२ कुरिन्थुस 12 - Muria Far Western

परमेस्वरताल पुटता पोलुसना दर्शन

¹ हजोरपण कियानाते बाताले फायदा हिले मति हुचुक पोल्लोतिगा हजोरपण कियाना जरुरि मन्ता। इन्जोर नना प्रबुना द्वारा तोहता पोल्लोंग अनि प्रकाशनता बारेते इदेक तोहका।

² मसिनिगा वरोर मानेयतुन नना पुन्तोना ओन चवदा वरसाता मुने तिसरो स्वरगतिगा ताहच मतोर, इदाम मेन्दुल संग आस मता या बिना मेन्दुलसंग आस मता इद नना पुनोन मति परमेस्वर इद पोल्लोतुन पुन्तोर।

³ अनि ओन स्वरगतिगा ताहतु; मेन्दुलसंग या बिना मेन्दुलते इद नना पुनोन, परमेस्वरे पुन्तोर इन्जोर नना ओर मानेयना बारेते पुन्तोना।

⁴ स्वरगतिगा ताहतुर अनि ओर मानेय वर्णन किया परोम इदाम पोल्लोंग केन्जतुर ओव पोल्लोंग मानेयतुन वळकाना परवांगि हिले।

⁵ इंगो! ओर मानेयना बारेते नना हजोरपण कियाका मति आपुना कमजोरितुन तासिस आपुना बारेते नना हजोरपण केवोन आतान।

⁶ ते नना आपुना बारेते हजोरपण कियाका ते वने मुर्ख आयोन आयका बाक्याकि नना खरोय पोल्लोंग वळकान्तोना; ते वने बोरे मानेय नाकुन हुळान्तोर या नावा पोल्लो केन्जान्तोर अदेनताल विळस बोरे नावा बारेते समजेमायमाकिर इन्जोर नना आपुना बारेते हजोरपण केवोन।

⁷ नावागा असादरण पोल्लोता रहस्यतुन पकाय तोहतोर ओद कारणते नना पकाय हजोरपण केवोन आयका इन्जोर नावा मेन्दुलतिगा गुहचता काटा लेहका मन्ता पकाय नोमुरुता तकलिपतुन हितुर; नाकुन पकाय हजोरपण आयमाकि इन्जोर नाकुन तकलिप हियान साटि ओद काटा सयतानोर दूत आन्दुर।

⁸ ओद गुचता काटा लेहका मन्ता तकलिप नावा मेन्दुलताल लक आयि इन्जोर प्रबुन नना मून्ड बेरा विनन्ति कितान।

⁹ मति प्रबु नाकुन “नावा दया निया साटि आयार, कमजोरितिगा नावा लाव पकाय तोहान्तोना” इन्जोर इतुर। इन्जोर मसिना लाव नावागा मन्दान साटि नना पकाय गिरिदाते नावा कमजोरिता बारेते हजोरपण किन्तोना।

¹⁰ इन्जोर नावा कमजोरितिगा नना मसिन साटि सहेन किता निन्दांग, गरिबि, सतेहकियाना, अनि सन्कटता बारेते गिरिदा किन्तोना बाक्याकि नना कमजोर आन्तोना असके लाववाले आन्तोना।

कुरिन्थुस सहेरता मसिलोकुरा सभा साटि पोलुसना चिन्ता

¹¹ नना वरोर मुर्ख लेहका वळकिलातोना! मति निमाटे नाकुन मजबुरिते इदाम किहतिट। निमाट नावा बारेते प्रशंसा कियाला पहाजे आस मता बाक्याकि नना बाताले हिलेन ते वने माक येसुना हजोर चेला लोकुरक मन्तोरक इदाम घमन्ड केवालोरक ओर लोकुराताल नना बोदे पोल्लोतिगा बाताले हुडलोर हिलेन।

¹² येसुना खास चेलाना योग्य मन्ता ओद सबोयि गुणक चिनांग अनि अत्भुत बुतोंग अनि पकाय लावता बुतोंगते मिया नडुम सबोय प्रकारता धिरजतासंग तोहतोना।

¹³ मसिलोकुरा दुसरो सभातुन पुटता सबोयि पोल्लोंग मिकुन वने पुटतु। मति केवल उन्दि फरक मता: नना मिया पोरो बोदे रितिते वजा आयो आतान। इद गलति साटि नाकुन मापि कियाकिट बहे?

¹⁴ हुळाट इदेक तिसरो बेरा मिया हेरे वायान साटि नना तयार मन्तोना। मति नना मियागा बाताले वजा आयो आयका; नना मिया बोदे धनसंपतिता बारेते इच्चा केवोन मति केवल मियाबारेते चिन्ता किन्तोना बाक्याकि बालक आपुना अवाल बाबोन साटि बाताले पिसानाता जरुर हिले। मति अवाल बाबोन आपुना बालक साटि जरुरि पिसाना मन्ता बहे!

¹⁵ नना पकाय गिरिदाते नावा कयते बाताल मन्ता ओद सबोय मिया लोकुरक साटि खरचा कियाका अनि आपुनतुन वने सोपेकियाका। नना मिया लोकुरकुन पकाय मया किन्तोना ते निमाट लोकुरक नाकुन कमि मया कियाकिट बहे?

¹⁶ नना मियागा वजा आयोन इन्जोर मियागडाल हुचुलोर लोकुरक मानेमान्तोरक ते वने दोखा किस नना मिया फायदा चलाकिते येतितान इदाम वने हुचुलोर लोकुरक विचार किन्तोरक।

¹⁷ नना मिया हेरे लोहच मतोना ओर लोकुरकनिकेडाल नना बोनाय द्वारा दोखा किस मियाकेडाल बाताले येतितान बहे?

¹⁸ नना तितुसिन मिया हेरे लोहतान अनि ओनासंग मावोर तमोन वने नना मिया हेरे लोहच मतोना। ओरक मियाकेडाल बाताले चिज दोखाते येतितोरक। माक इवुरास उन्दिय आत्माते उन्दिय बुतो कितोम इदाम निमाट पुनविट बहे?

¹⁹ माक इद सबोय माकुन पिसहान साटि इन्दिला आतोरोम इन्जोर निमाट लोकुरक बाताल इदेक वने समजेमास मनकिट बहे? परमेस्वरना मुने इदाम समजेमास सबोयि मसिना चेला आस इन्दिला आतोम। हे गोतियालोरक, इद सबोय पोल्लोंग निमाट विस्वासते मजबुत आयान साटि इन्दिला आतोरोम।

²⁰ बाक्याकि नना मिया हेरे वायका असके मियाबारेते नावा इच्चा लेहका मिकुन अनि नना बदाम आयिला पहाजे इन्जोर विचार किन्तोरिट अदाम लेहका नना आयोन आस निमाट नाकुन वने मिलेमायकिट इन्जोर वने नना वरयान्तोना। अनि मिया नडुम वाहचाना, हेवा, होंग, विरोद, इरषा, चाहळिंग, अभिमानि अनि अव्यवस्ता इदाम पोल्लोंग कलियकि इन्जोर वने नाकुन वरे मन्ता।

²¹ अनि नना मिया हेरे असा वायका असके नावोर परमेस्वर मिया मुने नावा लज्जा कियाहनुर इदाम नना वरयान्तोना। अनि मुने पाप कितेक वने आपुना अपवित्रता, व्वभिचार, मेन्दुलाता शारिरिक इच्चाते मन्दाना इदाम ओरा पापता बुतोताल पस्तेमायोर आतुरक इन्जोर नाकुन ओरा बारेते दुःख कियाका इन्जोर वने नाकुन वरे मन्ता।