोना। नना असा मिया हेरे वायिकाते ओर लोकुरा पोरो बाताले दया केवोन आयिका इन्जोर मुनेटाल इन्तोना।

³ मसि नावा द्वारा वळकान्तोर इन्जोर निमाट लोकुरक इदेना सबुत तलकान्तोरिट। ओर मिया गलतितुन दन्ड हियान साटि कमजोर हिलेर मति मिया पापतुन दन्ड हियान साटि लाव वाले मन्तोर।

⁴ कुरुस पोरो अन्जिहतुर ओद बेरा ओर कमजोर मतोर इद खरोय पोल्लो मन्ता। मति परमेस्वरना लावदे ओर जिवित मन्तोर। मसिना ओद कमजोरतिगा माक वने संगत मन्तोरोम, मति परमेस्वरना लावता कारण मिया फायदा साटि माक ओनासंग जिवेमायिकोम।

⁵ निमाट विस्वासते जिवन जिवेमान्तोरिट इन्जोर आपुनाय परिक्षा किस हुळाट। निमाट लोकुरक आपुनतुन पळकस हुळाट। येसु मसि मिया लोपा मन्तोर इन्जोर बाताल निमाट पुनविट बहे? येसु मसि मिया लोपा हिलेर ते निमाट खोटाल मन्तोरिट।

⁶ माक बोदे रितिते खोटाल हिलेम इन्जोर निमाट पुन्किट इदाम नना आशा किन्तोना।

⁷ निमाट बोदे खराब बुतो केमाट इन्जोर माक परमेस्वरतुन प्रार्थना किन्तोरोम। माक खरोय दिसकोम इदाम साटि आयो मति माक खोटाल लेहका ठहरे मायकोम ते वने मिया फायदाता बुतो कियान साटि मन्ता।

⁸ बाक्याकि माक खरोयता अनुसार किया परान्तोरोम मति खरोयता विरोदते बाताले किया परोम।

⁹ माक कमजोर अनि निमाट लाववाले मन्तोरिट असके माक पकाय गिरिदा मन्तोरोम। अनि निमाट मजबुत आम्ट इदाम प्रार्थना वने किन्तोरोम।

¹⁰ इन्जोर नना मिया हेरे वायका असके परमेस्वर नाकुन हिता ओद अदिकार बाताले कटोरताते मिया पोरो केविट इन्जोर मियाताल लक मन्ज वने इव पोल्लोंग कोटिला आतोना। प्रबु नाकुन अदिकार हितोर ओद अदिकार मिकुन नाश कियाना साटि आयो मति मिया विस्वासतुन मजबुत बनेकियान साटि मन्ता।

अभिवादन

¹¹ हे बायि-दादालोरक, इदेक नना मिकुन नमस्कार किस मियागडाल दान्तोना। नना कियान साटि मिकुन वेहतान ओद सबोय पोल्लोंग अदामे किसोर मन्ट। वरोर दुसरोन मानेमास उन्दि मन्दे विचार किस शान्तिते मन्ट अदेनते मया अनि शान्ति हेवाल परमेस्वर मियासंग मन्दानुर।

¹² पवित्र चुमाते वरोन दुसरोन नमस्कार किम्ट

¹³ सबोयि पवित्र लोकुरक मिकुन नमस्कार किन्तोरक।

¹⁴ प्रबु येसु मसिना दया अनि परमेस्वरना मया अनि पवित्र आत्माता संगत मिया सबोयि लोकुरासंग आसोर मनि।