२ कुरिन्थुस 1 - Muria Far Western

अभिवादन

¹ परमेस्वरना इच्चाते येसु मसिनोर खास चेलाल मन्तोना नना पोलुस अनि नावोर संगवारि विस्वासि तमो मन्तोर ओर तिमुथियुस निकेडाल कुरिन्थुस सहेरतिगा मन्तोर परमेस्वरना लोकुरा सभा अनि आखया प्रदेशतिगा मनवालोरक सबोय पवित्र लोकुरक साटि इद पत्र कोटान्तोरोम।

² मावोर बाबो परमेस्वर अनि प्रबु येसु मसिनिकेडाल मिकुन दया अनि सुख-शान्ति पुटसोर मनि।

पोलुस आपुना सबोय शान्तितिगा परमेस्वरतुन धन्यवाद हिन्तोर

³ दया केवाल बाबो अनि सबोय प्रकारता शान्ति हेवाल परमेस्वर मन्तोर ओर मावोर प्रबु येसु मसिनोर परमेस्वर बाबोना स्तुति आयि।

⁴ परमेस्वर माकुन हिन्तोर शान्तिता कारण अलग अलग तकलिपते मन्तोर ओर लोकुरकुन शान्ति हियान साटि माक योग्य आस, माक परमेस्वरताल पुटता ओदे शान्ति ओरकुन वने पुटि इन्जोर परमेस्वर मावा सबोय तकलिपतिगा शान्ति हिन्तोर।

⁵ मसिना तकलिपतिगा माक पकायि सहभागि आन्तोरोम, अदामे मसिना द्वारा ओना शान्ति वने माक असा पकायि अनुभव किन्तोरोम।

⁶ माकुन मसिना कारणते तकलिप आन्ता ते इद मिया शान्ति अनि पिसान साटि मन्ता। अनि माकुन शान्ति पुटान्ता ते ओद मिकुन शान्ति पुटान साटि मन्ता अनि माक सहेन कितोम ओदे तकलिप निमाट वने धिरजतासंग सहन कियान साटि मन्ता।

⁷ निमाट मावा पकायि तकलिपतिगा सहभागि आन्तोरिट अदामे मावा सान्तवनतिगा वने सहभागि मन्तोरिट इदाम पुन्तोरोम इन्जोर मिया बारेते मावा आशा मजबुत मन्ता।

⁸ हे बायि-दादालोरक आसिया प्रदेशतिगा माकुन मता पकायि तकलिपतुन निमाट पुन्दिला पहाजे इन्जोर मावा इच्चा मन्ता; माक इदेकवनाह जिवन जिवेमाय परोम इदाम लागान्ता मावा लावताल पकायि मता इचोन पकायि तकलिप माक सहेन कितोरोम।

⁹ इचोने आयो माकुन हव्काना आग्या हितोर इन्जोर माक आपुना मन्दिगा समजेमास मन्तोरोम; मति इद माक आपुना पोरो भरोसा इरवाय हातोरकुन जिवेहकिन्तोर ओर परमेस्वरना पोरो भरोसा इरान साटि मता।

¹⁰ ओरे माकुन हायानाता इचोन पकायि हजोर सन्कटताल पिसिहतुर अनि पिसाहनुर। अनि ओर असा वने पिसिहचोर मन्दानुर इन्जोर ओना पोरो मावा आशा मन्ता।

¹¹ निमाट वने मिलेमास प्रार्थनाता द्वारा माकुन मदत किम्ट, अदाम पकायि लोकुरा प्रार्थनाते माकुन पुटता वरदान साटि पकायि लोकुरक मावा कारणते परमेस्वरना धन्यवाद कियाना साटि सन्दि आयार।

पोलुस आपुना हन्दानाता योजना बदले किन्तोर

¹² माक इद दुनियातिगा, खास किस मिया नडुम, मेन्दुलता ग्यान ते आयो मति परमेस्वरना दयातासंग, पवित्रता अनि इमानदारितासंग परमेस्वरना योग्य चालचलन कितोम इन्जोर मावा मन्दा गवाहितिगा माक हजोरपण किन्तोरोम।

¹³ निमाट वाचे किन्तोरिट अनि समजेमान्तोरिट इदेन तासिस माक बाताले कोटोम।

¹⁴ इदेक निमाट मावा बारेते हुचुक पोल्लोंग समजेमातोरिट अदाम लेहका प्रबु येसुना असा मलस वायाना दिया मावा हजोरपणता कारण निमाट मन्तोरिट अनि माक वने मिया हजोरपणता कारण मन्तोरोम इन्जोर निमाट संपुर्ण रितिते समजेमायकिट इदाम नना आशा किन्तोना।

¹⁵ इदे विस्वासते मन्ता मिकुन असा उन्दि बेरा वने नाकुन मिलेमायाना सन्दि पुटि इन्जोर मिया हेरे वायका इदाम नना पहले योजना कितान।

¹⁶ अनि मिकुन मिलेमास मकिदुनिया प्रदेशतिगा दाका अनि पजा मकिदुनिया प्रदेशताल मिया हेरे मलस वायका अनि अगडाल निमाट नाकुन यहुदि प्रदेश हन्दान साटि मदत किस हुडुक लकवनाह अविहचिकिट इन्जोर नावा इच्चा मता।

¹⁷ ओद योजनातिगा नना चन्चलता कितान बहे? या उन्दि बेरा “इंगो, इंगो” अनि “आयो, आयो” इन्जोर इन्दाना इद दुनियाता लोकुरा सोच विचारता हिसाब लेहका नना इद योजनातुन बाक्या तयार कितोना बहे?

¹⁸ मिया साटि मावा पोल्लो उन्दि बेरा “इंगो” अनि दुसरो बेरा “आयो” इदाम हिले आसि इन्जोर विस्वास योग्य परमेस्वर इदेना खरोय गवाहि मन्तोर।

¹⁹ परमेस्वरनोर मरि येसु मसि बोना मावा द्वारा मन्जे नावा अनि सिलवानुस अनि तिमुथियुसना द्वारा मिया नडुम वेहता परमेस्वरनोर मरि येसु मसिना बारेता सोबाता पोल्लोतिगा उन्दि बेरा “इंगो” अनि दुसरो बेरा “आयो” इदाम चन्चल पोल्लो हिले आसि, मति येसुनिगा “इंगोते इंगोय” मता मन्जे परमेस्वर बाताल इन्तोर अदेन किन्तोर।

²⁰ परमेस्वरना बचोक वाचा मन्तांग अव सबोय येसु मसिनिगा इंगोतासंग मन्ता इन्जोर परमेस्वरना स्तुति आयान साटि ओना द्वारा माक आमिन इन्तोरोम।

²¹ अनि माकुन मियासंग मसिना संगते मजबुत किन्तोर अनि माकुन अभिषेक कितोर वने ओर परमेस्वर आन्दुर।

²² ओर पवित्र आत्मातुन बयाना इन्जोर मावा मन्दिगा हिस माक केवल परमेस्वर साटि मन्तोरोम इदाम तोहच शिक्का हितोर।

²³ नना मिकुन बोदे तकलिप हेवोन आयिका इन्जोर इदेकवनाह कुरिन्थुस सहेरतिगा वायोन आतान इदेन परमेस्वर गवाहि मन्तोर।

²⁴ मिया विस्वासता पोरो माक मियागा बाताले अदिकार कियाना इच्चा किन्तोरोम इदाम आयो मति मिया गिरिदातिगा माक मदत केवालोर आन्दोम बाक्याकि निमाट विस्वासतेय स्थिर मन्तोरिट।