१ तिस्लुनि 4 - Muria Far Western

परमेस्वरिन गिरदा केवाल जिवन।

¹ इन्जोर हे बायि-दादालोरक, बदाम निमाट मावाकेडाल योग्य चाल चलन ताकाना अनि परमेस्वरतुन गिरिदा कियाना करियतोरिट, अदाम निमाट ताकिन्तोरिट अनि असा वने विळसोर हन्ट इन्जोर माक मिकुन विनन्ति किस समजेकिन्तोरोम।

² बाक्याकि निमाट पुन्तोरिट माक प्रबु येसुनिगाडाल मिकुन साटि बोद बोद आग्या करिहतोम इन्जोर।

³ बाक्याकि निमाट पवित्र जिवन बनेमाम्ट मन्जे व्यभिचार लोकुराताल लक मन्ट इन्जोर परमेस्वरना इच्चा मन्ता।

⁴ अनि निमाट सबोय लोकुरक आपुना शरिरतुन पवित्र अनि आदरतासंग बदाम संभालेकियाना इन्जोर निमाट समजेमायिला पहाजे।

⁵ अनि परमेस्वरतुन समजेमायोर ओर अविस्वासि लोकुरा लेहका वासनाता काबुते आयमाट।

⁶ अनि इद पोल्लोतिगा वरोर विस्वासि दुसरो विस्वासिलोरा विरुद पाप केमाकिर अनि दोखा केमाकिर। बाक्याकि इद पोल्लोसाटि प्रबु ओरकुन दन्ड कियानुर इन्जोर माक पहले मिकुन सतेकिसुन वेहच मतोम।

⁷ बाक्याकि परमेस्वर माकुन अशुद्धि आयान साटि आयो मति पवित्र आयाना साटि केयतुर।

⁸ इन्जोर बोरे इद पोल्लोतुन तुच्च समजेमान्तोर ते ओर बोरे मानेयतुन आयो मति पवित्र आत्मातुन हिन्तोर ओर परमेस्वरतुन तुच्च समजेमान्तोर।

⁹ अनि सबोय विस्वासि लोकुरकुन मया कियानाता बारेते मिकुन कोटानाता जरुरि हिले इन्जोर निमाट पुन्तोरिट, बाक्याकि निमाट आपसते मया किम्ट इन्जोर परमेस्वर मिकुन करिहतोर।

¹⁰ अनि मकिदुनिया प्रदेशता सबोय विस्वासिलोकुरक इदाम आपसता मया किन्तोरिट। मति हे बायि-दादालोरक, असा वने निमाट आपसते मया किसुन मुने हन्ट इन्जोर माक प्रोत्साहन किन्तोरोम।

¹¹ बदाम मिकुन आग्या किन्तोरोम अदामे निमाट वरोर दुसरो विस्वासिना बुतोतिगा कय लावे केमाकिर, अनि आप आपुना कयदे आपुना बुतोकिसुन पयसांग कमेहकियाना कोसिस किम्ट,

¹² इदाम व्यवहार कियाकिट ते अविस्वासि लोकुरक मिया आदर कियानुरक अनि मिकुन बोदे पोल्लोता कमि आयो आयार।

येसुना असा मल्स वायाना अनि हातोर लोकुरा असा जिवेमायना

¹³ हे बायि-दादालोरक, बोर येसु मसिनिगा विस्वास किस हातोरक ओर लोकुरकना बारेते निमाट समजेमायिला पहाजे इन्जोर माक इच्चा किन्तोरोम। बाक्याकि येसु मसिनिगा विस्वास केवोर आस हातोर लोकुरकना बारेते बोदे आशा हिले। अनि निमाट ओरा लेहका दुःख किसुन मनमाट।

¹⁴ अनि प्रबु येसु हासुन असा जिवेमातुर अनि प्रबु येसुनिगा विस्वास किसुन हातुरक ओर लोकुरकुन वने येसुना वायाना बेरा परमेस्वर येसुनासंग ओरक असा जितो कियाहनुर इन्जोर माक विस्वास किन्तोरोम।

¹⁵ बाक्याकि प्रबुना वायाना बेराते बोर जिवित मन्तोरक ओर विस्वासिलोकुरक हातोर लोकुरकना पहले प्रबुन मिलेमायोर आयनुर इन्जोर माक प्रबुना पोल्लोता अनुसार मिकुन इन्तोरोम।

¹⁶ बाक्याकि प्रबु पकाय जोरदे आग्या हियानुर अनि मुक्याल स्वरग दूतना लेंग अनि परमेस्वरना पिपारिता लेंग केन्जवायार असके स्वरगताल प्रबु आपुनास रेयानुर, असके येसु मसिनिगा विस्वास किसुन हातोर ओर लोकुरक पहले असा जिवेमायनुरक।

¹⁷ इदेना परके ओद बेरा जिवित मन्तोरोम माकुन, ओर लोकुरासंग आबारतिगा प्रबुन मिलेमायान साटि ढगिंग पोरो ताहानुर अनि इदाम माक दरोज प्रबुनासंग मनकोम।

¹⁸ इद पोल्लोते निमाट वरोन दुसरोन समादान हिसोर मन्ट।