१ तिस्लुनि 3 - Muria Far Western

तिमुथियुसिन लोहाना

¹ मिया विस्वासता बारेते मिकुन बाताल आतु ओद पोल्लो माक पुनोम इन्जोर माक इगा मन्दा परोम आतोम। अनि माक इवुर, पोलुस अनि सिलवानुस, एथेन्स सहेरतिगा वरोरे मन्दाकोम ते वने बाराय आयो इन्जोर माक निश्चय किन्तोरोम।

² इन्जोर मिकुन विस्वासता बारेते स्थिर कियाना अनि प्रबुना विस्वासता बारेते मिकुन समजेकियान साटि माक तिमुथियुसिन मिया हेरे लोहतोम। ओर येसु मसिना सोबाता पोल्लो वेहानाता द्वारा मावोर तमो अनि परमेस्वरनोर सेवक आन्दुर,

³ अनि बोरे इद तकलिपता द्वारा कसिंगमाकिर बाक्याकि इद पकाय तकलिपतुन सहेमायना साटि माकुन परमेस्वर ठहरे कितोर इन्जोर निमाट पुन्तोरिट।

⁴ बाक्याकि माक तकलिप सहेकिया लागार इन्जोर माक मियासंग मुने मतोरोम असके मिकुन वेहच मतोम। अनि अदाम आतु इन्जोर निमाट पुन्तोरिट।

⁵ इन्जोर परिक्षा एतवाल सयतान मियाय विस्वासतुन परिक्षा केविर अनि मावा मेहनत बेकार आयमाकि इन्जोर नना असा मन परोन आतान। अनि मिया विस्वासता हालचाल पुन्दान साटि नना तिमुथियुसिन मिया हेरे लोहतान।

⁶ अनि इदेक तिमुथियुस मियाकेडाल मावाके वातुर अनि मिया विस्वास अनि मयाता बारेते वेहतुर। अनि निमाट मयातासंग दरोज माकुन आलिहन्तोरिट अनि बदाम मिकुन हुळान साटि माक इच्चा किन्तोरोम अदामे माकुन वने हुळान साटि निमाट इच्चा किन्तोरिट इन्जोर वेहतुर।

⁷ इन्जोर हे बायि-दादालोरक, मावा सबोय दुःख अनि पकाय तकलिपतिगा मिया सोबाय विस्वासता द्वारा माक मिया बारेते समादान पुटता।

⁸ बाक्याकि निमाट प्रबुना विस्वासतिगा स्थिर मन्ट इदाम केन्जुन माक पकाय गिरदा आतोम।

⁹ अनि माक मिया कारण आपुना परमेस्वरना मुने मन्ता ओद गिरदाता बदला मिया बारेते माक बोद प्रकारते परमेस्वरना धन्यवाद किया परकोम?

¹⁰ अनि मिकुन हुळान साटि अनि मिकुन मदतकिस मिया विस्वासता कमि मन्ता अदेन पुरा कियान साटि माक नरका पियाल मिया साटि प्रार्थना किन्तोरोम।

¹¹ इदेक मावोर बाबो परमेस्वर अनि मावोर प्रबु येसु मसि माकुन मियागा वायान साटि माकुन हरि हेविर।

¹² अनि माक मिया साटि मया बरसान्तोरोम अदामे प्रबु मिया मया वने आपसते अनि सबोय लोकुरासंगे बरसोरिंग मुने हनिर।

¹³ अनि बदाम मावोर प्रबु येसु आपुना पवित्र लोकुरासंग वायनुर असके निमाट बाबो परमेस्वरना मुने पवित्र जिवाते निरदोष आयिर इन्जोर मिया मन्दुन प्रबु स्थिर केविर।