१ पतरस 4 - Muria Far Western

मिया जिवन मसिना द्वारा बदलेमाता

¹ मसि आपुना मेन्दुलते पकाय तकलिप सहेन कितुर इन्जोक निमाट वने ओदे विचारतुन हत्यारता रुपते स्विकार किम्ट।

² बाक्याकि बोर मेन्दुलते पकायि तकलिप सहेन कितोर ओर भविष्यते आपुना दुनियाता पिसता जिवन मानेयना इच्चाता अनुसार आयो मति परमेस्वरना इच्चाता अनुसार जिवे मायिर इन्जोर ओन पापताल मुक्ति पुटान्ता।

³ खराब चाल-चलनता खराब इच्चा, व्यभिचार, दाळंगो उन्डाना, अनि पकाय गाटो तिन्ज दाळंगो उन्डाना इदाम खराब कार्याक्रम अनि पकाय वरे हिन्ता बेकार मूरति पुजातिगा हन्जुन अविस्वासि लोकुरा इच्चाता अनुसार मिया बेरा हन्दिला हितिट ओद पकाय आतु।

⁴ निमाट ओरा खराब चाल-चलनतिगा ओरासंग सहभागि आयविट इन्जोर ओरक आश्चरय किस मिया निन्दा किन्तोरक।

⁵ जिवित मन्तोर अनि हातोर लोकुरा न्याय केवालना मुने ओरक हिसाब हियाना पहाजे।

⁶ बाक्याकि, मेन्दुलतिगा ओरा न्याय मानेयना अनुसार आयि मति आत्मातिगा ओरक परमेस्वरना अनुसार जिवे मायिर इन्जोर परमेस्वरना सोबाता पोल्लो हातोरकुन वने वेहच मतोर।

निमाट परमेस्वरना वरदानता सोबाय उपयोग केवाल बनेमाम्ट

⁷ सबोय पोल्लोता अन्त सान्डेय आयवाल मन्ता इदाम समजदार आस निमाट आपुनतुन काबु किस प्रार्थना कियान साटि हुशार मन्ट।

⁸ अनि सबोयताल हजोर पोल्लो वरोन दुसरोनताल पकाय मया इराट इन्जोर मन्ता, बाक्याकि मया पकाय पापतुन मुचिन्ता।

⁹ बळबडेमायवाय वरोन दुसरोना गिरिदाते पाहुन्चार किम्ट।

¹⁰ बोन बोद वरदान परमेस्वरताल पुटता, ओर अदेन परमेस्वरना अलग-अलग प्रकारता वरदानतुन सोबाय केपसुन उपयोग केवाल भणडारि आस वरोर दुसरोना सेवा किम्ट।

¹¹ बोरायि वळकिर ते परमेस्वरना पोल्लो वळकिन्तोना इदाम वळकिर, बोरायि सेवा केविर ते परमेस्वर हिन्तोर ओद लावता अनुसार केविर, मिया सबोय पोल्लोतिगा परमेस्वर येसु मसिना द्वारा महिमा प्रगट आयि। महिमा अनि लाव सबोय काळदे ओनाय मन्ता। आमिन।

मसिना पकायि तकलिपतिगा सहभागि आम्ट

¹² हे प्रिय गोतियालोरक, मिया परिक्षा कियान साटि बोद पकायि हजोर तकलिप मियागा भळकेमाता, अदेनते माक बसकेय केन्जोम उन्दि पोल्लो मियागा आयिला आता इन्जोर समजेमास आश्चरय केमाट।

¹³ मति मसिना पकायि तकलिपतिगा सहभागि आन्तोरिट इन्जोर गिरदा किम्ट! अदेनते ओर महिमाते प्रगट आयान बेरा निमाट पकाय गिरदा कियाकिट।

¹⁴ अनि मसिना पोरोय साटि मिया निन्दा आन्ता ते निमाट धन्य मन्तोरिट, बाक्याकि महिमाता आत्मा मन्जे परमेस्वरना आत्मा मियागा वास मन्तोर।

¹⁵ मियागाडाल बोरे मानेयतुन हव्काना या कलाना बुतो या खराब बुतो कियाना या दुसरोना बुतोतिगा कय वाटानाते पकायि तकलिप ताहाना सन्दि बनेकेमाट।

¹⁶ मति मसि आयानाता कारण पकायि तकलिप पुटहिर ते लज्जा आयमाकिर, मति निमाट मसिलोकुरक आन्दिट इन्जोर परमेस्वरना महिमा कियाला पहाजे।

¹⁷ बाक्याकि न्याय कियाना बेरा आतु, अनि न्याय कियाना पहले परमेस्वरना लोकुरिगा आयार। अनि न्यायता सुरुवात मावागाडाले आयार ते बोर परमेस्वरना सोबाता पोल्लोतुन मानेमायोर ओरा न्याय बचोन हजोर आयार?

¹⁸ अनि “परमेस्वरना मुने येताना योग्य मानेये पकाय तकलिपते पिसहानुर ते परमेस्वरनिगा विस्वास केवोर अनि पापि लोकुरा स्थिति बाताल आयार?”

¹⁹ इन्जोर परमेस्वरना इच्चाता अनुसार बोर पकाय तकलिप ताहान्तोरक, ओरक भलायि किसोर आप-आपुना जिवातुन दुनियातुन बनेहकेवाल विस्वासयोग्य परमेस्वरतुन सोपे किम्ट।