१ तिमुति 6 - Muria Far Western

विस्वासि दास

¹ अनि आपुना मालकाना कय अडिय बुतो केवाल दास लोकुरक परमेस्वरना पोरो अनि खरोय कराहनातुन निन्दा आयमाकि इन्जोर आपुना मालकान हजोर आदर हियाला पहाजे इन्जोर समजेमाम।

² अनि बोरे दासनोर मालक विस्वासि मन्तोर ते ओर दास आपुनोर मालकान आपुनोर दादाल लेहका मानेमास तुच्च समजेमायमाकिर। बाक्याकि बोर मालकान साटि ओर बुतो किन्तोर ओर मालकाल ओनोर दादाल अनि प्रिय मानेय मन्तोर इन्जोर ओर मालकान साटि असा सोबाय बुतो किसोर मनिर। अनि इद सबोय पोल्लोंग निमा विस्वासि लोकुरकुन करहा अनि वेहा।

खोटाल करिहना अनि धनसंपतिता लालच

³ अनि हुचुक लोकुरक प्रबु येसुना खरोय उपदेशतुन तासि, परमेस्वरिन गिरदा किस जिवेमायिला पहाजे इन्जोर करहोर आस अलग पुनाल उपदेश हिन्तोरक।

⁴ अनि बोरे इदाम गलति उपदेश किन्तोर ओर घमन्ड केवाल मन्तोर मति ओर बाताले खरोय पोल्लोतुन पुनोर। अनि ओर आपुना बेकार उपदेशतुन लोकुरा हेरे ओसुन अदेना बारेते दरोज वाद-विवाद अनि ओद पोल्लोता अर्थता बारेते तर्क कियाना साटि खराब आदत मन्ता। अनि इदाम बहस पोल्लोता द्वारा हेवा कियाना, वाहचाना, चाहळिंग, अनि दुसरोनिगा खोटाल अनि संशय कियाना इदाम खराब पोल्लोंग पसिन्तांग,

⁵ अनि ओर लोकुरा द्वारा दरोज लोकुरा नडुम वाहचाना आन्ता, ओर लोकुरकुन सोबाय अनि खराब पोल्लो बाताल इन्जोर पुनोर। अनि खरोय पोल्लोतुन समजेमायोर मति ओर परमेस्वरना भक्तितुन डबुंग कमेकियाना उन्दि धन्ता लेहका विचारकिन्तोर।

⁶ वरोर परमेस्वरना गिरदा कियाना बुतो किस ओद गिरदाते मन्दाना पकाय हजोर कमायि मन्ता।

⁷ बाक्याकि माक इद दरतितिगा बाताले तरोम अनि इगाडाल बाताले ओय परोम।

⁸ अनि माकुन दरोज तिन्दान साटि अनि पोन्डाना साटि मन्तांग ते माक गिरदाते मन्दिला पहाजे।

⁹ अनि सावकार आयाना इच्चा किन्तोर ओर लोकुरक परिक्षातिगा अनि नाशता फन्दातिगा अरस पकाय व्यर्थ अनि दोखाता लालचते ओरा नाश आयार अनि परमेस्वर ओरकुन सोळेकियानुर।

¹⁰ बाक्याकि पयसाना लालच सबोय प्रकारता खराब बुतोतुन मुक्या कारण आन्ता। इदाम पयसाना लालच किस हुचुक लोकुरक आपुना खरोय विस्वास तासिस पकाय दुःखते अरतुरक।

तिमुथियुसिन व्यक्तिगत निरदेश।

¹¹ मति हे तिमुथियुस, निमा परमेस्वरनोर मानेय मन्तोन इन्जोर निमा वने इद सबोय खराब पोल्लोताल लक आस परमेस्वरना मुने येताना योग्य बनेमाम। अनि दरोज परमेस्वरना भक्ति किस येसु मसिनिगा विस्वास किम अनि सबोय लोकुरकुन मया किस धीरज अनि नम्र स्वभावता परके हन।

¹² विस्वासता परके हन्दान साटि नियागा पकाय सन्कट वायार असके निमा खरोय विस्वासते मुने हन्दान साटि मेहनता लळायि किम। अनि इद विस्वास निमा पकाय लोकुरा मुने गवाहि हिस मतोर अनि निया अनन्त जिवन नाश केमा बाक्याकि अनन्त जिवन साटि परमेस्वर निकुन आचतोर।

^13-14 अनि सबोय लोकुरकुन जिवन हिन्तोर ओर परमेस्वरना मुने, अनि पुन्तियुस पिलातुसना मुने, पकाय सोबाय गवाहि हिस मन्दुर ओर येसु मसिना मुने नना निकुन इद आग्या हिन्तोना। नना निकुन हिता सबोय आग्यातुन मावोर प्रबु दुसरो बेरा वायानवनाह पालन किसोर मनकि ते दुसरो लोकुरक नियागा दोष लावे केवोर आयनुर।

¹⁵ अनि येसु मसि स्तुति येतान साटि योग्य मन्तोर। अनि ओर वरोर राजाल, अनि चत्रपति अनि प्रबुनोर प्रबु मन्तोर। ओर निरनय किता ओद बेराते प्रगट आयनुर,

¹⁶ अनि ओर वरोरे दरोज जिवोत मन्तोर अनि बोरे बसकेय हन्दा परोर इदाम पकाय हजोर ज्योतिते मनवाल अनि बोरे हुळोर अनि बसकेय हूळ परोर इदाम मन्तोर: ओना आदर अनि लाव राज्य सदा काळवनाह मन्दार। आमेन।

¹⁷ इद दुनियाता धनि मानेयकुन पकाय अभिमानि बने केमा अनि वान्ता दान्ता धनतिगा आशा इरमाकिर इन्जोर करहा, बाक्याकि आपुना गिरदा साटि सबोय चिजनुंग पकाय हिन्तोर ओर परमेस्वरनिगा आशा इरविर।

¹⁸ अनि धनि मानेय आपुना डबुते भलायि बुतो केविर अनि भलायि बुतो किसोर मनिर, अनि जरुरि लोकुरकुन उदार कियाना अनि मदत कियान साटि दानकेवाल मनिर।

¹⁹ अनि इदाम वायाना काळते खरोय जिवन ओरकुन मिलेमायाना साटि सोबाता पायवा इरिर इन्जोर ओरकुन आग्या किम।

²⁰ हे तिमुथियुस, निकुन सोपेह किता ओद खरोय पोल्लोतुन निमा लोकुरकुन करहा, लोकुरक ग्यान इन्जोर गलति रितिते समजेकिन्तोरक ओद परमेस्वरना विरुद करहाना अनि व्यर्थ बहसताल लक हन।

²¹ अनि हुचुक लोकुरक ओद गलति ग्यान स्विकार किसुन खरोय विस्वासतुन विळिच हतुरक। इन्जोर नना वेहता ओद सबोय पोल्लोतुन निमा विस्वासि लोकुरकुन करहा अनि सोबाय समजेह किम। अनि प्रबुना दया नियागा दरोज मनि।