१ तिस्लुनि 1 - Muria Far Western

अभिवादन

¹ पोलुस अनि सिलवानुस अनि तिमुथियुस तिस्सलुनियातोर मसिलोकुरा सभाता विस्वासि लोकुरक साटि इद पत्र कोटान्तोरोम। परमेस्वर बाबो अनि प्रबु येसु मसिना संबन्दते मन्तोरिट मिकुन दया अनि शान्ति पुटसोर मनि।

तिस्सलुनिया लोकुरा विस्वास

^2-3 माक आपुना प्रार्थनाते, मिकुन असा आपुना बाबो परमेस्वरना मुने मिया विस्वासता कारणते किता बुतो अनि मयाता कारणते किता मेहनत, अनि मावोर प्रबु येसु मसिना पोरो मन्ता ओद पका आशातुन माक दरोज आलिहिच मिक सबोय लोकुरा साटि दरोज परमेस्वरना धन्यवाद किन्तोरोम।

⁴ हे परमेस्वरना प्रिय बायि-दादालोरक, परमेस्वर मिकुन आचतुर इन्जोर मिकुन पुन्तोरिट।

⁵ बाक्याकि माक वेहता प्रबुना सोबाता पोल्लो केवल शब्द रुपते आयो मति पकाय लावदे अनि पवित्र आत्माता मदत अनि पकाय विस्वासते मिया हेरे अवतु। अनि माक मिया मदत साटि मियासंग बदाम मन्तोम इन्जोर निमाट पुन्तोरिट।

⁶ अनि मिया पकाय तकलिपतिगा, प्रबु अनि माक बदाम पकाय तकलिपतुन सहेन किस मतोम अदाम प्रबुना पवित्र आत्मा मिकुन हिता गिरदाता संग येसु मसिना सोबाता पोल्लोतुन मानेमासुन निमाट वने ओद पकाय तकलिपतुन सहन किस मावा अनि प्रबुना चाल ताकिला आतोरिट।

⁷ इन्जोर निमाट मकिदुनिया अनि अगया प्रदेशता सबोय विस्वासि लोकुरक साटि सोबाय आदरश बनेमातोरिट।

⁸ बाक्याकि मियागडाल मकिदुनिया अनि अगया प्रदेशता सबोय लोकुरक प्रबुना सोबाता पोल्लो केन्जतोर। अनि मिया विस्वास ओर परमेस्वरनिगा मन्ता, अदेना बारेते सबोय नाटे नाटेनिगा चर्चा फयलेमात इन्जोर अदेना बारेते बाताले इन्दाना जरुरि हिले।

⁹ बाक्याकि माक मियागा वायाना बदाम आत इन्जोर अनि जिवित मन्तोर ओर खरोय परेमेस्वरता सेवा किस,

¹⁰ परमेस्वर हातोरिगाडाल जितो कितुर आपुनोर मरि, अनि माकुन वायानाता हजोर होंगताल पिसहानुर ओर येसु मसिना मल्स वायाना हर हुळसुन माक बदाम मूरति पुजा विळिचुन परमेस्वरनिके वातोम इन्जोरक ओरक वेहान्तोरक।