१ तिमुति 3 - Muria Far Western

मसिलोकुरा सभाता अध्यक्ष

¹ अनि बोरे मसिलोकुरा सभाता अध्यक्ष आयान साटि इच्चा किन्तोर ते ओर सोबाय बुतोता इच्चा इरान्तोर इन्जोर विस्वासयोग्य मन्ता।

² अनि अध्यक्ष निरदोष मनिर, उन्दिय मुतेवाले मनिर, शान्ति स्वभावतोर मनिर अनि लोकुरासंग सोबाय संबन्द केवाल, लोकुरा आदर केवाल, वरताहकुन सोबाय गिरदाते मानेमायवाल अनि सोबाय उपदेश केवाल मनिर,

³ अनि अध्यक्ष दाळंगो उन्वाल अनि पिटिहवाल मनमाकिर मति ओर कोमल स्वभावतोर मनिर, वाहचवाल मनमाकिर अनि गलत बुतो किसुन पयसांग कमेय केवाल मनमाकिर।

⁴ अनि आपुना परिवारतुन सोबाय पाले केवाल अनि आपुना बालकनुंग आपुना सबोय आग्याते पालन केवाल मनिर।

⁵ (अनि बोरे आपुना परिवारतुन बराबर पालन कियाना पुनोर ते ओर मसिलोकुरा सभातुन बदाम पालन किया परानुर?)

⁶ अनि अध्यक्ष पुनोर विस्वासि वने आयमाकिर बाक्याकि सयतान आपुना मन्दे घमन्ड किसुन दन्डमिलेमातु अदामे पुनोर विस्वासि वने आपुना मन्दे घमन्ड किसुन दन्डतिगा अरमाकिर।

⁷ अनि अविस्वासि लोकुरासंग सोबाय गवाहि मनिर बाक्याकि उन्दि जानवर सिकारिना जालितिगा पसेमान्ता अनि अगडाल पसिय परो अदाम लेहका ओर वने सयताना कयदे पसेमास दुसरो लोकुरा नडुम निन्दा आयमाकिर।

मसिलोकुरा सभाता सेवक

⁸ अनि मसिलोकुरा सभाता सेवकलोकुरक गम्बिर आयिला पहाजे अनि लोकुरा मुने उन्दि पोल्लो वळकसुन परके दुसरो पोल्लोंग वळकवाल आयमाकिर अनि दाळंगो उनवालोर अनि गलत बुतो किसुन पयसांग कमेय केवालोर मनमाकिर।

⁹ अनि परमेस्वर बोद खरोय पोल्लो प्रगटकितुर ओद खरोय पोल्लोतुन सोबाय विस्वास केवाल मनिर।

¹⁰ अनि मसिलोकुरा सभाता सेवाकेवाल लोकुरा जिवनता बारेते निमा सोबाय हुळस पुन अनि बोरे निरदोष पसियतुर ते ओरे मसिलोकुरा सभाता सेवक बनेमायिर।

¹¹ अनि मसिलोकुरा सभाता सेवातुन मदत केवांग आसक वने गम्बिर अनि सम्मानता योग्य आयिला पहाजे; दोष केवि आयमाकि अनि हर पोल्लोते विस्वास योग्य आयि।

¹² अनि सेवक लोकुरक उन्दि मुत्तेना मुजोहराल मनिर अनि आपुना परिवारतुन सोबाय प्रबन्द केवाल आयिर

¹³ बाक्याकि मसिलोकुरा सभाता सोबाय बुतो किन्तोर ओरक सेवक लोकुरकुन दुसरो लोकुरा आदर मिलेमायार। अनि मसिनिगा विस्वास किन्तोर ओरक सेवक लोकुरा विस्वासता बारेते दुसरोन वने वेहान साटि ओरकुन पकाय हिमत पुटार।

मावा जिवाता रहस्य।

¹⁴ नना निया हेरे सान्डे वायाना आशा मन्ता इन्जोर नना निकुन पहले इव पोल्लोंग कोटान्तोना,

¹⁵ परमेस्वरना परिवारतिगा वरोर मानेय बदाम मन्दान इन्जोर नाकुन वायान साटि पकाय बेरा आयार ते इद निमाट समजेमायिला पहाजे। बाक्याकि परमेस्वरना परिवार मन्जे जिवित परमेस्वरना मसिलोकुरा सभा मन्ता। अनि इगा सबोय विस्वासि लोकुरक विस्वासता पायवा अनि खम्बा लेहका मन्तोरक। अनि बदाम पायवा अनि खम्बा पुरा लोतुन लाव हिन्ता अदामे मसिलोकुरा सभाता विस्वासि लोकुरक सोबाता पोल्लोतुन लाव हिन्तोरक।

¹⁶ अनि मसिहा मानेय आस जनम आतुर अनि ओर मसिहा आन्दुर इन्जोर पवित्र आत्माता द्वारा प्रगट आतुर। अनि स्वरग दूततुन दिसतुर अनि येसु मसिना बारेते ओनोर चेला लोकुरक सबोय जातिता लोकुरकुन वेहतुर। पजा लोकुरक ओनिगा विस्वास कितुरक। अनि परमेस्वर ओन स्वरगतिगा येतितुर। इदाम माक बाताल विस्वास किन्तोरोम अदेना खरोयिता रहस्य पकाय हजोर मन्ता। अनि इदेना बारेते बाताले शंका माकुन हिले।