१ पतरस 2 - Muria Far Westernमाक परमेस्वर साटि जिवेमायकाट 1 इन्जोर सबोय प्रकारता खराब बुतो, दोखा, कपट, हेवा, अनि निन्दातुन लक किस, 2 इदेकेन जनमे मातोर नुनांग बदाम पाल उन्डान साटि पकायि इच्चा किन्तोरक अदाम लेहका पिसान साटि बरसाना निर्मल पाल लेहका मन्ता परमेस्वरना ओद पोल्लोता निर्मल अनि सादो रितिते करियला पुटि इन्जोर पकायि इच्चा किम्ट। 3 प्रबु दया किन्तोर इन्जोर निमाट आपुना अनुभवते पुतोरिट। 4 मानेयक टन्डस हितुर, मति परमेस्वर आचुन ओन अनि परमेस्वरना हेरे खास अनि पकाय किमति जितो कल मन्तोर ओर येसुना हेरे वास, 5 निमाट वने आपुनास जितो कल लेहका आत्मिक लोन आस बनेमासोर दान्तोरिट, अनि येसु मसिना कारण परमेस्वरतुन स्विकार मन्ता ओद आत्मिक बलि कियान साटि योग्य याजकलोरा पवित्र समाज आस बनेमासोर दान्तोरिट। 6 “हुळाट, नना आचता पकाय किमतिता उन्दि विशेषाल कल सियोनतिगा इरिला आतोना, अदेनिगा बोरे विस्वास कियानुर ते ओर बसकेय लज्जा आयोर आयनुर” इन्जोर पवित्र पुस्तकतिगा कोटता मन्ता। 7 विस्वास किन्तोरक मिया साटि ओद पकाय किमति मन्ता, मति बोर विस्वास केवोरक ओरा साटि “मिस्रि लोकुरक बेकार ठहरे किस मतोर ओद कल लोन बनेकियाना पायवाता विशेषाल कल आतु।” 8 ओरक ते पोल्लोतुन मानेमायोर इन्जोर, “ओद कल ओरकुन कोदोर लागस मुटाहना अनि दोखा आयाना कारण आयार।” अनि इदेन साटिय ओरक ठहरे मास मतोर। 9 मति निमाट ते अन्दकारताल आपुना अत्भुत वेळिचितिगा मिकुन केयतोर ओना गुणांग प्रगट कियान साटि आचतोर वरोर वंश, अनि राजालना याजक लोकुरा समाज, अनि पवित्र लोकुरा दल, अनि परमेस्वरना निच लोकुरक आन्दिट। 10 मुने निमाट परमेस्वरनोर लोकुरक हिले आसिट मति इदेक निमाट परमेस्वरना लोकुरक आन्दिट, मुने मियागा परमेस्वरना दया पुटो आसि मति इदेक मियागा परमेस्वरना दया पुटिहतोरिट। निमाट परमेस्वर साटि जिवेमाम्ट 11 हे प्रिय गोतियालोरक, निमाट इद दुनियातिगा आपुनतुन परदेशि अनि यात्रि समजेमास मिया आत्मातासंग लळायि किन्ता ओव मेन्दुलता खराब इच्चाताल लक मन्ट इन्जोर नना मिकुन विनन्ति किन्तोना। 12 बोर येसु मसिनिगा विस्वास केवोर ओर लोकुरासंग निमाट जिवित मन्दानपा मिया चाल-चलन सोबाय मनि। ओर मिकुन बोव बोव पोल्लोतिगा खराब बुतो केवालोरक इदाम दोष लावेकिस बदनाम किन्तोरक, ओरक मिया सोबाय बुतोतुन हुळस परमेस्वर माकुन न्याय कियाना ओद दिया परमेस्वरना महिमा केविर। निमा सबोय अदिकार लोकुरा आग्या मानेमायिला पहाजे 13 प्रबुन साटि निमाट मानेय बनेहकितोर ओद सबोय नियमता अधिनते मन्ट। 14 अनि सबोय लोकुरा मुक्याल इन्जोर राजालिन वने अधिन मन्ट। अनि ओर खराब बुतो केवालोरकुन दन्ड हियान साटि अनि सोबाय बुतो केवालोरा वाहवा कियान साटि आचतोर इन्जोर राजाल लोहतोर ओर हाकिमकना वने अधिन मन्ट। 15 बाक्याकि निमाट सोबाय बुतो कियानाता कारण मिया बारेते बराबर समजेमायवाय वळकिन्तोर ओर अन्जान लोकुरा व्यर्थ पोल्लोंग वळकाना बन्द किसिम्ट इन्जोर परमेस्वरना इच्चा मन्ता। 16 निमाट स्वतन्त्र मन्तोरिट मति दुष्टतातुन मुचान साटि आपुना स्वतन्त्रता उपयोग केमाट; अनि निमाट परमेस्वरनोर दास समजेमास ताकाट। 17 सबोय लोकुरा आदर किम्ट, तमोलोरकुन मया इराट, परमेस्वरतुन वरियाट, राजाना आदर किम्ट। येसु मसि मावा साटि उन्दि उदाहरण मन्तोर 18 हे दासक लोकुरक, केवल सोबायि अनि शान्त स्वभावतोर आपुना स्वामि लोकुरकुन आयो मति कटोर स्वभावतोर स्वामि लोकुरा वने सबोय प्रकारता वरेते ओरा अधिनते मन्ट। 19 बाक्याकि बोरे बिना गुनहाते दुःख अनि पकायि तकलिप सहेनकियानपा ओद परमेस्वरना इच्चा मन्ता इदाम समेजमास ओर अदेन सहेन कियानुर ते परमेस्वर ओरकुन आशिष कियानुर। 20 निमाट गुन्हा किस मार तिन्जुन पोसोरिंग सहेन किस मनकिट ते इगा बाताल हजोरपणता पोल्लो मन्ता? मति सोबाय बुतो किस दुःख ताहच पोसोरिंग सहेन किस मनकिट ते इद परमेस्वरना मुने प्रशंसाता योग्य मन्ता। 21 अनि निमाट इदेन साटिय केयतोर मन्तोरिट, बाक्याकि मसि वने मिया साटि दुःख ताहतुर अनि निमाट वने ओना हरिते इन्जोर मिकुन उन्दि आदर्श हिस हतोर। 22 “ओर बसकेय पाप केवोर; अनि ओना टोडिताल बोदे कपटता पोल्लो बसकेय पसियो।” 23 ओना अपमान आतु असके ओर बोनाय अपमान केवोर, अनि दुःख ताहच बोने धमकि हेवोर आन्दुर, मति आपुनतुन खरोय न्याय केवालना कयदे सोपे किन्दुर। 24 माक पाप संबन्दताल हास दारमिकता साटि जिवन जिवेमायकाट इन्जोर ओर आपुना मेन्दुलतिगा मावा पापतुन येचुन कुरुस पोरो अन्जतोर, ओना मार तिन्दानाता कारण निमाट चंगा आतोरिट। 25 बाक्याकि निमाट पहले लेस्कता बेळांग लेहका मतोरिट, मति इदेक आपुना मेहवाल अनि आपुना जिवातुन केपवाल मसिना हेरे मलस वातोरिट। |
© (Active) Wycliffe Bible Translators, Inc. All rights reserved.
Wycliffe Bible Translators, Inc.