१ तिस्लुनि 2 - Muria Far Westernतिस्सलुनिया नाटेनिगा पोलुसना परमेस्वरना सोबाता पोल्लो वेहाना बुतो 1 हे बायि-दादालोरक, मावा मियाके वायाना व्यर्थ आयो इन्जोर निमाट पुन्तोरिट। 2 अनि माक पहले फिलिप्पि सहेरतिगा दुःख अनि पकाय तकलिप सहेन किस पकाय विरोद मन्जकुन वने परमेस्वरना सोबाता पोल्लो मिकुन वेहान साटि परमेस्वर माकुन हिमत हितुर इन्जोर निमाट पुन्तोरिट। 3 बाक्याकि मावा उपदेश खोटाल या बोदे गलति उद्देश्य या चलाकि हिले आसि मति शुद्ध मता। 4 अनि परमेस्वर माकुन योग्य ठहरे किस सोबाता पोल्लोतुन माकुन सोपेकितुर इन्जोर माक वळकिन्तोरोम। अनि माक लोकुरकुन गिरदा कियान साटि कोसिस केवोम मति माक ते परमेस्वरतुन गिरदा किन्तोरोम, बाक्याकि ओर मावा मन्दा उदेशतुन पुन्तोर। 5 माक बसकेय चापलुसि पोल्लो केवोम अनि माक मियाताल पयसांग येताना इच्चा बसकेय केवोम इन्जोर निमाट पुन्तोरिट, इदेक अदेन परमेस्वर वने गवाह मन्तोर। 6 अनि माक मसिना खास चेला मन्तोरोम इन्जोर अदेना अदिकारते माक ताक परान्तोरोम मति माक लोकुरासंग सोबाय रितिते ताकान्तरोम। अनि निमाट अनि दुसरोर वने माकुन मानकियाला पहाजे ओद इच्चा माक हिले आसि। 7 मति उन्दि अवाल आपुना बालकिन पालन पोषन किन्ता अदाम लेहका माक मिया नडुमते मन्जकुन मिकुन सोबाय पालन पोषन कितोम। 8 इदाम माक मिकुन मया किसोर मतोम, केवल परमेस्वरना सोबाता पोल्लो वेहान साटि आयो मति आपुना जिवा हियाला वने माक तेयार मतोम, बाक्याकि निमाट माकुन प्रिय मन्तोरिट। 9 हे बायि-दादालोरक, निमाट मावा परिश्रम अनि मेहनतुन आलिहसोर मन्तोरिट; अनि परमेस्वरना सोबाता पोल्लोतुन वेहचुन माक बोने डब्बुना बारेते तकलिप आयमाकि इन्जोर नरका पियाल माक बुतो किसोर मन्तोम। 10 अनि माक विस्वासि लोकुरा नडुम मिया व्यवहारते पवित्र अनि परमेस्वरना मुने येताना योग्यताते अनि निरदोषते मतोम इन्जोर निमाट अनि परमेस्वर वने गवाहि मन्तोरक। 11-12 मिकुन परमेस्वर आपुना राज्यता महिमाते केयान्तोर, ओना योग्यताता अनुसार चाल चलन कियान साटि बदाम वरोर बाबो आपुना बालकसंग व्यवहार किन्तोर अदामे माक वने सबोय लोकुरकुन उपदेश किन्तोरोम अनि प्रोत्साहन किस मिकुन समजेकिन्तोर इन्जोर निमाट पुन्तोरिट। 13 मावाताल परमेस्वरना सोबाता पोल्लो मियासंग अवतु इन्जोर माक वने परमेस्वरना दरोज धन्यवाद किन्तोरोम। अनि निमाट अदेन केवल मानेयना पोल्लो लेहका आयो मति परमेस्वरना पोल्लो इन्जोर समजेमासुन स्विकार कितिट। अनि परमेस्वरना विस्वास किन्तोर ओर लोकुरा जिवाते परमेस्वरना पोल्लो सोबाय बुतो किसोर मन्ता। 14 इन्जोर हे बायि-दादालोरक, बदाम यहुदिया प्रदेशता विस्वासि लोकुरकुन यहुदि लोकुरा द्वारा पकाय तकलिप आता अदामे मिकुन वने आपुना लोकुरकनिगाडाल असा पकाय तकलिप आतु, अनि इदाम मिक वने ओरा अनुभव आतु। 15 अनि यहुदिलोकुरक प्रबु येसुन अनि परमेस्वरना पोल्लो वेहवालोरकुन हव्कतुर अनि माकुन सतेहकितुरक। ओरक परमेस्वरतुन गिरदा केवोरक अनि ओरक सबोय लोकुरकुन होंग किन्तोरक 16 अनि यहुदिलोकुरक आयोर ओर लोकुरा पिसाना साटि माक वेहता येसु मसिना सोबाता पोल्लो ओर यहुदिलोकुरक रोके किन्तोर अनि इदाम किसुन ओरक आपुना पाप निहचोर मन्तोर अनि ओर लोकुरकनिगा परमेस्वरना पकाय होंग अवता। मसिलोकुरा सभाता विस्वासि लोकुरासंग मिलेमायाना आशा 17 हे बायि-दादालोरक, माक हुचुक बेरा साटि मिया हेरेटाल लक आतोम मति मावा मन्दे दरोज निमाट हेरे मन्तोरिट, अनि मिकुन हुळान साटि माक पकाय कोसिस कितोम। 18 इन्जोर माट, विशेषाल नना पोलुस, निया हेरे वायान साटि पकाय कोसिस कितोम मति सयतान माकुन रोकेकित। 19 अनि मावा सोबाय आशा अनि महिमा आयानाता मुकुट बाताल मन्ता? ओद निमाटेय मन्तोरिट बहे? प्रबु येसु दुसरो बेरा असा प्रगट आयनुर असके ओना मुने माक नितकोम। असके मिकुन हुळसुन माक अभिमानि आयार। 20 बाक्याकि मिया कारणते माकुन पकाय गिरदा आन्ता। |
© (Active) Wycliffe Bible Translators, Inc. All rights reserved.
Wycliffe Bible Translators, Inc.