१ तिमुति 2 - Muria Far Western

प्रार्थनाता बारेते निरदेश

¹ अनि निमाट सबोय लोकुरक साटि प्रार्थना अनि धन्यवाद किम्ट इन्जोर सबोयता पहले नना इद उपदेश हिन्तोना,

² विशेषाल राजाह साटि अनि सबोय हजोर सरकारि नवकरि लोकुरक साटि प्रार्थना किम्ट बाक्याकि ओरक आपुना देशतोरक लोकुरकुन खरोय रितिते न्याय अनि सोबाय शासन कियान साटि परमेस्वर ओरकुन मदत कियाला पहाजे। अनि इदाम सबोय लोकुरकुन साटि प्रार्थना कियाकिट ते माक सोबाय शान्ति अनि परमेस्वरना इच्चाता अनुसार मन्दा परान्तोरोम।

³ अनि मावा पिसिहवाल परमेस्वरना मुने सबोय लोकुरक साटि प्रार्थना कियाना सोबाय अनि येताना योग्य मन्ता,

⁴ अनि सबोय लोकुरक परमेस्वरना द्वारा पिसाना स्विकार केविर अनि ओरक परमेस्वरना खरोय उपदेशतुन समजेमायिला पहाजे इन्जोर परमेस्वरना इच्चा मन्ता।

⁵ बाक्याकि सबोय लोकुरक साटि वरोरे परमेस्वर मन्तोर। अनि परमेस्वर अनि सबोय लोकुरकना नडुमते मध्यस्तकेवाल वने वरोरेय मन्तोर अनि ओर येसु मसि आन्दुर, ओर मानेय आस जनम आतुर,

⁶ ओर सबोय लोकुरा पापता पिसाना साटि आपुना जिवनतुन कुरुसतिगा बलिदान हितुर लेहचियानाता इद गवाहि परमेस्वर सबोय लोकुरकुन खरोय बेराते हितुर।

⁷ अनि येसु मसि कुरुस पोरो हातुर इन्जोर सबोय लोकुरकुन आपुना पापते लेहचियाना पुटार। अनि इद पोल्लोतुन यहुदि आयोर लोकुरकुन करहान साटि नाकुन वेहवाल अनि येसुना खास चेला आस आचतुर। अनि नावा इव पोल्लोंग खोटाल पोल्लो आयो मति पकाय खरोय मन्तांग।

⁸ इन्जोर निमाट बगाय प्रार्थनाकियान साटि मिलेमायिकिट ते निमाट मानेयक वरोन दुसरोनसंग होंग अनि बहस हरचिस आपुना मन अनि मेन्दुल पवित्र योग्य बनेकिसुन प्रार्थना किम्ट।

⁹ अनि निमाट सबोय लोकुरक प्रार्थना साटि मिलेमायाना बेरा आसक आपुना सन्दराना बारते सोबाय ध्यान केविंग, अनि बोदायि शानवाले सन्दरा करमाकि। अनि लोकुरकुन आकर्षन साटि आपुना कल्कना पकाय सिंगार केमाट। अनि पकाय पयसाना सन्दरांग अनि मोतिंग अनि सोनाता सिंगार केमाकि। इदाम किसुन आसक शालिनाता अनि संयम स्वभावता मनि,

¹⁰ मति परमेस्वरना भक्ति स्विकार केवे आसकुन उचित मन्ता ओद भलायिता बुतोंग किसुन आपुनतुन आकर्षन केवि।

¹¹ अनि मसिलोकुरा सभातिगा करिहवाल परमेस्वरना सोबाता पोल्लोतुन करियानपा आसक पुरा आदर किसुन कमेक उदस करियिला पहाजे।

¹² अनि मानेयनिगा अदिकार कियाना अनि आत्मिक खरोयता बारेते करहाना इदाम बाताले परवांगि आसकुन नना हेवोन।

¹³ बाक्याकि आदम पोरोयतोर मानेयतुन परमेस्वर पहले बनेकितुर, पजा हव्वा पोरोयता आळदुन बनेकितुर।

¹⁴ अनि मानेय आयो मति आळेय पसेमास पाप कितु।

¹⁵ मति आसक परमेस्वरना खरोय पोल्लोता अनुसार परमेस्वरनिगा सोबाय विस्वास अनि मया किसुन आपुना जिवातुन पवित्र बनेकिस विस्वास किसोर मनिंग ते बालकुन जनम हियाकि तेवने परमेस्वर आसकुन पिसहानुर।