१ तिमुति 1 - Muria Far Western

अभिवादन

¹ मावा पिसिहवाल परमेस्वर अनि मावा आशा हेवाल येसु मसिना आग्याता अनुसार नना पोलुस येसु मसिना खास चेला बनेमास, विस्वासते नावोर मरि लेहका मन्तोन तिमुथियुसिन इद पत्र कोटान्तोना।

² अनि बाबो परमेस्वर अनि मावोर प्रबु येसु मसिनिकेडाल निकुन कृपा, दया अनि शान्ति हेविर।

खोटाल उपदेश करिहवाल मानेयकना विरोद इशारा।

³ अनि इफिसुस सहेरतिगा मन्ज सबोय खोटाल प्रकारता करहानातुन बन्द कियान साटि हुचुक लोकुरकुन आग्या हिम इन्जोर नना रोमि देशता मकदुनिया प्रदेशतिके हन्दानपा निकुन सोबाय समजेकिस मतोना,

⁴ अनि खोटाल उपदेश करिहवालोरक आपुना पिळि पिळिता कालपनिक पिटेंग अनि आपुना दादा दादि लोकुरकना अनन्त वंशावलिता बारेते बहस किन्तोर, इदाम खोटाल उपदेश करिहवालोरकना सबोय पोल्लोतुन रोकेकिम बाक्याकि इद बहस परमेस्वरना योजना अनुसार आयो। अनि परमेस्वरना बुतोतुन परमेस्वरनिगा भरोसा किसुन कियाला पहाजे मति इद बहस खरोय विस्वासते मुने हन्दान साटि बसकेय मदत केवो।

⁵ अनि सबोय लोकुरक परमेस्वरना मयाता द्वारा पवित्र मन, खरोय अनि गलतितुन समजेमायान साटि सोबाय बुद्धि, अनि परमेस्वरनिगा कपटरहित विस्वास कियाला पहाजे इन्जोर मावा आग्याता उदेश मन्ता।

⁶ अनि हुचुलोर लोकुरक परमेस्वरना खरोय पोल्लोतुन हरचुन काल्पनिक पिटो अनि अनन्त वंशावलिता बारेता बहसते भटकेमातुरक।

⁷ अनि माक मूसाना द्वारा परमेस्वर लोकुरकुन हिता नियमतुन करिहवाल आयिकाट इन्जोर ओरक इच्चा किन्तोर, मति ओर पकाय विस्वासते करहान्तोर ओद पोल्लोता अर्थ बाताल मन्ता इन्जोर वने ओरकुन बाताले समजेमायो।

⁸ अनि मूसाना द्वारा परमेस्वर हिता नियमतुन खरोय रितिते पालन कियाकिट ते ओद नियम सोबाय मन्ता इन्जोर माक समजेमान्तोरोम।

⁹ अनि लोकुरक पापि मन्तोर इन्जोर परमेस्वर लोकुरक साटि नियमतुन हितुर इदाम माक समजेमान्तोरोम। अनि परमेस्वरना ओद नियमतुन तोळेकेवालोरक अनि परमेस्वरना ओद नियमतुन विरोद बुतोकेवाल लोकुरक अनि परमेस्वरतुन आदर केवोरक लोकुरक अनि दरोज पाप किस बसकेय पस्तेमायोरक अनि बोर प्रबुना मुने पवित्र जिवन जिवे केवोरक अनि बोर आपुना अवाल बाबोन हव्किन्तोरक अनि दुसरोन वने हव्किन्तोरक इदाम सबोय लोकुरक साटि परमेस्वर नियम हितुर,

¹⁰ अनि मूसाना द्वारा परमेस्वर हिता नियम इदाम लोकुरक साटि मन्ता, बोर लोकुरक व्यभिचार किन्तोरक अनि समान लिंग लोकुरासंग कुकरम किन्तोरक अनि दासता लेहका दुसरोन मोमसुन पयसांग कमेहकिन्तोरक अनि खोटाल वळकवालोरक अनि खोटाल शपथ येतान्तोर अनि खरोय उपदेशता विरोद बुतो किन्तोर इदाम सबोय लोकुरक साटि मन्ता।

