१ तिमुति 4 - Muria Far Western

खोटाल उपदेशता विरोद चेतावनि।

¹ मति येसु मसिना असा मल्स वायाना मुने हुचुक लोकुरक परमेस्वरना खरोय उपदेशतुन हरचियानुरक इन्जोर परमेस्वरना आत्मा साप रुपते वेहिन्तोर। अनि ओरक दोखा हेवाल दुष्टात्माता पोल्लो केन्जानुरक अनि दुष्टात्मा बाताल करहान्ता ओद खोटाल उपदेशतिगा लोकुरक विस्वास कियानुरक।

² अनि इद खोटाल करहानातुन करिहवालोरक परमेस्वरनिगा सोबाय विस्वास केवाल लेहका आपुनातुन प्रगट किसोर वान्तोर मति ओर खोटाल उपदेशतुन करहान्तोरक। अनि ओर बाताल करहान्तोर ओद पोल्लो गलति मन्ता इन्जोर बसकेय ओरक समजेमायोरक।

³ अनि लोकुरक मरमिंग केमाट अनि हुचुक विशेषाल तिन्दाना चिजतुन तिनमाट इन्जोर खोटाल शिक्षण करिहवालोरक मना कियानुरक। मति खरोयतुन पुनवालोर विस्वासि लोकुरक अदेन परमेस्वरना धन्यवाद किस तिनिर इन्जोर परमेस्वर अवेहकुन बनेहकितुर।

⁴ अनि सबोय चिजतुन परमेस्वर सोबाय बनेकितोर इन्जोर बोदे तिन्दाना चिजतुन मना केमाट बाक्याकि परमेस्वरना धन्यवाद किसुन सबोय तिन्दाना चिजतुन तिनपरान्तोरोम,

⁵ बाक्याकि सबोय तिन्दाना चिजतुन परमेस्वरना प्रार्थना किस तिनविर ते ओद चिज शुद्ध आन्ता इन्जोर परमेस्वर वेहतोर।

⁶ अनि हे तिमुथियुस, नना निकुन वेहता सबोय पोल्लोंग विस्वासि लोकुरकुन समजेहकिस परमेस्वरना खरोय पोल्लो अनि अदेना बारेता खरोय उपदेश निमा पालन कियाकि ते निमा परमेस्वरना सोबाय सेवक बनेमायकि।

⁷ अनि ओद खोटाल अनि व्यर्थ पिटोतुन पुरा इन्कार किम; अनि इदाम पिटो सिरानते बनेकितुरक मति इव खोटाल अनि व्यर्थ पिटेंग लोकुरकुन परमेस्वरना आदर कियान साटि मदत केवोंग इन्जोर निमा परमेस्वरना खरोय उपदेशता पालन कियाकि ते निमा परमेस्वरिन गिरदा केवाल मानेय आयकि।

⁸ बाक्यकि आपुना मेन्दुलतुन मजबुत बनेकियान साटि माक कसरत किन्तोरोम अनि माक दरतितिगा मन्तोरोम अचोवनाहका इद कसरत माकुन मदत किन्ता। मति परमेस्वरिन गिरदा कियाना बुतो अदेनताल वने पकाय सोबाय मन्ता बाक्याकि इदाम बुतो कियाकि ते इद काळते अनि अनन्त काळते वने जिवन जगेमायिला मदत आयार।

⁹ अनि नना वेहता इव सबोय पोल्लोंग खरोय अनि सबोय लोकुरकुन स्विकार कियान साटि योग्य मन्ता।

¹⁰ अनि इद कारणते माक जिवित परमेस्वरनिगा आशा इरस पकाय मेहनत किन्तोरोम। ओर सबोय लोकुरकुन विशेषाल ओनागा विस्वास किन्तोर ओर लोकुरकुन मुक्ति हेवाल मन्तोर।

¹¹ अनि नना कोटता इव सबोय पोल्लोतुन पालनकियान साटि विस्वासि लोकुरकुन निमा आग्या हिम अनि इव पोल्लोंग निमा सबोय विस्वासि लोकुरकुन करहा।

¹² अनि बोरे निकुन हुडलोर समजेमायमाकिर बाक्याकि ओरकुन करहान साटि निमा पकाय लयोर मानेय मन्तोन। निया वळकाना रिति, चाल चलन, दुसरो लोकुरा बारेते निया माया, विस्वास, अनि निया जिवनता पवित्रता इद सबोय पोल्लोते निमा सबोय विस्वासि लोकुरकुन सोबाय आदरश बनेमाम।

¹³ अनि नना निया हेरे वायानवनाह, परमेस्वरना मुने मसिलोकुरा सभातिगा विस्वासि लोकुरासंग प्रार्थनाकियान साटि मिलेमायाना बेरा परमेस्वरना पोल्लोंग सबोय विस्वासि लोकुरक साटि जोरदे वाचेकिम। अनि परमेस्वरना खरोय उपदेश करहा अनि परमेस्वरना पोल्लोता अर्थ निमा सरल रुपते समजेकिस वेहा।

¹⁴ अनि मसिलोकुरा सभाता मुक्याल लोकुरक नियागा ओरा कय इरसुन प्रार्थना किस ओर लोकुरक निया बारेते परमेस्वरना पोल्लो वेहतुरक असके परमेस्वर निकुन हिता वरदानतुन निमा बसकेय तुच्च मानेमायमा।

¹⁵ अनि निकुन कियान साटि नना वेहता पोल्लोंग पुरा ध्यान किसोर मन। इन्जोर निमा मसि सेवकना योग्य सोबाता पोल्लो वेहचुन अनि करिहसुन आपुना वरदानते बरसोर मन्तोन इन्जोर सबोय लोकुरक निया बारेते समजेमायनुरक।

¹⁶ अनि निया व्यवहार अनि करहानाता बारेते पकाय सावदान मन बाक्याकि निमा करिहता ओद उपदेश खरोय उपदेश मन्ता इन्जोर निमा पकाय ध्यान किम। अनि नना निकुन कियान साटि वेहता इव सबोय पोल्लोतुन निमा दरोज किसोर मन। इदाम निमा किसोर मनकि ते परमेस्वर निकुन सबोय गलतिताल पिसाहानुर अनि निया सन्देश केन्जान्तोर ओर लोकुरकुन वने पिसानुरक।