१ पतरस 1 - Muria Far Western

पतरसना अभिवादन

¹ येसु मसिनोर खास चेलाल पतरस, बाबो परमेस्वरना भविष्य ग्यानता अनुसार, येसु मसिना आग्या मानेमायान साटि अनि ओना नतुर हिदिक्स मुनेटाले आचतोरक, अनि परमेस्वरना आत्माते पवित्र बनेकितोरक पुन्तुस, गलातिया, कप्पुदुकिया, आसिया अनि बिथुनियातिगा हिके-होके आस परदेस मन्वालोर परमेस्वर आचतोर ओर लोकुरकुन इद पत्र कोटान्तोना।

² मिकुन दया अनि शान्ति पकाय पुटसोर मनि।

मावा जिवित आशा

³ मावोर प्रबु येसु मसिनोर पिता परमेस्वरना धन्यवाद आयि!

⁴ ओर येसु मसिना हातोरिगाडाल असा जिवेमायानाता द्वारा, आपुना पकाय दयाते माकुन जिवित मन्ता ओद आशा पुटहान साटि, आकरि न्यायता बेरा प्रगट आयवाल पिसाना पुरा आयान साटि, विस्वासता कारण परमेस्वरना लावते सुरक्षित आस स्वरगतिगा मिया साटि इरस मन्ता,

⁵ बोदे नाश आयो अनि बोदे डाग हिले इदाम निर्मल अनि बसकेय कोमेजेमायो ओद मिया साटि स्वरगतिगा इरस मन्ता वारिस पुटान साटि माक पुनाल जनमा हिहितुर।

⁶ इद कारणते इदेक मिकुन हुचुक बेरा साटि अलग-अलग पकायि तकलिपता कारण दुःखते मन्तोरिट ते वने निमाट पकाय गिरदाते मन्तोरिट।

⁷ बाक्याकि परिक्षाते विजय आता मिया खरोय विस्वास ओद किसतिगा परिक्षा किता सोनोताल वने पकाय किमति मन्ता इन्जोर येसु मसि असा प्रगट आयनुर असके परिक्षाते विजय आता मिया खरोय विस्वास वाहवाता, महिमाता अनि आदरता कारण ठहरे मायि।

⁸ निमाट येसु मसिन हुळविट ते वने निमाट ओन मया किन्तोरिट। इदेक निमाट ओन हुळिला परविट ते वने ओनिगा विस्वास किस वर्णन किया परो अचोन महिमाते निन्दिता गिरदाते मन्तोरिट।

⁹ इदाम आपुना विस्वासता आकरि प्रतिफळ मन्जे मिया आत्मातांग पिसाना पुटहान्तोरिट।

¹⁰ मियागा आयवाल मता ओद दयाता बारेते परमेस्वरना पोल्लो वेहच मतोरक ओर परमेस्वरना पोल्लो वेहवालोरक इद पिसानाता बारेते समजेमायान साटि पकायि कोसिस किस पकाय इच्चाते पळकसोर मतोरक।

¹¹ मसि सहेन कियानुर ओद पकायि तकलिप अनि पजा दिसार ओद महिमाता बारेते ओरागा मन्तोर मसिना आत्मा मुनेटाले वेहतुर। इव पोल्लोंग इद दुनियातिगा बसके बदाम आयनुंग इन्जोर परमेस्वरना पोल्लो वेहवालोर पकाय इच्चाते पळकसोर मतोरक।

¹² ओरक आपुना साटि आयो, मति मिया साटि माक सेवा किन्तोरोम इन्जोर ओरकुन तोहतुर। स्वरगताल लोहता पवित्र आत्माता द्वारा येसु मसिना सोबाता पोल्लो मिकुन वेहवालोरक अव पोल्लोंग मिकुन इदेक वेहतोरक। अनि स्वरगदूतक वने अव पोल्लोंग ध्यानते हुळाना इच्चा किन्तोरक।

पवित्र जिवन जिवेमायान साटि परमेस्वर मिकुन केयतोर

¹³ इन्जोर आपुना मन्दुन तयार किस आप आपुना मन्दुन नियत्रण किस मन्ट। येसु मसि मिकुन असा दिसाना बेरा मिकुन पुटवाल मन्ता ओद दयातिगा पुरा आशा इराट।

¹⁴ निमाट परमेस्वरना आग्या मानेमायवाल बालक मन्तोरिट इन्जोर निमाट अळानि मन्तोरिट ओद बेरा मियागा मता खराब इच्चाता पालन केमाट।

¹⁵ मति मिवोर केयवाल परमेस्वर पवित्र मन्तोर इन्जोर निमाट वने आपुना सबोय चाल-चलनतिगा पवित्र बनेमाम्ट।

¹⁶ “नना पवित्र मन्तोना इन्जोर निमाट वने पवित्र बनेमाम्ट” इन्जोर परमेस्वर इन्तोर इदाम पवित्र पुस्तकतिगा कोटता मन्ता।

¹⁷ अनि बोदे पक्षपात केवोर आस सबोय लोकुरा बुतोता अनुसार न्याय केवाल परमेस्वरिन निमाट हे पिता इन्ज ओना प्रार्थना किन्तोरिट ते, इद दुनियातिगा आपुना परदेशि लेहका मन्दानपा वरेते मन्ट।

¹⁸ मिया बाबो-दादिनिकेडाल ताकसोर वान्ता बेकार चाल-चलनताल मिया पिसाना चान्दि-सोनो इदाम नाश आयवाल बोदे चिजता द्वारा आयो।

¹⁹ मति बोदे दोष अनि बोदे डाग हिले बेळा पिलाता मन्जे मसिना पकाय किमति नतुरता द्वारा आतु इन्जोर निमाट पुन्तोरिट।

²⁰ दुनियाता उत्पन्न आयानाता पहलेटाले मसिन आचतुर मति इदेक ओर इद आकरि काळतिगा मिया साटि दिसतुर।

²¹ ओन हातोरिगाडाल जिवेकिहितुर अनि ओन महिमा हितुर ओर परमेस्वरनिगा मसिना कारण माक विस्वास किन्तोरोम। अदाम मिया विस्वास अनि आशा परमेस्वरनिगा मन्ता।

²² खरोयतुन पालन कियानाता कारण मिया आत्मा निषकपट बन्धुभावता माया साटि शुद्धकिस इन्जोर मन लावेकिस वरोर दुसरोन पकाय मया किम्ट।

²³ निमाट नाश आन्ता ओद बिजाताल आयो मति नाश आयो ओद बिजाताल, जिवित अनि दरोज मन्वाल परमेस्वरना पोल्लोता द्वारा पुनाल जनमा येतितोरिट।

²⁴ बाक्याकि “सबोय लोकुरक रोन्डा लेहका मन्तोरक, अनि अदेना सबोय शोभा रोन्डाता पुंगार लेहका मन्ता। रोन्डा वतिन्ता, अनि पुंगार कुसान्ता,

²⁵ मति प्रबुना पोल्लो सबोय काळदे स्थिर मन्ता।” अनि इदे पोल्लो आन्दु मिकुन केन्जहिच मतोर ओद सोबाता पोल्लो।