१ तिमुति 5 - Muria Far Westernरान्डि आसक, अवाल बाबो अनि दासकना बारेते उपदेश 1 आपुना वयताल हजोर लोकुरकुन निमा होंगदे वळकमा मति ओरकुन आपुनोर बाबोन लेहका समजेमास वळका। अनि आपुना वयता हुडलोर लोकुरकुन तमो लेहका वळका। 2 अनि हजोर आसकुन आपुना अवाल लेहका समजेमास आदर किम अनि लयानुंग पुरा पवित्रताते आपुना हेलाळ लेहका समजेमासुन वळका। 3 अनि बोदे खरोय रान्डि आसकुन बाताले मदत पुटो आन्ता अदाम रान्डि आसकुन निमा सोबाय पालन पोषन किस आदर किम। 4 अनि बोदे रान्डि आसकुन बालक या नाति पोतांग मन्दानुंग ते ओव रान्डि आस्क पहले बदाम अवेहनोर अवाल बाबो बदाम अवेहकुन पालन पोषन कितुर अदाम लेहका ओरकुन सोबाय संभालेकिस आपुना परिवारतिगा येसु मसिनिगा विस्वास केवालोरक इदाम सेवाकियाना जरुरि मन्ता इन्जोर ओरकुन समजेकिस परमेस्वरना विस्वासतुन प्रगट केवि, बाक्याकि इद परमेस्वरना मुने गिरदा मन्ता। 5 अनि खरोय रान्डि आसकुन बोरे मदत केवोर ते ओव रान्डि आसक परमेस्वरनिगा विस्वास इरस आपुना साटि नरका पियाल प्रार्थना किसोर मन्तांग। 6 अनि बोदे रान्डि आसक आपुना भोगविलास साटि मन्दार ते ओव रान्डि आसक जिवोत मन्ज वने ओव आत्मिक जिवाते हातोर लेहका मन्तांग। 7 अनि रान्डि आसकना बारेते इव सबोय पोल्लोंग निमा विस्वासि लोकुरकुन साटि आग्या हिम बाक्यकि ओव निरदोष आयिंग। 8 अनि बोरे आपुना लोकुरक साटि विशेषाल आपुना लोतोरक साटि बाताले चिन्ता केवोरक ते ओरक आपुना विस्वासतुन तासिस अविस्वासिताल वने खराब मन्तोरक। 9 अनि मसिलोकुरा सभाता मदत सुचितिगा रान्डि आसकना पोरोय कोटानपा साट वरसाना कमि मन्तांग ओव रान्डि आसकना पोरोय कोटमा, अनि ओव रान्डि आसक उन्दिय मुजो मता रान्डि आळ पहाजे, 10 अनि ओद रान्डि आसक सोबाय बुतो केवे मनि अनि आपुना बालकिन पालन पोषन किस वरताहकुन सोबाय गिरदाते मानेमास पवित्र लोकुरा सेवा केवे मन्दिला पहाजे, अनि दुःखि लोकुरकुन मदत किस सबोय सोबाय बुतो कियान साटि मन्दे गिरदा केवे मन्दिला पहाजे। इदाम रान्डि आसकना पोरोय मसिलोकुरा सभाता मदत सुचितिगा कोटिला पहाजे। 11 अनि लयांग रान्डिहना पोरोय निमा सुचिते कोटमा बाक्याकि ओव मरमिंग कियान साटि विचार किस येसु मसिना विस्वासतुन तासिस ओव असा मरमिंग कियानुंग। 12 ओव येसु मसिनासंग पहलेकिता आपुना शपथ हरचिन्तांग इन्जोर ओवहकुन दन्ड पुटार। 13 अनि ओव लोहक लोहक वलिसुन दुसरोना चाहळिंग वळकसुन आळसि बनेमान्तांग अनि अचोने आयो ते अनुचित पोल्लोतुन पकाय वळकसोरिन बिना जरुरते दुसरो बुतो केवाल लोकुरा नडुम दान्ता। 14 इन्जोर लयांग रान्डि आसक मरमिंग किसुन बालकुन जनम हिस आपुना परिवारतुन सोबाय संभालेकेवि अनि अदामे दुश्मनतुन दोष हियाला सन्दि हेमाकि इन्जोर नावा इच्चा मन्ता। 15 बाक्याकि हुचुक लयांग रान्डि आसक इदेकेन बहकेमास सयताना परके हतुंग। 16 बोदायि विस्वासि बायिना लोतिगा रान्डि आसक मन्तांग ते ओद विस्वासि बायि ओव रान्डि आसकुन मदत केवि। बाक्याकि ओव रान्डि आसक मसिलोकुरा सभातिगा भार आयमाकि। इदाम कियाकिट ते खरोय रान्डि आसक मन्तांग अवेहकुन मसिलोकुरा सभा मदत किपरान्तोर। मसिलोकुरा सभाता मुक्याल लोकुरा बारेते 17 अनि मसिलोकुरा सभाता मुक्याल लोकुरकुन विशेषाल मेहनत किस प्रबुना पोल्लोतुन वेहवाल अनि करिहवाल लोकुरकुन पकाय आदर हिम्ट। 18 बाक्याकि “विसाना बेरा कोन्दाना टोडितुन दोहमाट” इन्जोर प्रबुना पवित्र पुस्तकतिगा कोटताल मन्ता बाक्याकि कोन्दा मिया साटि बुतोकिन्ता इन्जोर अदेन तिन्दिला हियाला पहाजे। अदामे बुतोकेवाल आपुना बुतोता रोजि स्विकार कियान साटि योग्य मन्तोरक। 19 अनि बसकेय रन्ड मून्ड लोकुरा गवाह हिलवेक मसिलोकुरा सभाता मुक्याल लोकुरकनिगा दोष केमाट। 20 अनि पाप कितोर मानेयतुन सबोय लोकुरा मुने रांगा बाक्याकि अद हुळसुन दुसरो विस्वासि लोकुरक वने वरियला पहाजे। 21 अनि निमा आपुना मन्दे इद पोल्लोतुन स्विकार किसुन मानेमाम अनि बोदे बुतोतुन बोनागाय भेदभावते केमा इन्जोर परमेस्वर, येसु मसि अनि आचतोर स्वरगदूतकना मुने नना आग्या हिन्तोना। 22 अनि मसिलोकुरा सभाता मुक्याल लोकुरकुन सान्डेय आचमाट, बाक्याकि पाप केवाल वरोर मानेयतुन निमा मसिलोकुरा सभाता मुक्याल बनेकियाकि अनि ओर पाप कियानुर ते परमेस्वरना मुने निमा ओना पापता जिमेदार आयकि इन्जोर निमा आपुनतुन पवित्र बनेकिम। 23 अनि निमा केवल एर उन्जोर मनमा मति दरोज निया पोटाते बिमार अरान्तोन इन्जोर निमा अंगुरता जोमा वने हुळुन्सा उन्जोर हन। 24 अनि हुचुक लोकुरा पाप परमेस्वर नाय कियानाता पहले लोकुरा मुने प्रगट आन्ता अनि हुचुक लोकुरक चुपचाप पाप किन्तोरक अद पाप नायता दियाते प्रगट आयार। 25 अनि अदामे सोबाय बुतो वने प्रगट आयार अनि बोदे सोबाय बुतोतुन दरोज साटि मकिहिला परोरक। |
© (Active) Wycliffe Bible Translators, Inc. All rights reserved.
Wycliffe Bible Translators, Inc.