१ पतरस 3 - Muria Far Westernआळिवुर साटि उपदेश 1 हे मुतेह, निमाट वने आपुना मुदयोना अधिनते मन्ट, ओरागडाल बोरे परमेस्वरना पोल्लोतुन मानेमायोर आसोर मन्दानुरक, 2 ते वने निमाट ओरकुन मसिना बारेते बिना वळकनातेय आप आपुना मुदयालोरक मिया वरेतासंग पवित्र चाल-चलनतुन हुळस विस्वासते वायिर। 3 मिया साज कलकुन साज कियाना अनि सोनोता चिजक, या महाग-महाग सन्दरांग कराना इदाम तोहान साटि मनमाकि। 4 मति परमेस्वरना मुने पकाय हजोर किमत मन्ता कोमल अनि शान्त आत्माता बसकेय नाश आयो आयार इदाम साज पोन्डता ओद लोपाडा मानेय आयिला पहाजे। 5 पहलेटा काळते परमेस्वरनिगा आशा इरन्दुंग बोव पवित्र आसक वने आपुनतुन इदे रितिते साज किस आप आपुना मुदयोना अधिनताते मन्जोर मतांग। 6 अदामे अब्रहामना मुत्ते सारा अब्रहामिन स्वामि इन्ज ओना आग्याते मन्दु। इदे रितिते निमाट वने भला किस बोदे वरेतुन वरियवि आयकिट ते निमाट ओनोर पेडिह ठहरे मायकिट। 7 अदामे हे मुजोहारालोरक, मिया प्रार्थना व्यर्थ आयमाकि इन्जोर सोबायि बुद्धिते मुत्तेहनासंग जिवन जिवे माम्ट, अनि आसकुन कमजोर मन्तांग ते वने माक इवुरास जिवनता वरदानता वारिस आन्दोम इदाम समजेमास अवेहना आदर किम्ट। भलायिता बुतो कियानाता कारण निमाट पकाय तकलिप सहेन कियाला पहाजे 8 आकरिते सबोयजन उन्दि मन अनि दयावाले अनि तमो लोकुरकुन मया केवाल अनि करुणामय अनि नम्र बने माम्ट। 9 खराब बुतोता बदला खराब बुतो केमाट, अपमानता बदला अपमान केमाट मति निमाट आशिषता वारिस आयान साटि केयतोर मन्तोरिट इन्जोर अदेना बदलाते आशिरवाद हिम्ट। 10 बाक्याकि “बोरायि जिवनता इच्चा इरान्तोर, अनि सोबाय दिया हुळाना इच्चा किन्तोर, ओर आपुना वन्जेरतुन खराबताल, अनि आपुना टोडितुन खराब वळकानाताल रोकेकियाला पहाजे। 11 ओर खराबता बुतो तासिस भलायि केविर, ओर शान्तितुन पळकसोर अदेन कियान साटि पकायि कोसिस केविर। 12 बाक्याकि प्रबुना कोन्डांग दरमि मानेयनिगा अनि ओनांग कविंग ओरा विनन्तितिके लागेमास मन्तांग, मति खराब बुतो किन्तोर ओर लोकुरकुन प्रबु दरोज विरोद किन्तोर।” 13 निमाट सोबाय कियाना इच्चा किन्तोरिट ते मिया खराब केवाल बोर मन्तोर? 14 निमाट परमेस्वरना मुने येताना योग्य बुतोंग कियानाता कारण दुःख सहेन कियाकिट ते धन्य मन्तोरिट। “लोकुरा वरहानातुन वरियमाट, अनि चिन्ताकेमाट।” मति मिया मन्दिगा मसिन प्रबु इन्जोर समजेमास आरादना किम्ट। 15 बोरायि मिकुन मिया आशाता बारेते बाताले पुच्चेमायिर ते ओन नम्रता अनि वरेतासंग उत्तर हियान साटि दरोज तयार मन्ट। 16 येसु मसिनिगा मिया सोबाय बुतोता निन्दा केवालोर लोकुरक मिया अपमान कियानपा लज्जा आयिर इन्जोर शुद्ध विवेकते मन्ट। 17 दुःख ताहाना परमेस्वरना इच्चा मन्ता ते ओद खराब बुतो किसुन आयो मति सोबाय बुतो किसुन दुःख ताहाना सोबाय मन्ता। 18 बाक्याकि मसिहाल वने माकुन परमेस्वरना संबन्दते ओयिर इन्जोर ओर निरदोष मतोर ते वने माक पापि लोकुरक साटि उन्दि बेरा दुःख ताहतुर। अनि मेन्दुलते ओन हायानाता दन्ड पुटतु मति पवित्र आत्माता लावदे ओन असा जितो कितुर। 19 पवित्र आत्माता लावदे ओर हन्जुन जेहलतिगा मन्वालोर आत्मांगतुन वने प्रचार कितुर। 20 ओरक ते पकाय वरसाना पहले नूहा पोरोयतोर परमेस्वरनोर मानेय हजोर डोंगा बनेहकियाना ओद बेरा परमेस्वरना आग्या मानेमायोर लोकुरक मतोरक, ओरा साटि परमेस्वर पोसोरिंग सहेन किस हर हुळन्दुर असके ओद हजोर डोंगातिगा हुचुलोर मन्जे केवल आटे लोकुरक उसाताल पिस मतोर। 21 ओद उसा बपतिस्माता दृष्टान्त मन्ता, बपतिस्मा इदेक मेन्दुलता मयिल साप कियाना आयो मति शुद्ध अन्तकरण साटि परमेस्वरतुन उन्दि विनन्ति मन्ता, येसु मसिना असा जिवे मायानाता द्वारा माकुन पिसहान्तोर। 22 ओर स्वरगतिगा हन्जुन परमेस्वरना तिन्दान कयबासा उदितुर, स्वरगदूत अनि अदिकारि अनि सबोय लाव ओना अदिकारता अधिनते मन्तांग। |
© (Active) Wycliffe Bible Translators, Inc. All rights reserved.
Wycliffe Bible Translators, Inc.