२ कुरिन्थुस 11 - Muria Far Western

पोलुस अनि ओनाय विरोद केवालोरक

¹ ते निमाट नावा हुळुन्सा बुद्धि हिले इदाम लेहका वळकना निमाट पकाय सहेन किसोर मनकिट बहे? इंगो! निमाट इदेकवनाह नावा सहन किसोर मन्तोरिट।

² परमेस्वर मिकुन पकाय मया किन्तोर अदामे नना वने मिकुन मया किन्तोना। बाक्याकि सोबाय स्वभावता लयान मरमिंग साटि वरोर दुलहान सोपे कियाना लेहका नना मिकुन केवल मसिन सोपेकियान साटि ओनासंग हेयना मांगळिंग कितान।

³ मति सयतान तेरासना रुपते अदन पोरोयता वाटिकातिगा वासुन आपुना चलाकिते हाव्वान दोखा हिस मता अदाम मसि साटि मन्ता मिया सबोय मन्दा मया अनि ध्यानताल मिकुन बहके किस लक ओयिर इन्जोर नना वरयान्तोना।

⁴ बोरे मानेय मिया हेरे वासुन मिकुन दुसरो येसुना बारेते वेहानबेरा ओद पोल्लो निमाट पकायि गिरिदा येतान्तोरिट। ओर करहान्तोर येसु मिया साटि माक करियस हिता येसु आयो। अनि निमाट दुसरो आत्मा अनि येसुना बारेता दुसरो सोबाता पोल्लो येताना साटि पकायि ध्यान किन्तोरिट मति ओद आत्मा मिकुन पुटता आत्मा आयो। अनि ओद सोबाता पोल्लो माक मिकुन हिता पवित्र आत्मा अनि येसुना बारेता खरोय सोबाता पोल्लो आयो। इदाम खोटाल पोल्लोतुन निमाट बदाम मानेमाय परान्तोरिट बहे? इद हुळस नना आश्चरय किन्तोना।

⁵ माक येसुना हजोर चेला आन्दोम इदाम आपुनतुन समजेमान्तोर ओरक लोकुराताल नना बाताले हुळिलोर आयो इन्जोर नना विचार किन्तोना।

⁶ लोकुरा मुने नना सोबायि रितिते वेहवाल आयो इदाम नावा विरोद केवालोरक वळकिन्तोरक ते वने नना वने ओरा लेहका ग्यानि मन्तोना। इव पोल्लोंग मावा सबोय पोल्लोतिगा सबोय प्रकारते नना मिकुन तोहतोना।

⁷ नना मिकुन परमेस्वरना सोबाता पोल्लो मजदुरि येतवाय वेहतान। अनि मिया आत्मिक परिपूर्णता साटि नना आपुनतुन पकायि हुळिलोर कितान। नना मिया साटि अदाम कितेक ओद गलत मन्ता इदाम बाताल निमाट विचार किन्तोरिट बहे?

⁸ मियागा सेवा कियान साटि नना दुसरो नाटेनिगा मन्ता मसिलोकुरा सबोय सभाताल दान येतितान। नना इदाम कियानपा नना ओरकुन लुटेकियाना लेहका कितान इदाम नाकुन लागेमात।

⁹ अनि नना मियासंग मन्दाना बेरा नाकुन डब्बुना जरुरि मता असके नना बोनाय पोरो वजा वाटोन। मकिदुनियाताल वातोर ओर तमो लोकुरक नावा जरुरितुन पुरा किस मतोरक। नना उन्दि उन्दि पोल्लोतिगा मिकुन वजा आयिला हेवोम इदाम ध्यान कितान अनि असा वने मिकुन वजा आयिला हेवोम इदाम ध्यान किसोर मनका।

¹⁰ अनि मसिना खरोयता गुण नावागा मन्ता इन्जोर अखिया प्रदेशतिगा नावा इद हजोरपणताल बोरे बन्द केवोर आयनुरक।

¹¹ मियाकेडाल नावा जरुरितुन पुरा किस नना मिया पोरो वजा बाक्या आयो आतान? मियाकेडाल नावा जरुरितुन पुरा केवोन इन्जोर नना मिकुन मया केवोन इदाम बाक्या निमाट विचार किन्तोरिट? अदाम आयो। नना मिकुन मया किन्तोना इन्जोर परमेस्वर पुन्तोर!

¹² मति नना बोद पोल्लो कियाला आतोना ओदे पोल्लो असा वने किसोर मनका। अदाम आपुना बुतो वने मावा बुतो लेहकाय मन्ता इदाम घमन्ड किन्तोरक ओर लोकुरा हजोरपण नना मारिहचिका।

¹³ बाक्याकि इदाम लोकुरक येसुना खास चेलाल लोकुरक आयोर मति ओरक खोटाल सेवक लोकुरक मन्तोरक। ओरक माक येसु मसिना खास चेलाल लोकुरक आन्दोम इदाम तोहान साटि लोकुरकुन बहके केवालोर कपटि लोकुरक आन्दुरक।

¹⁴ इगा बोदे आश्चरयता पोल्लो हिले बाक्याकि सयतान वने नना परमेस्वरना खरोय स्वरगदूत आन्दान इदाम तोहच लोकुरकुन बहके कियान साटि परमेस्वरना दूतता रुपते बदले किस वान्तोर।

¹⁵ इन्जोर सयतानोर सेवक वने परमेस्वरनोर खरोय सेवा केवालोरा लेहका रूप बदले किस वान्तोर ते बोदे हजोर पोल्लो आयो मति ओरा बुतोता अनुसार ओरा अन्त आयार।

