१ पतरस 5 - Muria Far Westernमसिलोकुरा सभाता मुक्यालोरक साटि सन्देश 1 मियागडाल मसिलोकुरा सभाता मुक्याल लोकुरक साटि, मसिलोकुरा सभाता मुक्याल अनि मसिना पकाय तकलिपता गवाह अनि प्रगट आयवाल ओना महिमातिगा सहभागि मन्तोना नना मिकुन विनन्ति किन्तोना: 2 मिया कयते सोपे किता बेळांगता गोहडि लेहका मन्ता परमेस्वरना लोकुरकुन केपाट अनि इद जबरदस्तिते आयो मति परमेस्वरना इच्चाता अनुसार गिरदाते किम्ट, अनि डबुंगना लालुचते आयो मति ओरिगा मन लावेकिस किम्ट। 3 अनि निमाट कटोर रितिते ओरागा अदिकार केमाट मति परमेस्वरना लोकुरा मुने आदर्श बनेकिस किम्ट। 4 अनि मुक्याल मेहवाल येसु मसि प्रगट आयनुर असके ओर मिकुन बसकेय कोमेजे मायो आयार महिमाता ओद मुकुट हियानुर। मसिलोकुरा सभाता लयोर लोकुरक साटि उपदेश 5 इदे रितिते हे लयोरक, निमाट वने मुक्याल लोकुरा अदिकारते मन्ट, अनि निमाट सबोय लोकुरक नम्रताते वरोर दुसरोना सेवा कियान साटि तयारिते मन्ट, बाक्याकि “आपुनतुन हजोरपण केवालोरकुन परमेस्वर विरोद किन्तोर, मति परमेस्वर गरिब लोकुरकनिगा दया किन्तोर।” 6 इन्जोर पमरेस्वर मिकुन योग्यबेरा ताहिलाय परमेस्वरना लाववाले कयकना अडिय अधिनते मन्ट। 7 परमेस्वर मिया ध्यान किन्तोर इन्जोर मिया सबोय चिन्ता ओनिगा वाटसिम्ट। 8 आपुनतुन नियत्रण किस हुशियारते मन्ट, मिवोर विरोदि सयतान गुरजेमान्ता सिंह लेहका बोन हिक्स तिनका इन्जोर पळकसोर वलियान्तोर। 9 निमाट पकाय तकलिप सहेन कितिट अदामे दुनियातिगा मन्तोर मियोर सबोय तमोलोकुरकुन वने पकाय तकलिप सहेन कियाला पहाजे इन्जोर पुन्ज सयताना विरोद किस विस्वासतिगा स्थिर मन्ट। 10 इदेक परमेस्वर ओर सबोय दयातोर बाबो मन्तोर, ओर मिकुन मसिना कारण आपुना अनन्त महिमासाटि केयतुर, मिया हुडुक बेरावनाह पकाय तकलिप सहन कितपा पजा आपुनास मिकुन सिद्ध बने किस अनि स्थिर बने किस लाववाले बनेकियानुर। 11 ओना राज दरोज मनि। आमिन। पत्रता उदेश अनि आकरि अभिवादन 12 निमाट अनुभव किन्तोरिट इद दया परमेस्वरना खरोय दया आन्दु, अनि इदेनिगा निमाट स्थिर मन्ट इन्जोर मिकुन सल्ला किस गवाहि कियान साटि नना विस्वासयोग्य तमो समजेमान्तोना ओर सिलवानुसना द्वारा इव हुचुक पोल्लोंग पोल्लो कोटतोना। 13 मिया लेहका बाबिलोनतिगा आचतोर मसिलोकुरा सभाता लोकुरक अनि नावोर मरि लेहका मन्तोर मरकुस मिकुन नमस्कार किन्तोर। 14 पवित्र चुमाते वरोन दुसरोन नमस्कार किम्ट। मसिनिगा मन्तोरक निमाट सबोय लोकुरकुन शान्ति पुटसोर मनि। |
© (Active) Wycliffe Bible Translators, Inc. All rights reserved.
Wycliffe Bible Translators, Inc.