१ तिस्लुनि 5 - Muria Far Westernयेसुना असा मल्स वायान साटि तयारि किम्ट। 1 अनि हे बायि-दादालोरक, प्रबु येसुना वायानाता बेरा अनि काळतांग बारेते असा वने मिकुन कोटानाता जरुरि हिले। 2 बाक्याकि कलेर नरका बदाम कमेक वान्तोर अदामे प्रबुना दुसरो बेरा मलस वायाना सान्डेय आयार इन्जोर निमाट सोबाय पुन्तोरिट। 3 इदेक माकुन सबोय शान्तिते अनि सोबाय मन्तोम इन्जोर लोकुरक इन्तोर मति बदाम गरभवतितुन बालक जनम आयान साटि नोमुर वायार अदाम लेहका सान्डे ओरागा हजोर नाशता दन्ड वायार। 4 हे बायि-दादालोरक, कलेर लेहका अद दियांग मिकुन पयमाकिर बाक्याकि निमाट आन्दारते मनवालोरक लोकुरक आयविट। 5 बाक्याकि निमाट अन्दकारता बालक आयविट मति निमाट सबोय लोकुरक वेळिचिता अनि पियालता बालक आन्दिट। 6 इन्जोर निमाट अविस्वासि लोकुरक लेहका मिया हेरे बाताल बाताल आन्ता अदेना बारेते पुन्वाप लेहका मनमाट मति निमाट पकाय ध्यान किसुन आपुना मन अनि मेन्दुलतुन नियन्त्रन किसोरिन मन्ट। 7 बाक्याकि बोर हुन्जतोरक ओर लोकुरक नरका हुन्जान्तोरक अनि बोर दाळंगो उन्तोरक ओर नरका दाळंगो उन्तोरक। 8 माक विस्वासता अनि मयाता चिलम करसुन अनि टोपि लेहका पिसानाता आशा करसुन मनकाट बाक्याकि माक पियालता बालक मन्तोरोम। 9 अनि परमेस्वरना दन्ड साटि आयो मति परमेस्वर माकुन प्रबु येसुना द्वारा पिसाना पुटान साटि माकुन आचतुर। 10 अनि माक जिवित मन्तोरोम या हास मतोरोम ते वने मावा साटि हातोर मावोर प्रबु येसु मसि वायाना बेरा ओनासंग माक वने असा जिवेमायन साटि ओर प्रबु येसु मसिना द्वारा पुटता मुक्तितुन पुटहान साटि परमेस्वर माकुन ठहरे कितुर। 11 इन्जोर इदेक निमाट बदाम किसोर मन्दिट अदामे वरोन दुसरोन आत्मिक प्रोत्साहन किम्ट अनि वरोन दुसरोन प्रबुना विस्वासते मजबुत किसोर मन्ट। मसिलोकुरा सभा साटि आकरि उपदेश। 12 हे बायि-दादालोरक, मिया साटि मेहनत किन्तोर ओरक मुक्याल लोकुरकुन अनि आत्मिक मार्गदर्शन किन्तोर ओर लोकुरकुन निमाट मानेमाम्ट इन्जोर माक मिकुन विनन्ति किन्तोरोम। 13 अनि ओर प्रबुना सेवाकिन्तोरक इन्जोर ओर लोकुरकुन निमाट पकाय मया किम्ट इन्जोर असा वने माक विनन्ति किन्तोरोम। अनि निमाट आपसते मेल-मिलाप किसोर मन्ट। 14 हे बायि-दादालोरक, बोरे गलति रितिते दान्तोर ते ओरकुन ओरा गलतितुन समजेहकिम्ट इन्जोर माक मिकुन वेहान्तोरोम। अनि बोरे मन्दे कमजोर मन्तोर ते ओरकुन मजबुत किम्ट। अनि कमजोर लोकुरकुन संभाले किम्ट अनि सबोय लोकुरासंग धीरज तोहाट। 15 अनि सावदान मन्ट! बोरे खराब बुतोता बदला खराब बुतो केमाट अनि सबोय लोकुरासंग दरोज भलायि किसोर मन्ट। 16 अनि दरोज गिरदाते मन्ट 17 अनि दरोज प्रार्थना किसोर मन्ट। 18 अनि सबोय पोल्लो साटि परमेस्वरना धन्यवाद किम्ट बाक्याकि मिया बारेते परमेस्वरना इदे इच्चा मन्ता। 19 अनि पवित्र आत्माता बुतोतुन रोके केमाट। 20 अनि परमेस्वरना पोल्लोतुन तुच्च समजेमायमाट। 21 अनि सबोय पोल्लोतुन परिक्षाकिसुन सोबाय पोल्लोतुन पयिस मन्ट। 22 अनि सबोय खराब पोल्लोंगताल पिस मन्ट। आशिरवाद। 23 अनि शान्ति हिसोर परमेस्वर मिकुन पवित्र बनेहकेविर, मिया आत्मा, मिया जिवा अनि मिया मेन्दुलतुन मावोर प्रबु येसु मसिना दुसरो बेरा प्रगट आयानपा पुरा निरदोष बनेकिसुन ओना मुने प्रगट आयान साटि मिकुन सुरक्षित मनि। 24 अनि मिकुन केयवाल परमेस्वर विस्वासयोग्य मन्तोर अनि ओर ओदेन अदामे पुराकियानुर। 25 हे बायि-दादालोरक, निमाट मावा साटि वने प्रार्थना किम्ट। 26 अनि सबोय विस्वासि लोकुरकुन येसु मसिना मयाते आपसते नमस्कार किम्ट। 27 अनि इद पत्र सबोय विस्वासि लोकुरक साटि निमा वाचेकिस वेहा इन्जोर प्रबुना पोरोयते नना असा विनन्ति किन्तोना। 28 मावोर प्रबु येसु मसिना दया मियागा आसोर मनि। |
© (Active) Wycliffe Bible Translators, Inc. All rights reserved.
Wycliffe Bible Translators, Inc.