¹¹ इद करहाना परमेस्वरना सोबाता पोल्लोता अनुसार मन्ता, ओद सोबाता पोल्लो दुसरो लोकुरकुन वेहान साटि हजोर परमेस्वर नाकुन आचतुर इन्जोर नना परमेस्वरना धन्यवाद किन्तोना।

परमेस्वरना दया साटि धन्यवाद

¹² अनि नाकुन लाव हितोर ओर आपुना प्रबु येसु मसि नाकुन विस्वासयोग्य हुळसुन ओना सेवा साटि ठहरे कितुर इन्जोर नना ओन धन्यवाद किन्तोना।

¹³ अनि येसु मसि नाकुन आचाना मुने नना ओना निन्दा किन्तोना अनि ओनागा विस्वास किन्दुर ओर लोकुरकुन पकाय तकलिप किसोर मतोना अनि ओरकुन पकाय हिंसा किन्दान। मति नना इदाम गलति कियाना बेरा प्रबु येसु मसिनिगा विस्वास केवोन आसि अनि ओना खरोय पोल्लोतुन समजेमायो आसि इन्जोर ओर नाकुन मापि कितुर।

¹⁴ अनि मावा प्रबुना दया नाकुन पकाय पुटतु। अनि नना येसु मसिनासंग मन्तोना इन्जोर नना ओनागा विस्वास कियापरान्तोना अनि दुसरोन वने मया कियापरान्तोना।

¹⁵ अनि येसु मसि पापि लोकुरकुन मुक्ति कियान साटि दरतिते वातोर इद पोल्लो खरोय अनि सबोय लोकुरक स्विकार कियान योग्य मन्ता। अनि ओर पापि लोकुरकनिगाडाल नना सबोयताल हजोर पापि मन्तोना।

¹⁶ अनि नना सबोयताल हजोर पापि मानेय मतोना मति बचोक हजोर पापि मानेयना पापतुन वने येसु मसि मापि कियानुर इन्जोर लोकुरकुन प्रगट कियान साटि नना आपुना पापताल पस्तेमातान असके ओर नावागा दया किसुन नावा सबोय पापतुन मापि कितुर। इन्जोर लोकुरक ओनागा विस्वास कियापरान्तोरक अनि अनन्तकाळ ओना संग मन्दिला परान्तोरक।

¹⁷ अनि ओर सबोय काळतोर राजाल मन्तोर अनि बसकेय हायोर अनि बोरे मानेयना कोन्डाते हूळ परोर। अनि ओर परमेस्वर अनन्त काळते राज किन्तोर। अनि ओर परमेस्वरतुन आदर अनि महिमा दरोज मन्दार। आमेन।

¹⁸ हे नावोर मरि लेहका मन्तोन तिमुथियुस, पहलेटाले निया बारेते पुटता परमेस्वरना पोल्लोता अनुसार उन्दि सयनिक आपुना देश साटि बदाम लळायि किन्तोर अदामे निमा वने परमेस्वरना खरोय उपदेशतुन जिकान साटि लळायि किम इन्जोर नना निकुन आग्या हिन्तोना।

¹⁹ अनि प्रबु येसु मसिना पोरोयता दरोज विस्वास किम अनि खरोय अनि गलति बाताल मन्ता इन्जोर दरोज समजेमायिला पहाजे। अनि हुचुक लोकुरक खरोय अनि गलति बाताल मन्ता इन्जोर ओद समजनातुन हरचितुरक। अनि उन्दि जहाज बदाम समुद्रतिगा मुळदिन्ता अनि पुरा नाश आन्ता अदामे खरोय उपदेशतुन हरचवालोरा विस्वास पुरा नाश आतु।

²⁰ अनि हुमिनयुस अनि सिकन्दर ओरा संगे मन्तोरक; नना ओरकुन खरोय मसि विस्वासि लोकुरा सभातिगाडाल लक कितान बाक्याकि खरोय उपदेशतुन निन्दा केमाट इन्जोर ओरक समजेमायिला पहाजे।