आपुना पकायि तकलिपता बारेते पोलुस वेहान्तोर

¹⁶ बोरे नाकुन मुर्ख समजेमायमाकिर इन्जोर नना असा मिकुन इन्तोना। बोरे नाकुन मुर्ख समजेमान्तोरिट ते नना वने हुळुक हजोरपण कियापरका इन्जोर नाकुन केवल मुर्ख लेहकाय येताट।

¹⁷ नना इन्दिला आतोना ओद पोल्लो प्रबुना इच्चाता अनुसार आयो मति नावा हजोरपणता ओद पोल्लोता बारेते पका विस्वासतासंग केवल वरोर मुर्ख लेहका नना इन्दिला आतोना।

¹⁸ बाक्याकि पकायि लोकुरक ओरक किता आपुना बुतोता बारेते हजोरपण किन्तोरक ते नना वने हजोरपण किया परान्तोना।

¹⁹ निमाट इचोन समजदार मन्तोरिट ते वने मुर्खताता नावा पोल्लोंग वने गिरिदाते सहेन किया परकिट!

²⁰ बाक्याकि बोरे मिकुन दास बनेकिन्तोरक या मिया फायदा येतानतोरक या फसेह किन्तोरक या आपुनतुन हजोर किन्तोरक या मिया कोरवितिगा थापळिते हिन्तोर ते वने निमाट सहे किन्तोरिट।

²¹ इदाम कियान साटि माक पकायि कमजोर मतोरोम इन्जोर लज्जाते इन्दिला आतोना। मति बोरायि बोदे पोल्लोतिगा हजोरपण कियाना हिमत किन्तोरक ते नना वने ओद पोल्लोसाटि हजोरपण किया परान्तोना इन्जोर नना वरोर मुर्ख मानेय लेहका इन्तोना।

²² बाताल ओरके इब्रानि आन्दुरक बहे? इंगो नना वने इब्रानि आन्दान, बाताल ओरके इस्रायेलतोर आन्दुर बहे? इंगो नना वने इस्रायेलतोर आन्दान। बाताल ओरके अब्रहामनोर वंश आन्दुर बहे? इंगो नना वने आन्दान।

²³ बाताल ओरके मसिनोर सेवक आन्दुर बहे? नना बयहाल लेहका इन्तोना। नना ओराताल विळस मन्तोना। ओराताल नना पकायि मेहनत कितोना, ओराताल नना पकायि बेरा जेहलतिगा दन्ड भोगेमातान। ओराताल नना पकायि मार तितान। ओराताल नना पकायि बेरा हायाना दोखाते अरतान।

²⁴ अनि यहुदि लोकुराल सोटाते नाकुन उन्दि कम चाळिस सोटांग हाहतुरक, इदाम ओरक नाकुन सेयुंग बेरा हाहतुरक।

²⁵ मून्ड बेरा रोमि लोकुरक नाकुन बळगाता डन्डाते हाहतुरक, उन्दि बेरा नावा विरोद केवाल यहुदिलोकुरक नाकुन हव्काना साटि कल्कने हितुरक, मून्ड बेरा नावा जहाज उरिंगस मुळन्दितु, उन्दि पियाल-पोळत नना समुद्रतिगा मतोना।

²⁶ नना पकाय लक पकाय बेरा यात्रा कितोना। अनि नदितिगा, कलेरकना मुने, नावा यहुदि जातितोर लोकुरकना नडुम, यहुदि लोकुर आयो दुसरो जातितोर लोकुरकना नडुम नाकुन दोखा आतु। सहेरतिगा, केळातिगा, समुद्रतिगा नाकुन दोखा आतु। अनि खोटाल तमोलोकुरा कारण नाकुन दोखा आतु।

²⁷ पकाय मेहनता अनि पकायि कठिन बुतोते मतोना। अनि पकाय बेरा हुन्जवाकेन मतोना, अनि नना तिनोन उन्डोन आस मतोना, अनि पकायि बेरा नाकुन बोदे जेवन पुटो आतु इन्जोर उपासते मतोना, पिनिता दियांग तारिला मुचिला सन्दरांग कमि आस मता।

²⁸ इव सबोय असादरण पोल्लोनुंग तासिस सबोय मसिलोकुरा सभाता बारेता चिन्ता नाकुन दरोज पकायि सतेह किन्ता।

²⁹ बोनाय कमजोरि आयाना बेरा नाक वने ओदे कमजोर नावा मेन्दुलतिगा लाकता। अनि बोरे पापतिगा फसेमायनुर ओदबेरा नाक वने ओरा साटि दुःख आयार।

³⁰ ते बोदे पोल्लोतिगा हजोरपण कियाना मन्ता ते नना नावा कमजोरिता पोल्लोतिगा हजोरपण कियाका।

³¹ नना खोटाल वळकोन इन्जोर मावोर प्रबु येसुनोर परमेस्वर अनि बाबो अनि दरोज धन्य मन्तोर ओर परमेस्वर पुन्तोर।

³² नना दमासकस सहेरतिगा मतोना असके राजाल अरितासनोर राजपाल नाकुन पयान साटि सहेरतिगा सयनिक लोकुरकुन केपान साटि इरस मतोर।

³³ मति ओरक नाकुन बूटितिगा उपिहच सहेरता गुटता किळकिताल अडिय रेहतुरक अनि नना ओना कयदाल पिसतान।